İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 239 Hüküm no: 147 Orijinal metin no: [31b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İmâmeci esnâfından Numan Cemaleddin Ağa b. Hamdullah’ın imâmeci dükkânını aynı Hacı Mehmed Efendi’ye satması İmâmeci dükkânı mübâya‘ası 20000 guruş Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda olan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen imâmeci esnâfından Numan Cemaleddin Ağa b. Hamdullah meclis-i şer‘-i şerîf-i enverde esnâf-ı mezkûre kethüdâsı bâ‘isü’l-kitâb el-Hâc Mehmed Efendi b. el-Hâc Hasan mahzarında esnâf-ı merkūme kâtibi Mehmed Efendi b. Mustafa hâzır olduğu hâlde ikrâr-ı tâm ve takrîr-i kelâm edip mahmiye-i İstanbul’da Uzun Çarşı’da vâki‘ bir tarafdan el-Hâc Seyyid Efendi dükkânı ve bir tarafdan Hâfız Ahmed Efendi dükkânı ve bir tarafdan bahçe ve taraf-ı râbi‘i tarîk-i âm ile mahdûd merhûm Emin Ağa Vakfı müsakkafâtından Hâce Zeliha Hanım ve Nefise Hanım’ın bi’l-icâreteyn taht-ı tasarruflarında olan şehriye beş guruş kirâlı bir bâb imâmeci dükkânı derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin bin iki yüz yetmiş dört senesi şehr-i Rebî‘ülâhir gurresi tarihiyle müverrah ve ol târihde Rumeli kādıaskeri olan Reisi’l-ulemâ semâhatlü es-Seyyid Mustafa İzzet Efendi hazretlerinin hatemini hâvî işbu bir kıt‘a i‘lâm-ı şer‘î mantûkunca yedimde müstakillen mülk ve hakkım olan âlât-ı lâzime-i ma‘lûmeyi tarafeynden îcâb ve kabûlü hâvî şurût-ı müfside [ve] muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr el-Hâc Mehmed Efendi’ye yirmi bin guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm yirmi bin guruşu bana tamamen def‘ u teslîm ben dahi yedinden bi’t-tamâm ve’l-kemâl ahz u kabz eyledim ba‘de’l-yevm âlât-ı gedik-i mezkûrde benim aslâ ve kat‘â alâka ve medhalim kalmayıp mezbûr el-Hâc Mehmed Efendi’nin mülk-i müşterâsı ve hakk-ı sırfı olmağla mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik dedikde gıbbe. Fî 13 Rebî‘ülâhir sene 1279 Şuhûdü’l-hâl: Muhzır Mustafa Ağa b. ( ), Muhzır Süleyman Ağa b. ( ), Tahtacı el-Hâc Yusuf Ağa b. ( ), ve gayruhum