İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 233 Hüküm no: 143 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Elisavi bt. İstrati’nin bakkal dükkânındaki hisselerini kürkçü esnâfından Haleblioğlu Anderya ve duhân tüccârından Âsitânelioğlu İlya satması Bakkal mübâya‘ası 5000 guruş Kezâlik medîne-i Üsküdar’da Yeni mahallede sâkine teba‘a-i Devlet-i aliyye’nin Rum milleti nisvânından şahsı ta‘rîf-i şer‘î ile mu‘arrefe olan Elisavi bt. İstrati meclis-i şer‘-i hatîrde her biri teba‘a-i Devlet-i aliyye’nin Rum milletinden olduğu bâ-ilmühaber mütehakkık olan bâ‘isü’r-rakīm kürkçü esnâfından Haleblioğlu Anderya v. Dimitri ve duhân tüccârından Âsitânelioğlu İlya v. İsak muvâcehelerinde bakkal esnâfının kethüdâsı Ahmed Efendi tarafından mürsel vekîli esnâf-ı merkūme çavuşu Vasil v. Yani hâzır olduğu hâlde ikrâr-ı tâm ve takrîr-i kelâm edip mahmiye-i İstanbul’da el-Hâc Timur mahallesinde kâin bir tarafdan Abacı Kostaki menzili ve bir tarafdan Abacı Hıristaki bahçesi ve tarafeyni tarîk-i âm ile mahdûd merkūm Hıristaki’nin bâ-temessük-i mütevelli bi’l-icâreteyn taht-ı tasarrufunda olan menzil tahtında vâki‘ şehriye beş guruş kirâlı Baltacı dükkânı demekle arîf bir bâb ve bakkal dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm [i‘tibârıyla] altmış sehm hisse-i şâyi‘ası ber-vech-i vakfiyyet âharların taht-ı tasarruflarında olup mâ‘adâ altmış sehm hisse-i şâyi‘ası dahi akd-i âti’z-zikrin sudûruna değin yedimde olup bin iki yüz otuz yedi senesi Recebi’l-ferdinin beşinci günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan Reisü’l-ulemâ Arabzâde Mehmed Sadullah Efendi merhûmun imzâ ve hatemini hâviye işbu bir kıt‘a hüccet-i şer‘iyye ve kethüdâ-yı mûmâ-ileyhin takdîm eylediği bir kıt‘a ilmühaber nâtıklar olduğu üzere yedimde mülk ve hakkım olmağla ben âlât-ı gedik-i mezkûrdan ber-minvâl-i muharrer mâlike olduğum altmış sehm hisse-i şâyi‘a-i merkūmenin otuz sehm hisse-i şâyi‘asını bi-safkatin vâhidetin beş bin guruşa merkūm Anderya’ya ve âhar otuz sehm hisse-i şâyi‘asını dahi kezâlik bi-safkatin vâhidetin beş bin guruşa merkūm İlya’ya tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile bâ-izn-i şürekâ bey‘ ve temlîk ve vech-i lâyıkıyla teslîm eylediğimde onlar dahi ber-vech-i muharrer iştirâ ve temellük ve tesellüm ve kabz u kabûl eylediklerinden sonra semenleri olan cem‘an on bin guruşu tamâmen bana def‘ u teslîm ben dahi yedlerinden bi’t-tamâm ve’l-kemâl ahz u kabz edip mebî‘-i mezkûrların tağrîr ve gabnlarına müte‘allika da‘vâdan dahi tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-vech-i muharrer âharın ibrâsını kabûl eyledik, ba‘de’l-yevm âlât-ı gedik-i mezkû[ru]n altmış sehm hisse-i şâyi‘a-i merkūmesinde benim aslâ ve kat‘â alâka ve medhalim kalmayıp otuz sehm hisse-i şâyi‘ası merkūm Anderya’nın ve âhar otuz sehm hisse-i şâyi‘ası dahi merkūm İlya’nın ber-vech-i meşrûh mülk-i müşterâları ve hakk-ı sırfları olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 11 Muharrem sene 1279 Şuhûdü’l-hâl: Muhzır Osman Ağa b. ( ), Muhzır Süleyman Ağa b. ( ), Muhzır İsmail Ağa b. ( ), Muhzır Feyzullah Ağa b. ( ), ve gayruhum