İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 249 Hüküm no: 155 Orijinal metin no: [33a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beş aylık hamile Cemal Hanım’ın boşandığı eşi Ömer Nabi Efendi b. Hacı Ali’ye kendisi için nafaka bağlattırması Nafaka-i haml 275 guruş Mahmiye-i İstanbul’da Hoca [Paşa kurbunda] Karaki Hüseyin Çelebi mahallesinde sâkine zâtı zeyl-i vesîkada muharrerü’l-esâmî müslimîn ta‘rîfleriyle mu‘arrefe olan Sırrı Cemal Hanım bt. Abdullah meclis-i şer‘-i şerîf-i lâzımü’t-teşrîfde zevc-i sâbıkı Meclis-i Vâlâ-yı Ahkâm-ı Adliye mazbata odası hulefâsından Ömer Nabi Efendi b. el-Hâc Ali mahzarında takrîr-i kelâm ve ta‘bîr ani’l-merâm edip mûmâ-ileyh Ömer Nabi Efendi ile mukaddemâ zevciyet beynimizde kāime iken mûmâ-ileyhin firâşından hâsıl batnımda müstebîn tahminen beş aylık hamlim olmağla vaz‘-ı haml ile iddetim münkaziye oluncaya değin nafaka ve kisve ve sâir levâzım-ı zarûriyem için mûmâ-ileyh Ömer Nabi Efendi üzerine kıbel-i şer‘den kadr-ı ma‘rûf meblağ farz ve takdîr buyurulmak matlûbumdur dedikde gıbbe’t-tasdîki’ş-şer‘î hâkim-i hâsim-i vâlâ-cenâbü’l-muvakki‘ ismuhû fî sadri’l-kitâb tûbâ lehû ve hüsnü me’âb efendi hazretleri dahi mûmâ-ileyhâ Sırrı Cemal Hanım’ın vaz‘-ı haml ile iddeti münkaziye oluncaya değin nafaka ve kisve ve sâir levâzım-ı zarûriyesi için mûmâ-ileyh Ömer Nabi Efendi üzerine işbu târih-i kitâbdan i‘tibâren bi’t-terâzi beher şehr iki yüz yetmiş beş guruş nafaka farz ve takdîr buyurup meblağ-ı mefrûz-ı mezkûr beher şehr ikişer yüz yetmiş beş guruşu kendi nafaka ve kisve ve sâir levâzım-ı zarûriyesine harc u sarfa ve lede’l-iktizâ istidâneye ve inde’z-zafer mûmâ-ileyh Ömer Nabi Efendi üzerine rucû‘a mûmâ-ileyhâ Sırrı Cemal Hanım’a izin vermeğin mâ-vaka‘a bi’t-taleb ketb olundu. Fî 15 Cumâdelûlâ sene 1279 Şuhûdü’l-hâl: Muhzır Mustafa Ağa b. ( ), Muhzır Ahmed Ağa b. ( ), Muhzır Yusuf Ağa b. ( ), Muhzır el-Hâc Salih Ağa b. ( ), ve gayruhum