İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 246 Hüküm no: 153 Orijinal metin no: [32b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hayriye tüccârı Haleblizâde Ahmed Efendi’nin Valide Hânı sarrâflarından Kayserili Frenkoğlu Agop v. Kigork’tan aldığı borç karşılığında ekmek fırını ve yanmış değirmendeki hisselerini rehin vermesi Habbâz fırını rehni Mahmiye-i İstanbul’da Sarıgez kurbünde İskender Paşa mahallesinde sâkin Hayriye tüccârından Haleblizâde Ahmed Efendi b. Süleyman meclis-i şer‘-i şerîf-i enverde mahmiye-i mezkûrede vâki‘ Valide Hanı sarrâfânından teba‘a-i Devlet-i aliyye’nin Ermeni milletinden bâ‘isü’r-rakīm Kayseriyeli Frenkoğlu Agop v. Kigork muvâcehesinde ekmekçi ve uncu esnâfının kethüdâsı İbrahim Ağa b. Ahmed ile sâir mazbûtü’l-esâmî nizâm ustaları taraflarından mürsel vekilleri Yiğitbaşı es-Seyyid İsmail Efendi b. es-Seyyid Mehmed Emin hâzır olduğu hâlde ikrâr-ı tâm ve takrîr-i kelâm edip mahmiye-i mezkûrede Langa Yenikapısı dâhilinde Kâtib Kasım mahallesinde Dörtyolağzı nâm mahalde köşede vâki‘ bir tarafdan Kasâb Mehmed Ağa’nın kasâb dükkânı ve bir tarafdan Bakkal Yuvan’ın bakkal dükkânı ve tarafeyni tarîk-i âm ile mahdûd merhûme Haseki Sultan Vakfı musakkafâtından benimle gāib ani’l-meclis Muslizâde Mehmed Efendi b. İsmail’in taht-ı tasarrufumuzda olan şehriye otuz dokuz guruş kirâlı bir bâb habbâz fırını ve ona merbût beş horoslu ekmekçi ve bir horosu uncu ki cem‘an altı horoslu bir bâb mühterik değirmen derûnunda müstahlas ve mevcûd beyne’l-esnâf gedik ta‘bîr olunur yirmi re’s bârgir ekmekçi ve dört re’s bârgir uncu ki cem‘an yirmi dört re’s bârgir ve onlara tâbi‘ sâir âlât-ı lâzime-i ma‘lûmenin on iki re’s bârgir ve onlara isâbet eden âlât-ı sâiresi gāib-i mezbûr Mehmed Efendi’nin yedinde mülkü olup mâ‘adâ âhar on iki re’s bârgir ve onlara îcâb eden âlât-ı sâiresi dahi yedimde olup bin iki yüz yetmiş dört senesi Zilka‘deti’ş-şerîfesinin on dokuzuncu günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan semâhatlü Mustafa Asım Efendi hazretlerinin imzâ ve hatmlarıyla mahtûme işbu bir kıt‘a mübâya‘a hücceti [ve] kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedimde mülk ve hakkım olmağla ben ber-minvâl-i muharrer mâlik olduğum on iki re’s bârgir ve onlara îcâb eden âlât-ı sâirenin üç re’s bârgir ve onlara îcâb eden âlât-ı sâiresi bundan mukaddem takdîmle gāibe ani’l-meclis Zekiye Hanım bt. Mehmed’e cihet-i karz ve semen-i mebî‘den deynim olan yirmi üç bin guruş mukābelesinde bâ-hüccet-i şer‘iyye rehn vaz‘ ve teslîm etmişdim el-hâletü hâzihî mâ‘adâsı olan dokuz re’s bârgir ve onlara iktizâ eden âlât-ı sâiresini dahi bâ-izn-i şerîk-i merkūm Agop’un mâlından zikri âtî iktirâz ve kabz edeceğim meblağ mukābelesinde rehn vaz‘ ve merkūm Agop’a teslîm eylediğimde ol dahi ber-vech-i muharrer irtihân ve tesellüm ve kabz u kabûl eyledikden sonra merkūm Agop bana mâlından yüz bin guruş iktirâz ve teslîm ben dahi iktirâz ve kabz ve umûruma sarfla istihlâk edip meblağ-ı merkūm yüz bin guruş zimmetimde cihet-i mezkûreden merkūm Agop’a vâcibü’l-edâ ve lâzimü’l-kazâ sahîhan deynimdir dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 14 Rebî‘ülâhir sene 1279 Şuhûdü’l-hâl: Muhzır Süleyman Ağa b. ( ), Muhzır Şakir Ağa b. ( ), Muhzır Mustafa Ağa b. ( ), Muhzır el-Hâc Salih Ağa b. ( ), ve gayruhum