İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 243 Hüküm no: 150 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid İbrahim Halil Efendi’nin uncu değirmeni hisselerini Yeni Saray fodula kâtibi Mehmed Efendi’ye satması Uncu değirmeni mübâya‘ası 10000 guruş Kezâlik mahmiye-i İstanbul hısnı ebvâbından Cibali kapısı dâhilinde Üskübî mahallesinde sâkin es-Seyyid İbrahim Halil Efendi b. es-Seyyid Mehmed Salih meclis-i şer‘-i şerîf-i enverde Saray-ı Cedîd-i Sultanî Fodula kâtibi Mehmed Efendi b. Hüseyin tarafından husûs-ı âti’l-beyânda tasdîka vekîl-i şer‘îsi Hüseyin Hüsnü Bey b. Süleyman mahzarında ekmekçi ve uncu esnâfının kethüdâsı İbrahim Ağa b. Ahmed ile mazbûtü’l-esâmî nizâm ustaları taraflarından mürsel vekîlleri Yiğitbaşı es-Seyyid İsmail Efendi b. es-Seyyid Mehmed Emin hâzır olduğu hâlde ikrâr-ı tâm ve takrîr-i kelâm edip hısn-ı mezkûr ebvâbından Kapan-ı Dakîk kapısı dâhilinde Papasoğlu mahallesinde vâk‘i bir tarafdan müvekkil-i mûmâ-ileyhin uhdesinde olan arsa ve bir tarafdan Yani değirmeni ve tarafeyni tarîk-i âm ile mahdûd merhûme Kerime Hatun Vakfı müsakkafâtından müvekkil-i mûmâ-ileyh Mehmed Efendi’nin bâ-temessük-i mütevelli bi’l-icâreteyn taht-ı tasarrufunda olan şehriye kırk guruş kirâlı Çarhıfelek değirmeni demekle arîf dört horoslu bir bâb uncu değirmeni derûnunda mevcûde beyne’l-esnâf gedik ta‘bîr olunur on altı re’s bârgir ve onlara tâbi‘ sâir âlât-ı lâzime-i ma‘lûmenin iki re’s bârgir ve onlara isâbet eden âlât-ı sâiresi âharın ve sekiz re’s bârgir ve onlara îcâb eden âlât-ı sâiresi müvekkil-i mûmâ-ileyh yedlerinde mülkleri olup mâ‘adâ altı re’s bârgir ve onlara iktizâ eden âlât-ı sâiresi akd-i âti’z-zikrin sudûruna değin işbu şehr-i hâlin yirmi altıncı günü târihiyle müverraha İstanbul Mahkemesi’nden verilen bir kıt‘a hüccet-i şer‘iyye ve mahalle-i mezkûre imâm ve muhtârânı ile kethüdâ-yı mûmâ-ileyhin takdîm eyledikleri bir kıt‘a ilmühaber mantûklarınca yedimde mülk ve hakkım olmağla ben ber-minvâl-i muharrer mâlik olduğum sâlifü’l-beyân altı re’s bârgir ve onlara iktizâ eden âlât-ı sâireyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ müvekkil-i mûmâ-ileyh Mehmed Efendi’ye on bin guruşa bey‘ ve temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semen-i olan meblağ-ı merkūm on bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm sâlifü’l-beyân altı re’s bârgir ve onlara iktizâ eden âlât-ı sâirede benim aslâ ve kat‘â alâka ve medhalim kalmayıp âlât-ı gedik-i mezkûrun sekiz re’s bârgir ve onlara îcâb eden âlât-ı sâiresi mukaddemâ ve altı re’s bârgir ve onlara iktizâ eden âlât-ı sâiresi bu def‘a ki cem‘an on dört re’s bârgir ve onlara îcâb eden âlât-ı sâire müvekkil-i mûmâ-ileyh Mehmed Efendi’nin mülk-i mahz ve hakk-ı sırfı olmuşdur dedikde gıbbe. Fî 27 Rebî‘ülâhir sene 1279 Şuhûdü’l-hâl: Muhzır Mehmed Ağa b. ( ), Muhzır Süleyman Ağa b. ( ), Muhzır el-Hâc Yusuf Ağa b. ( ), Tahtacı el-Hâc Salih Ağab. ( ), ve gayruhum