İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 247 Hüküm no: 154 Orijinal metin no: [33a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaybolan helvâcı esnâfından Halil Ağa’nın kiracısı olduğu helvâcı dükkânının açılıp Halil Ağa’ya ait eşyanın sayılması ve satılması Mefkūd defteri Mahmiye-i İstanbul’da Davudpaşa mahkemesi ittisâlinde kâin ma‘lûmu’l-hudûd bir bâb helvâcı dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzime-i ma‘lûmede şehriye iki yüz elli guruş kirâ tesmiyesiyle müşâhereten müste’cir olan helvâcı esnâfından Kürretünnühaslı Halil Ağa b. Abdullah işbu târihden bir ay mukaddem dükkân-ı mezkûru mukaffalan terk ve ta‘tîl birle diyâr-ı âhara firâr ve gaybet-i munkatı‘a ile gāib ve mefkūd olmağla dükkân-ı mezkûrun kuflu feth ve küşâd ve derûnunda mevcûde gāib-i merkūmun mâlı olup mâ-yehâfün aleyhi’l-fesâd olan eşyâsı tahrîr ve semen-i misilleriyle âhara bey‘ ve esmânı mefkūd-ı merkūmun hâli mütebeyyin oluncaya değin yed-i emîne vaz‘ ve dükkân-ı mezkûr ile âlât-ı gedik-i merkūm kendülere teslîm olunmasını dükkân ve âlât-ı gedik-i mezkûrların mutasarrıfları olan nefsinden asîl ve li-ebeveyn kız karındaşları Rukiye Hanım ve Hanife bt. Mustafa b. Abdullah tarafından husûs-ı âti’l-beyânda vekîlleri olduğu zâtlarını ârifân esnâf-ı merkūme yiğitbaşısı el-Hâc Mustafa Ağa b. İbrahim ve esnâfından Hüsnü Efendi b. Salih şehâdetleriyle ber-nehc -i şer‘î sâbit olan Feyzullah Efendi bir kıt‘a arzuhâliyle istid‘â etmekle ol bâbda sâdır olan fermân-ı âlîye imtisâlen kıbel-i şer‘den me’zûnen irsâl olunan Kâtib es-Seyyid el-Hâc Ahmed Aziz Efendi dükkân-ı mezkûre varıp Davudpaşa mahallesi imâmı Ahmed Efendi b. el-Hâc İbrahim ve ahâlisinden Mehmed Necib Ağa b. Mehmed Salih ve Bâb-ı âlî tulumbacıbaşısı es-Seyyid Hasan Ağa b. es-Seyyid Ali ve Çörekçi el-Hâc Mehmed Ağa b. Osman hâzır oldukları hâlde dükkân-ı mezkûrun kuflu feth ve küşâd birle mefkūd-ı merkūmun hâli mütebeyyin oluncaya değin mu‘temed ve müstakīm idüğü hâzırûn-ı merkūmûnun ihbârlarıyla zâhir ve mütehakkık olup kıbel-i şer‘den vasi ve kayyım nasb olunan helvâcı esnâfı kethüdâsı Mustafa Ağa b. Ahmed ma‘rifeti ve ma‘rifet-i şer‘le zuhûr eden mâlı tahrîr ve cümlesi mâ-yühâfü aleyhi’l-fesâd olmağla semen-i misilleriyle âhara bey‘ olunan eşyâsının defteridir ki ber-vech-i âtî zikr olunur. Fî 26 Şevval sene 1278 Yün memlû çit ve beledî döşek 3 aded Kıbrıs basması ve çit yorgan 6 aded Yün memlû basma baş yasdığı 2 aded 310 guruş Sac mangal 1 aded mâ‘a kapak 1 aded 10 guruş Sirke kıyye 2, 500 guruş İlmik 2 kıyye 10 guruş Bir mikdâr hatab 10 guruş Lamba 1 aded 10 guruş Yekûn 850 guruş 17 guruş dellâliye 833 10 guruş harc-ı defter ma‘a kaydiye 823 guruş Sahhü’l-bâkī merkūm sekiz yüz yirmi üç guruşu vasiyy-i mezbûr Mustafa Ağa bi’l-vesâye kabz ve bilâ zarûret kendi mâlına halt ile ba‘de’l istihlâk meblağ-ı merkūm sekiz yüz yirmi üç guruş cihet-i mezkûreden zimmetinde mefkūd-ı merkūm Halil Ağa’ya damânen deyni olduğunu ikrâr u i‘tirâf edip emriyle meblağ-ı merkūm sekiz yüz yirmi üç guruşa mezbûrân el-Hâc Mustafa Ağa ve Hüsnü Efendi ve esnâf-ı merkūmeden Davudpaşa İskeleli Ahmed Ağa b. Ahmed’den her biri kefâlet-i mutlaka-i sahîha-i şer‘iyye müte‘akiben kefîl bi’l-mâl ve dâmin olduklarında tashîhan li’l-kefâle kıbel-i şer‘den vasî nasb olunan imâm-ı mezbûr Ahmed Efendi dahi kefâlet-i mezkûrelerini kabûl eyledikleri ba‘de’l-inhâ ve’t-tenfîz işbu mahalle şerh verildi.