İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 234 Hüküm no: 144 Orijinal metin no: [30b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbethâneci esnâfından Kosta v. Yanko’nun şerbethâne hisselerini Yemenici müteveffâ Nikola zevcesi Vitorice bt. Pironiko’ya satması Şerbethâne mübâya’sı Kezâlik mahrûse-i Galata’ya muzâfe İstinye nâhiyesine tâbi‘ Büyükdere karyesinde sâkine teba‘a-i Devlet-i aliyye’nin Rum milletinden ve şerbethâneci esnâfından Kosti v. Yanko meclis-i şer‘-i hatîrde karye-i mezkûrede sâkine teba‘a-i Devlet-i aliyye’nin Rum milleti nisvânından olduğu bâ-ilmühaber mütehakkık olan bâ‘isetü’r-rakīm Yemenici müteveffâ Nikola zevcesi Vitoricebt. Pironiko tarafından husûs-ı âti’l-beyânda tasdîka vekîl-i şer‘îsi teba‘a-i Devlet-i aliyye’nin Rum milletinden ve esnâf-ı merkūmenin karye-i merkūme kolu ustabaşısı İstefan v. Mike muvâcehesinde teba‘a-i Devlet-i aliyye’nin Rum milletinden ve esnâf-ı merkūmenin Samatya kolu ustabaşısı Haci Delot v. Yakof hâzır olduğu hâlde ikrâr-ı tâm ve takrîr-i kelâm edip mârrü’l-beyân Büyükdere karyesinde Çarşı civârında ekmekçi fırını kurbünde vâki‘ bir tarafdan Praşkovice menzili ve bir tarafdan çilingir dükkânı ve bir tarafdan bahçe ve taraf-ı râbi‘i tarîk-i âm ile mahdûd ve merkūme Vitorice ile karındaşı Dimitri’nin bâ-hüccet-i şer‘iyye yedlerinde mülk ve hakları olan şehriye otuz guruş kirâlı Maryora şerbethânesi demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yüz yirmi sehm i‘tibârıyla altmış sehm hisse-i şâyi‘ası âharın yedinde mülkü olup mâ‘adâ altmış sehm hisse-i şâyi‘ası dahi akd-i âti’z-zikrin sudûruna değin bin iki yüz yetmiş altı senesi Recebi’l-ferdinin on ikinci günü târihiyle müverrah ve ol târihde Rusûm-i zecriye nâzırı olan sa‘âdetlü Nazif Beyefendi’nin mührüyle memhûr işbu bir kıt‘a sûret ve hâlâ Zecriye Nâzırı izzetlü Hüseyin Ağa’nın işbu bir kıt‘a ilmühaber mantûklarınca yedimde mülk ve hakkım olmağla ben âlât-ı gedik-i mezkûrdan ber-minvâl-i muharrer mâlik olduğum altmış sehm hisse-i şâyi‘a-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ yedi bin guruşa müvekkile-i merkūme Vitorice’ye bey‘ ve temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm yedi bin guruşu tamamen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt eyledik ba‘de’l-yevm âlât-ı gedik-i mezkûrun altmış sehm hisse-i şâyi‘a-i mezkûresinde benim aslâ ve kat‘â alâka ve medhalim kalmayıp müvekkile-i merkūme Vitorice’nin mülk-i müşterâsı hakk-ı sırfı olmuşdur dedikde gıbbe’t-tasdîki’ş-şer‘î. Fî 13 Safer sene 1279 Şuhûdü’l-hâl: Muhzır Osman Ağa b. ( ), Muhzır Süleyman Ağa b. ( ), Muhzır Mustafa Ağa b. ( ), Muhzır Feyzullah Ağa b. ( ), ve gayruhum