İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 240 Hüküm no: 148 Orijinal metin no: [31b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid İbrahim Halil Efendi’nin annesi Necibe Hanım’dan kendisine miras kalan uncu değirmeninin mülkü olduğuna dair hüccet talebi Uncu değirmeni ihbârı Kezâlik mahmiye-i İstanbul hısnı ebvâbından Cibali kapısı dâhilinde Üskübî mahallesinde sâkine iken bundan mukaddem vefât eden Necibe Hanım bt. Ali b. Abdullah’ın sadrî kebîr oğlu ve hasren vârisi olduğu lede’ş-şer‘i’l-enver zâhir ve mütehakkık olan bâ‘isü’l-kitâb es-Seyyid İbrahim Halil Efendi b. es-Seyyid Mehmed Salih meclis-i şer‘-i şerîf-i enverde ekmekçi ve uncu esnâfının kethüdâsı İbrahim Ağa b. Ahmed ile mazbûtü’l-esâmî nizâm ustaları taraflarından mürsel vekîlleri yiğitbaşı es-Seyyid İsmail Efendi b. es-Seyyid Mehmed Emin ve esnâf-ı merkūme salıcılarından Ahmed Ağa b. Mehmed ve el-Hâc Ahmed Ağa b. Hüseyin hâzır oldukları hâlde takrîr-i kelâm ve ta‘bîr ani’l-merâm edip hısn-ı mezkûr ebvâbından Kapan-ı Dakîk kapısı dâhilinde Papasoğlu mahallesinde kâin bir tarafdan Fodula kâtibi Mehmed Efendi b. Hüseyin uhdesinde olan arsa ve bir tarafdan Yani değirmeni ve tarafeyni tarîk-i âm ile mahdûd merhûme Kerime Hatun Vakfı müsakkafâtından mûmâ-ileyh Mehmed Efendi’nin bâ-temessük-i mütevelli bi’l-icâreteyn taht-ı tasarrufunda olan şehriye kırk guruş kirâlı çarhıfelek değirmeni demekle arîf dört horoslu bir bâb uncu değirmeni derûnunda mevcûde beyne’l-esnâf gedik ta‘bîr olunur on altı re’s bârgir ve onlara tâbi‘ sâir âlât-ı lâzime-i ma‘lûmenin iki re’s bârgir ve onlara isâbet eden âlât-ı sâiresi âharın ve sekiz re’s ve onlara îcâb eden âlât-ı sâiresi mûmâ-ileyh Mehmed Efendi’nin yedlerinde mülkleri olup mâ‘adâ altı re’s bârgir ve onlara iktizâ eden âlât-ı sâiresi dahi yedimde olup bin iki yüz yetmiş bir senesi Şa‘banü’l-mu‘azzamı’nın on yedinci günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan Ahmed Şükrü Efendi merhûmun imzâ ve hatemini hâviye işbu bir kıt‘a hüccet-i şer‘iyye ve mahalle-i mezkûre imâm ve muhtârânı ile kethüdâ-yı mûmâ-ileyhin takdîm eyledikleri bir kıt‘a ilmühaber mantûklarınca vâlide-i müteveffât-ı mezbûre Necibe Hanım’ın hayâtında ile’l-vefât yedinde mülkü ve ba‘de vefâtihâ ancak bana mevrûs olup lâkin intikāli hâvi yedimde sened-i şer‘î olmamağla hakīkat-i hâl husûs-ı mezkûre vukūf-ı tâmları olan kimesnelerden istihbâr ve suâl olunup haberleri tahrîr ve imlâ ile sâlifü’l-beyân altı re’s bârgir ve onlara iktizâ eden âlât-ı sâire ber-minvâl-i muharrer mülküm olduğunu nâtıka kıbel-i şer‘den intikāli hâvî yedime bir kıt‘a hüccet-i şer‘iyye i‘tâ buyurulmak murâdımdır deyu istid‘â etdikde hâl mezbûr es-Seyyid Halil Efendi’nin bâlâda bast ve beyân eylediği minvâl üzere olduğunu husûs-ı mezkûre vukūf-ı tâmları olan esnâf-ı hâzırûn-ı mezbûrûndan her biri alâ tarîki’ş-şehâde haber vermeleriyle vâki‘-i hâl hıfzan li’l-makāl işbu vesîka-i enîka ketb olundu. Fî 26 Rebî‘ülâhir sene 1279 Şuhûdü’l-hâl: Muhzır el-Hâc Yusuf Ağa b. ( ), Muhzır Mustafa Ağa b. ( ), Muhzır Süleyman Ağa b. ( ), Muhzır Şakir Ağa b. ( ), ve gayruhum