İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 244 Hüküm no: 151 Orijinal metin no: [32a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Hüseyin’den miras kalan berber dükkânının kendi mülkleri olduğuna dair mirasçılarının hüccet talebi Berber dükkânı ihbârı Kezâlik mahrûse-i Galata’da Yolcuzâde mahallesinde sâkin iken bundan mukaddem vefât eden Salcı es-Seyyid el-Hâc Hüseyin Ağa b. el-Hâc Ahmed Ağa b. Abdullah’ın verâseti zevce-i menkûha-i metrûkesi Emine Hanım bt. el-Hâc İbrahim ile sulbî kebîr oğulları es-Seyyid el-Hâc Ahmed Ağa ve es-Seyyid el-Hâc Hasan Ağa ve sulbiye kebîre kızı Şerife Hadice Refi‘a Hanım’a münhasıra ve tashîh-i mesele-i mirâsları kırk sehimden olup sihâm-ı mezkûreden beş sehmi mezbûre Emine Hanım’a ve on dörder sehimden yirmi sekiz sehmi mezbûrâta ve yedi sehmi dahi bint-i mezbûre Şerife Hadice Refi‘a Hanım’a isâbeti lede’ş-şer‘i’l-enver zâhir ve mütehakkık oldukdan sonra zâtı ta‘rîf-i şer‘î ile mu‘arrefe olan mezbûre Emine Hanım mezbûrân es-Seyyid el-Hâc Ahmed Ağa ve es-Seyyid el-Hâc Hasan Ağa ve kezâlik zâtı ta‘rîf-i şer‘î ile mu‘arrefe olan mezbûre Şerife Hadice Refi‘a Hanım hâzır oldukları hâlde meclis-i şer‘-i şerîf-i enverde mahrûse-i mezkûre ve tevâbi‘inde vâki‘ berber esnâfının kethüdâsı es-Seyyid Ahmed Zemcî Ağa b. el-Hâc Mustafa tarafından mürsel esnâf-ı merkūme çavuşu Mehmed Hurşid Ağa b. Abdullah ve esnâfından Hasan Ragıb b. Mustafa hâzır oldukları hâlde ikrâr-ı tâm ve takrîr-i kelâm edip mahrûse-i mezkûre hâricinde Yelkencileriçi nâm mahalde kâin bir taraftan halatcı dükkânı ve bir tarafdan kale cidârı ve bir tarafdan mukaddemâ arsa ve hâlâ Aleksi’nin demirci dükkânı ve taraf-ı râbi‘i tarîk-i âm ile mahdûd Ayasofya-i Kebîr Câmi‘-i şerîfi evkāfı müsakkafâtından müteveffâ-yı mezbûrdan müntakil evlâdı hâzırûn-ı merkūmûnun taht-ı tasarruflarında olan şehriye beş guruş kirâlı bir bâb berber dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme bin iki yüz kırk altı senesi Muharremü’l-haramının on dokuzuncu günü târihiyle müverrah bir kıt‘a sûret ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca müteveffâ-yı mezbûr es-Seyyid el-Hâc Hüseyin Ağa hayâtında ile’l-vefât yedinde mülkü ve ba‘de vefâtihî benimle hâzırûn-ı mezbûrûn es-Seyyid el-Hâc Ahmed Ağa ve es-Seyyid el-Hâc Hasan Ağa ve Şerife Hadice Refi‘a Hanım’a ber tashîh-i mezkûr mevrûs olup lâkin intikāli hâvî yedimizde sened-i şer‘î olmamağla hakīkat-i hâl husûs-ı mezkûre vukūf-ı tâmları olan kimesnelerden istihbâr ve suâl olunup haberleri tahrîr ve imlâ ile âlât-ı gedik-i mezkûr ber-minvâl-i muharrer benimle hâzırûn-ı mezbûrûn es-Seyyid el-Hâc Ahmed Ağa ve es-Seyyid el-Hâc Hasan Ağa ve Şerife Hadice Refi‘a Hanım’ın mülkümüz olduğunu nâtıka kıbel-i şer‘den bir kıt‘a hüccet-i şer‘iyye yedimize i‘tâ buyurulmak murâdımızdır deyu hâzırûn-ı mezbûrûn ile ma‘an istid‘â etdiklerinde hâl mezbûrûnun bâlâda bast ve beyân eyledikleri minvâl üzere olduğunu husûs-ı mezkûre vukūf-ı tâmları olan hâzırân ile sâir cerîdede mazbûtü’l-esâmî müslimînden her biri alâ tarîki’ş-şehâde haber vermeleriyle vâki‘-i hâl hıfzan li’l-makāl işbu vesîka-i enîka ketb ü imlâ olundu. Fî 29 Safer sene 1279 Şuhûdü’l-hâl: Muhzır Mehmed Ağa b. ( ), Muhzır Osman Ağa b. ( ), Muhzır el-Hâc Yusuf Ağa b. ( ), Muhzır İsmail Ağa b. ( ), ve gayruhum