İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 237 Hüküm no: 146 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeliha Hanım bt. Ali’nin vasiyeti ve Hacı Ali Bey b. Ömer’i vasi ataması Husûs ile vasiyyet Husûs-ı âti’l-beyânın mahallinde ketb ü tahrîri için cânib-i şerî‘at-ı garrâdan bi’l-iltimâs me’zûnen irsâl olunan Kâtib es-Seyyid Hafız Osman Nuri Efendi mahmiye-i İstanbul’da Yeni Bahçe kurbünde Defterdâr Ahmed Çelebi mahallesinde vâki‘ Halıcıbaşı el-Hâc Mehmed Ağa merhûmun zevce-i menkûha-i metrûkesi Zeliha Hanım bt. Ali’nin sâkine olduğu konağına varıp zeyl-i kitâbda muharrerü’l-esâmî müslimîn huzûrlarında akd-i meclis-i şer‘-i Nebevî etdikde zâtı müslimûn-ı merkūmûn ta‘rîfleriyle mu‘arrefe olan mûmâ-ileyhâ Zeliha Hanım meclis-i ma‘kūd-ı mezkûrde zikri âtî vesâyâ-i mu‘ayyene ve gayr-i mu‘ayyenesini tenfîze vasiyy-i muhtâr nasb ve ihtiyâr eylediği işbu bâ‘isü’l-kitâb Bezzâzistanî el-Hâc Ali Bey b. Ömer muvâcehesinde Rikâb-ı hümâyûn-ı Şâhâne kapıcıbaşılarından rif‘atlü el-Hâc Ali Ağa b. Mehmed hâzır olduğu hâlde ben bi-emri’llâhi te‘âlâ vefât eylediğimde cemî‘ terekem ve zimem-i nâsda olan hukūku mahz u kabz olunup ben zât-ı zevc olmamamla evvelâ sünnet-i seniyye-i Nebevîyye üzere techîz ve tekfîn ve levâzım-ı defnim görülüp duyûn-ı müsbetem zuhûr eder ise ba‘de’l-edâ bâkī kalan terekemin sülüsü ifrâz ve sülüs-i mezkûrdan üç bin guruş ile iskāt-ı salât-ı fâ’item ve kefâret-i savm ve yemin ve üzerime vâcibe olup kalmış olan zekâtım ve nuzûrât-ı sâirem için ber-nehc -i şer‘î ba‘de’d-devr fukarâ-i müslimîne tasadduk oluna ve vefâtım gecesi on nefer huffâz-ı kirâm celb ve da‘vet olunup bir hatm-i şerîf tilâvet etdirilip hâsıl olan sevâbını benim ve ebeveynim ve sâir mü‘minîn [ve] mü’minât ervâhımıza ba‘de-l ihdâ sülüs-i mezkûrdan beş yüz guruş huffâz-ı mûma-ileyhime alâ vechi’s-sıla i‘tâ oluna ve yine sülüs-i mezkûrdan beş yüz guruş harç ve sarfla leyle-i mezkûrda tabh-ı helva olunup huzzâr-ı meclis ve fukarâ-i müslimîn it‘âm oluna ve yine sülüs-i mezkûrdan üç bin guruş harc u sarfla ta‘mîr-i kabrim görüle ve yine sülüs-i mezkûrdan beş bin guruş câriye-i mu‘takam işbu hâzırati bi’l-meclis Zenciye Ferah Kalfa bt. Abdullah’a alâ tarîki’s-sıla verile ve yine sülüs-i mezkûrdan olmak üzere beş bin guruş li-ebeveyn hemşirem Fâtıma’nın kerimesi Nesibe Hanım bt. İbiş Efendi’ye bi-tarîki’s-sıla verile ve yine sülüs-i mezkûrdan beş bin guruş hizmetimde müstahdime işbu hâzırat-ı bi’l-meclis Adile Hanım bt. Abdullah’a bi-tarîki’s-sıla verile ve müteddiyin ve müstakîmü’l-etvar bir kimesne benim için hacc-ı şerîfe azimet edip sülüs-i mezkûrdan on bin guruş bedel-i hac verile ve yine sülüs-i mezkûrdan beş bin guruş vakf-ı sahîh-i mü‘ebbed ve habs-i sarîh-i muhalled ile vakf olunup meblağ-ı mezkûr bâ-yed-i mütevelli alâ vechi’l-helâl i‘mâl ve istirbâh ile hâsıl olan gallesi ba‘de’l-kabz beher sene Ramazan-ı mağfiret-unvânda mahalle-i mezbûre civârında vâki‘ Divitdâr Mehmed Efendi Câmi’-i şerîfinde