İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 230 Hüküm no: 141 Orijinal metin no: [30a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bogos v. Kigork’un ekmek fırını ve değirmenindeki hisselerini Yazıcı Şerif Hasan Efendi b. Seyyid Hacı Osman’a satması Habbâz fırını 21250 guruş Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı hazret-i cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene muktezâsından bulunduğuna binâen teba‘a-i Devlet-i aliyye’nin Ermeni milletinden ve ekmekçi esnâfı ustabaşılarından Bogos v. Kigork meclis-i şer‘-i şerîf-i enverde bâ‘isü’l-kitâb Yazıcı Şerif Hasan Efendi b. es-Seyyid el-Hâc Osman tarafından husûs-ı âti’l-beyânda tasdîka vekîl-i şer‘îsi es-Seyyid Abdülhalim Ağa b. Süleyman mahzarında esnâf kethüdâsı İbrahim Ağa b. Ahmed ile sair cerîde[de] mazbûtü’l-esâmî nizâm ustaları taraflarından mürsel vekîlleri esnâf-ı merkūme yiğitbaşısı es-Seyyid İsmail Efendi b. es-Seyyid Mehmed Emin hâzır olduğu hâlde ikrâr-ı tâm ve takrîr-i kelâm edip mahmiye-i mezkûrede Davudpaşa iskelesi kurbünde vâki‘ şehriye yirmi beş guruş kirâlı Deniz Hamamı Fırını demekle meşhûr bir bâb ekmekçi fırını ve ona merbût ittisâlinde vâki‘ şehriye yirmi beş guruş kirâlı beş horoslu bir bâb ekmekçi değirmeni derûnlarında mevcûde beyne’l-esnâf gedik ta‘bîr olunur yirmi re’s bârgir ve onlara tâbi‘ sâir âlât-ı lâzime-i ma‘lûmenin on altı re’s bârgir on iki mıh ve onlara isâbet eden âlât-ı sâiresi âharların yedlerinde mülkleri olup mâ‘adâ üç re’s bârgir on iki mıh ve onlara îcâb eden âlât-ı sâiresi yedimde olup işbu şehr-i hâlin yirminci günü târihiyle müverraha İstanbul Mahkemesi’nden verilen bir kıt‘a mübâya‘a hücceti ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca akd-i âti’z-zikrin sudûruna değin yedimde mülk ve hakkım olmağla ben ber-minvâl-i muharrer mâlik olduğum sâlifü’l-beyân üç re’s bârgir on iki mıh ve onlara îcâb eden âlât-ı sâireyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ yirmi bir bin iki yüz elli guruşa müvekkil-i mezbûr Şerif Hasan Efendi’ye bey‘ ve temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra benim Zahîre Hazinesi’ne zimmetimde on üç bin dokuz yüz guruş deynim olmağla semen-i mezkûr yirmi bir bin iki yüz elli guruşun on üç bin dokuz yüz guruşunu hazine-i mezkûrede kabza memûre edâ etmek üzere müvekkil-i mezbûr Şerif Hasan Efendi’ye emr ve tarafımdan tevkîl eylediğimde ol dahi ber-vech-i muharrer kabûl ve edâ-i deyne ta‘ahhüd edip semen-i mezkûrun bâkīsi olan yedi bin üç yüz elli guruşu dahi bana tamâmen def‘ u teslîm ben dahi yedinden bi’t-tamâm ve’l-kemâl ahz u kabz eyledim ba‘de’l-yevm sâlifü’l-beyân üç re’s bârgir on iki mıh ve onlara îcâb eden âlât-ı sâirede benim aslâ ve kat‘â alâka ve medhalim kalmayıp müvekkil-i mezbûr Şerif Hasan Efendi’nin mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 22 Muharrem sene 1279 Şuhûdü’l-hâl: Muhzır Mustafa Ağa b. ( ), Muhzır Süleyman Ağa b. ( ), Muhzır Ahmed Ağa b. ( ), Muhzır el-Hâc Salih Ağa Ağa b. ( ), ve gayruhum