İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 245 Hüküm no: 152 Orijinal metin no: [32b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hazar v. Nahabet’in, tütün tüccârı Dimitri v. Anaştaş’tan aldığı borç karşılığında iki uncu değirmenindeki hisselerini rehin vermesi İmhâl Teba‘a-i Devlet-i aliyye’nin Ermeni milletinden ve uncu esnâfından Hazar v. Nahabet meclis-i şer‘-i şerîf-i hatîrde teba‘a-i Devlet-i aliyye’nin Latin tâifesinden olduğu bâ-ilmühaber mütehakkık olan duhân tüccârından bâ‘isü’r-rakīm Dimitri v. Anaştaş muvâcehesinde ekmekçi esnâfının kethüdâsı İbrahim Ağa b. Ahmed ile sâir mazbûtü’l-esâmî nizâm ustaları taraflarından mürsel vekilleri Yiğitbaşı es-Seyyid İsmail Efendi b. es-Seyyid Mehmed Emin hâzır olduğu hâlde ikrâr-ı tâm ve takrîr-i kelâm edip ben merkūm Dimitri’nin mâlından zikri âtî bilâ-fâiz istidâne ve kabz edeceğim meblağ mukābelesinde mahmiye-i İstanbul’da Laleli Çeşme kurbünde Koska nâm mahalde boyacı dükkânı ittisâlinde kâin ma‘lûmu’l-hudûd bir bâb françalacı fırını derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla altmış sehm hisse-i şâyi‘ası âharların yedlerinde mülkleri olup mâ‘adâ altmış sehm hisse-i şâyi‘ası dahi benim bâ-hüccet-i şer‘iyye yedimde mülk ve hakkım olmağla ben âlât-ı gedik-i mezkûrdan ber-minvâl-i muharrer mâlik olduğum altmış sehm hisse-i şâyi‘a-i mezkûreyi ve yine mahmiye-i mezkûre hısnı ebvâbından Balat kapısı hâricinde Balıkçılariçi nâm mahalde kâin ma‘lûmu’l-hudûd Balıkçılariçi değirmeni demekle arîf iki horoslu bir bâb uncu değirmeni derûnunda mevcûde beyne’l-esnâf gedik ta‘bîr olunur sekiz re’s bârgir ve onlara tâbi‘ sâir âlât-ı lâzime-i ma‘lûmenin yedi re’s bârgir ve onlara isâbet eden âlât-ı sâiresi âharların yedlerinde mülkleri olup mâ‘adâ bir re’s bârgir ve ona îcâb eden âlât-ı sâiresi dahi kezâlik yedimde bâ-hüccet-i şer‘iyye mülküm olmağla ben âlât-ı gedik-i mezkûrdan ber-minvâl-i muharrer mâlik olduğum sâlifü’l-beyân bir re’s bârgir ve ona îcâb eden âlât-ı sâireyi dahi bâ-izn-i şürekâ rehn vaz‘ ve merkūm Dimitri’ye teslîm eylediğimde ol dahi ber-vech-i muharrer irtihân ve tesellüm ve kabz u kabûl etdikden sonra bana mâlından altı yüz altmış iki buçuk aded tâm yüzlük mecîdiye altunu idâne ve teslîm ben dahi bilâ-fâiz yedinden istidâne ve kabz ve umûruma sarfla istihlâk edip zikr olunan altı yüz altmış iki buçuk aded tâm yüzlük mecîdiye altınu zimmetimde cihet-i mezkûreden merkūm Dimitri’ye sahîhan deyn olup merkūm Dimitri dahi zikr olunan altı yüz altmış iki buçuk aded tâm mecîdiye altınunun üç yüz otuz bir aded tam yüzlük mecîdiye altınını işbu târih-i rakīmden bir sene tamâmında bâkī üç yüz otuz bir buçuk aded tam yüzlük mecîdiye altınını dahi târih-i mezkûrdan bir buçuk sene murûrunda kendüye edâ ve teslîm etmek üzere beni rızâsıyla imhâl ve te’hîr eylediğinde ben dahi kabûl ve ber-vech-i meşrûh edâ-i deyne ta‘ahhüd eylediğimden sonra eğer ben zikr olunan altı yüz altmış iki buçuk aded tâm mecîdiye altınını müddet-i mezkûre hitâmında merkūm Dimitri’ye edâ ile fekk-i rehn edemez isem zikr olunan altmış sehm hisse-i şâyi‘a-i âlât-ı gedik-i mezkûr ile sâlifü’l-beyân bir re’s bârgir ve ona îcâb eden âlât-ı sâireyi semen-i misilleriyle âhara bey‘e ve semenlerini kabza ve makbûzundan deyn-i mezkûru istifâya ve fazla kalır ise fazlasını bana def‘ u teslîme ve husûs-ı mezkûr mütevakkıf olduğu umûrun küllîsine tarafımdan küllemâ azeltüke fe-ente vekîli mefhûmu üzere azil ve in‘izâlden masûne ve akd-i rehnde meşrûta vekâlet-i devriye-i sahîha-i şer‘iyye ile merkūm Dimitri’yi vekîl ve nâib-i menâb nasb ve ta‘yîn eylediğimde ol dahi ber-vech-i muharrer vekâlet-i mezkûreyi kabûl ve merâsimini vaktinde ve kemâ-yenbagī edâya ta‘ahhüd ve iltizâm eyledi dedikde gıbbe’t-tasdîki’ş-şer‘î mâ-vaka‘a bi’t-taleb. Fî 24 Rebî‘ülâhir sene 1279 Şuhûdü’l-hâl: Mehmed Emin Efendi b. el-Hâc Halil, Esnâf-ı mezkûre nizâm ustalarından Hasköylü Yakub Bey, Tütüncü esnâfı yiğitbaşısı Ahmed Ağa b. Ali, Muhzır Süleyman Ağa b. ( ), Muhzırel-Hâc Salih Ağa b. ( ), ve gayruhum