ale’s-seher mukābele-i şerîf tilâvet olunup galle-i merkūmenin dört yüz guruşu hatimhân olan efendiye ve yetmiş beş guruşu Câmi‘-i şerîf-i mezkûrun imâmı efendiye ve yetmiş guruşu müezzin efendiye verile ve yüz guruşu ile balmûmu iştirâ ve Câmi‘-i şerîf-i mezkûrde ikād oluna ve yine sülüs-i mezkûrdan iki bin guruş ifrâz ile meblağ-ı mezkûr vakf-ı sahîh-i şer‘î ve habs-i sarîh-i mer‘î ile vakf ile vakf ve habs olunup bâ-yed-i mütevelli rehn-i kavî ve kefîl-i melî ile istirbâh olunarak hâsıl olan gallesi ile mahalle-i mezkûre câmi‘-i şerîf ve medrese-i münîfesi helâlarının lâzım gelen mahalleri ta‘mîr oluna ve yine sülüs-i mezkûrdan kezâlik iki bin guruş vakf ve habs ve bâ-yed-i mütevelli istirbâh olunup hâsıl olan gallesi mahmiye-i merkūmede Ebû’l-feth Sultan Mehmed Hân aleyhi-rahmetü ve’l-gufrân hazretleri Câmi‘-i şerîfi müezzinlerine alâ vechi’s-sıla seviyyen i‘tâ olunup onlar dahi evkât-ı hamsede benim ruhuma birer fatiha-i şerîfe i‘tâ edeler ve yine sülüs-i mezkûrdan iki bin beş yüz guruş ile beş kıt‘a kelâm-ı kadîm iştirâ olunup müstahikkînden birer kimesneye i‘tâ oluna ve yine sülüs-i mezkûrdan altı bin guruş vakf ve habs ve bâ-yed-i mütevelli istirbâh olunup hâsıl olan gallesi ile mahalle-i mezkûre civârında Simkeş çeşmesi ta‘mîr ve termîm oluna ve sülüs-i mezkûrdan beherine beşer yüz guruşdan cem‘an beş bin guruş ile gurebâdan on nefer yetim ve yetimeye ilbâs olunarak bed’-i hoca oluna ve yine sülüs-i mezkûrdan yirmi beş bin guruş vasiyy-i muhtârım olan kimesne nefsi için ahz u kabz eyleye ve yine sülüs-i mezkûrdan yedi bin beş yüz guruş hâzır-ı mezbûr el-Hâc Ali Ağa’ya i‘tâ oluna ve yine sülüs-i mezkûrdan her ne fazla kalır ise fazla-i merkūme vasiyy-i muhtârım re’yile vücûh-ı bir ve hayra harc u sarf oluna ve vesâyet-i mezkûreme vasim olan kimesne vakf-ı mezkûruma dahi mütevelli olup bâ-emrillâhi te‘âlâ vefât etdikde ahâli-i mahallenin intihâbıyla müstakīm ve mütedeyyin bir kimesne bâ-ma‘rifet-i şer‘-i şerîf mütevelli ola deyu vasiyyet ve tenfîzine mûmâ-ileyh el-Hâc Ali Bey’i vasiyy-i muhtâr ve üzerine hâzır-ı mûmâ-ileyh el-Hâc Ali Ağa’yı nâzır nasb ve ihtiyâr eylediğimde onlar dahi ber-vech-i muharrer vesâyet ve nezâret-i merkūmeleri kabûl ve hizmet-i lâzimelerini kemâ-yenbagī edâya ta‘ahhüd ve iltizâm eylediler dedikde gıbbe’t-tasdîki’ş-şer‘î vâk‘i hâli kâtib-i mûmâ-ileyh mahallinde ketb ü tahrîr ve ma‘ân meb‘ûs ümenâ-i şer‘le meclis-i şer‘e gelip alâ vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fî 17 Zilhicce sene 1278 Şuhûdü’l-hâl: Beytü’l-mâl kassâmı ketebesinden Numan Efendi, ve tüccârdan Yusuf Ağa b. el-Hâc Ramazan, ve Mustafa Ağa b. Mehmed, Bezzâzistanî Haydar Ağa b. Abdullah, ve muhtâr-ı sânîsi es-Seyyid Mehmed Aziz Efendi b. es-Seyyid Ali, ve muhtâr-ı evveli Ahmed Nazif Efendi b. es-Seyyid Mehmed Raşid, mahelle-i merkūme imâmı Hafız Ömer Efendi b. Abdullah, ve tüccârdan el-Hâc Mehmed Efendi b. el-Hâc Ahmed, ve Muhzır Ahmed Ağa b. ( ), ve Muhzır İbrahim Ağa b. ( ), ve gayruhum