İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 235 Hüküm no: 145 Orijinal metin no: [30b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Değirmencioğlu Vasilaki’nin tütüncü gediğini Manifaturacı Panayot ve zevcesi Anaştaşya’ya satması Tütüncü mübâya‘ası Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gedikleriyle sâir gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan her nev‘ gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı hazret-i cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen teba‘a-i Devlet-i aliyye’den ve Rum milletinden Sarraf Değirmencioğlu Vasilaki v. Haci Nikola’nın hizmetkârı ve tarafından husûs-ı âti’l-beyânda ikrâr ve i‘tâ-i hüccete vekîl olduğu yine teba‘a-i Devlet-i aliyye’den ve millet-i merkūmeden tüccârdan Piyalioğlu İlya v. İsak ve tüccârdan Avyanos v. İstavri şehâdetleriyle ber-nehc -i şer‘î sâbit ve mütehakkık olan İstofan v. Yani meclis-i şer‘-i hatîr-i lâzımü’t-tevkīrde yine teba‘a-i Devlet-i aliyye’den ve millet-i merkūmeden işbu hâmilü’r-rakīm Mânifaturacı Panayot v. Petro ve zevcesi şahsı mu‘arrefe Anaştaşya bt. İstavri taraflarından husûs-ı âti’l-beyânda tasdîka vekîl-i şer‘îleri damadları Mânifaturacı Andon v. Aleksi muvâcehesinde tütüncü esnâfının bâ-mukābeletân ve bâ-berât-ı şerîf -i âlîşân kethüdâsı es-Seyyid Abdüllatif [31a] Efendi ile on nefer müslim ve beş nefer hıristiyan lonca ihtiyârları taraflarından mürsel vekîlleri kethüdâ vekîli Ahmed Efendi b. Osman hâzır olduğu hâlde bi’l-vekâle ikrâr-ı tâm ve takrîr-i kelâm edip müvekkilim merkūm Vasilaki İstanbul’da Mercan çarşısında turşucu ve berber dükkânı beynlerinde kâin Nezâret-i Evkāf-ı hümâyûn’a mülhak evkāfdan merhûm Mimar Hasan Efendi Vakfı müsakkafâtından olarak zevcân-ı müvekkilân-ı merkūmânın bâ-temessük-i mütevelli bi’l-icâreteyn iştirâken taht-ı tasarruflarında olan beher şehr otuz akçe icâre-i müecceleli bir bâb tütüncü dükkânı derûnunda mevcûde Eshâm Muhâsebesi kaleminde es-Seyyid Ömer Ağa b. es-Seyyid İbrahim Efendi ismine mukayyed beher şehr beş guruş kirâ-yı kadîmelü beyne’l-esnâf tütüncü gediği ta‘bîr olunur bâ-defter-i müfredât âlât-ı lâzime-i ma‘lûme yedimde olup bin iki yüz yetmiş yedi senesi şehr-i Rebî‘ülâhiri’nin ikinci günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan Halil Hamid Paşazâde semâhatlü Mustafa Nazif Beyefendi hazretlerinin imzâ ve hatemini hâviye işbu bir kıt‘a hüccet-i şer‘iyye ve bir kıt‘a sûret ve kethüdâ-yı mezbûrun takdîm eylediği işbu bir kıt‘a ilmühaber mantûklarınca şirâen yedimde mülk ve hakkım olmağla el-hâletü hâzihî ben mâlik olduğum âlât-ı gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile zevcân-ı müvekkilân-ı merkūmân Panayot ve Anaştaşya’ya ale’l-iştirâki’s-seviy yirmi bin guruşa bey‘ ve temlîk ve teslîm eylediğimde onlar dahi ber-vech-i muharrer iştirâ ve temellük ve tesellüm ve kabz u kabûl edip semeni olan meblağ-ı mezkûr yirmi bin guruşu bana tamâmen ve kâmilen def‘ u teslîm eylediklerinde ben dahi yedlerinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-minvâl-i muharrer âharın ibrâsını kabûl eyledik, ba‘de’l-yevm âlât-ı gedik-i mezkûrde benim aslâ ve kat‘â alâka ve medhalim kalmayıp müvekkilân-ı zevcân-ı merkūmânın ale’l-iştirâki’s-seviy mülk-i müşterâları ve hakk-ı sırfları olmuşdur dedikde gıbbe. Fî 9 Cumâdelûlâ sene 1279 Şuhûdü’l-hâl: Muhzır Ahmed Ağa b. ( ), Muhzır Mustafa Ağa b. ( ), Muhzır Feyzullah Ağa b. ( ), Muhzır Yusuf Ağa b. ( ), Muhzır el-Hâc Salih Ağa b. ( ), ve gayruhum