İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 241 Hüküm no: 149 Orijinal metin no: [31b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Hüseyin Ağa’dan miras kalan berber dükkânı ve mirasçıların hisselerini birbirlerine satmaları Berber dükkânı mübâya‘ası 3083 guruş Kezâlik mahrûse-i Galata’da Yolcuzâde mahallesinde sâkine zâtı ta‘rîf-i şer‘î ile mu‘arrefe olan Emine Hanım bt. el-Hâc İbrahim sadrî kebîr oğlu es-Seyyid el-Hâc Ahmed Ağa b. el-müteveffâ es-Seyyid el-Hâc Hüseyin hâzır olduğu hâlde meclis-i şer‘-i hatîrde hâzır-ı mezbûrun li-ebeveyn er ve kız karındaşları bâ‘iseyi’l-kitâb zâtı ta‘rîf-i şer‘î ile mu‘arrefe olan Şerife Hadice Refi‘a Hanım ve es-Seyyid el-Hâc Hasan Ağa mahzarlarında mahrûse-i mezkûre ve tevâbi‘inde vâki‘ berber esnâfının kethüdâsı Ahmed Zemcî Ağa b. Mustafa tarafından mürsel esnâf-ı merkūme çavuşu Mehmed Hurşid Ağa b. Abdullah hâzır olduğu hâlde ikrâr-ı tâm ve takrîr-i kelâm edip mahrûse-i mezkûre hâricinde Yelkencileriçi nâm mahalde kâin bir taraftan halatcı dükkânı ve bir tarafdan kale cidârı ve bir tarafdan mukaddemâ arsa ve hâlâ Aleksi’nin demirci dükkânı ve taraf-ı râbi‘i tarîk-i âm ile mahdûd Ayasofya-i Kebîr Câmi‘-i şerîfi evkāfı müsakkafâtından müteveffâ-yı mezbûr el-Hâc Hüseyin Ağa’dan müntakil evlâdı mezbûrûn es-Seyyid el-Hâc Ahmed Ağa ve es-Seyyid el-Hâc Hasan Ağa ve Şerife Hadice Refi‘a Hanım’ın taht-ı tasarruflarında olan şehriye beş guruş kirâlı bir bâb berber dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme kırk sehm i‘tibârıyla beş sehm hisse-i şâyi‘ası benim ve on dört sehm hisse-i şâyi‘ası hâzır-ı mezbûr es-Seyyid el-Hâc Ahmed Ağa’nın ve diğer on dört sehm hisse-i şâyi‘ası mezbûr es-Seyyid el-Hâc Hasan Ağa’nın ve yedi sehm hisse-i şâyi‘ası dahi mezbûre Şerife Hadice Refi‘a Hanım’ın şehr-i sâbık Saferi’l-hayrının yirmi dokuzuncu günü târihiyle müverraha İstanbul Mahkemesi’nden [verilen] işbu bir kıt‘a hüccet-i şer‘iyye ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca zevcim müteveffâ-yı mezbûrdan mevrûs ve yedimizde mülkümüz olmağla [ben] akd-i âti’z-zikrin sudûruna değin âlât-ı gedik-i mezkûrdan ber-minvâl-i muharrer mâlike olduğum beş sehm hisse-i şâyi‘amı bi-safkatin vâhidetin iki bin dokuz yüz on altı buçuk guruşa mezbûre Şerife Hadice Refia Hanım’a ve hâzır-ı mezbûr es-Seyyid el-Hâc Ahmed Ağa dahi kezâlik mâlik olduğu on dört sehm hisse-i şâyi‘a-i mezkûresinin sekiz sehm hisse-i şâyi‘asını bi-safkatin vâhidetin beş bin seksen üç guruşa mezbûre Şerife Hadice Refi‘a Hanım’a ve bâkī altı sehm hisse-i şâyi‘asını dahi kezâlik bi-safkatin vâhidetin üç bin seksen üç guruşa mezbûr es-Seyyid el-Hâc Hasan Ağa’ya tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile bey‘ ve temlîk ve vech-i lâyıkı üzere teslîm eylediğimizde [32a] onlar dahi ber-vech-i muharrer iştirâ ve temellük ve tesellüm ve kabz u kabûl eylediklerinden sonra semenleri olan cem‘an on bir bin seksen iki buçuk guruşun mukābelesine müte‘allika da‘vâdan ben hâzır-ı mezbûr es-Seyyid el-Hâc Ahmed Ağa ile ma‘an mezbûrât Şerife Hadice Refi‘a Hanım ve es-Seyyid el-Hâc Hasan Ağa’nın zimmetlerini ibrâ-yı sahîh-i şer‘î ile kabûllerini hâvî ibrâ vü ıskāt eyledik ba‘de’l-yevm âlât-ı gedik-i mezkûrun ber i‘tibâr-ı merkūm beş sehm hisse-i şâyi‘asında benim ve on dört sehm hisse-i şâyi‘asında hâzır-ı mezbûr es-Seyyid el-Hâc Ahmed Ağa’nın aslâ ve kat‘â alâka ve medhalimiz kalmayıp âlât-ı gedik-i mezkûrun yedi sehm hisse-i şâyi‘ası mukaddemâ irsen ve on üç sehm hisse-i şâyi‘ası bu def‘a şirâen ki cem‘an yirmi sehm hisse-i şâyi‘ası mezbûre Şerife Hadice Refi‘a Hanım’ın ve on dört sehm hisse-i şâyi‘ası mukaddemâ irsen altı sehm hisse-i şâyi‘ası bu def‘a şirâen ki cem‘an yirmi sehm hisse-i şâyi‘ası mezbûr es-Seyyid el-Hâc Hasan Ağa’nın mülk-i mahz ve hakk-ı sırfları olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi Gurre-i Rebî‘ülevvel sene 1279 Şuhûdü’l-hâl: Esnâf-ı merkūmeden Hasan Ragıb Ağa b. Mustafa, Muhzır Süleyman Ağa b. ( ), Muhzır Feyzullah Ağa b. ( ), Muhzır Osman Ağa b. ( ), Tahtacı el-Hâc Mehmed Salih Ağab. ( ), ve gayruhum