Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 530 Hüküm no: 639 Orijinal metin no: [111b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tüfekçilerin Cebehâne-i Âmire’ye verdikleri tüfek bedelinden eski Tüfekçibaşı Receb Beşe b. Ahmed’in zimmetini ibrâ etmesi Hâlâ tüfenkçibaşı olup sefer-i hümâyûnda olan Musli Beşe b. Mustafa tarafından husûs-ı âti’z-zikre sâbitü’l-vekâle vekîli olan Sefer Beşe b. Hasan ve tüfenkçi tâifesinden Ahmed Beşe b. Süleyman ve el-Hâc Mustafa b. Receb ve Şaban b. Abdullah ve Ahmed b. Kābil ve Mustafa b. Hüseyin ve Mehmed b. Abdullah ve İbrahim b. Abdullah ve Yusuf b. Abdullah nâm kimesneler meclis-i şer‘-i şerîf-i enverde sâbıkan tüfenkçibaşı olan Receb Beşe b. Ahmed mahzarında her biri asâleten ve vekâleten ikrâr ve takrîr-i kelâm edip bundan akdem Cebehâne-i âmire’ye işlediğimiz altı bin aded tüfenk her biri doksan birer akçeden cem‘an beş yük kırk altı bin [akçe] ücretimizi mezbûr Receb Beşe ber vech-i muharrer tüfenkçibaşı olmağla bizim için cânib-i mîrîden ahz u kabz etmişidi hâlâ mezbûr Receb Beşe ber vech-i mübeyyen ve makbûzu olan beş yük kırk altı bin akçeyi bize def‘ ve teslîm biz dahi asâleten ve vekâleten ahz u kabz ve teslîm eyledik min ba‘d meblağ-ı mezbûr beş yük kırk altı bin akçeden mezbûrun yedinde ve zimmetinde bir akçe ve bir habbe bâkī kalmadı dediklerinde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-âşir min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: İbrahim b. Musa, İbrahim Çelebi b. Ahmed, Ali b. Bâli, Mehmed b. İdris.