İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 250 Hüküm no: 156 Orijinal metin no: [33a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hacı Hasan Ağa ve kız kardeşi Şerife Hadice Refi‘a Hanım’ın sahip oldukları berber dükkânı hisselerinin yarısını demirci esnâfından Hasan Ağa b. Ahmed’e satmaları Berber gediği mübâya‘ası 11660 guruş Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin ikrâr-ı mülk ve mübâya‘a ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve gedik-i sahîha ve mu‘tebere ile ber-vech-i mülkiyet tasarruf olunmakda olan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı hazret-i cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen mahrûse-i mezkûrede Yolcuzâde mahallesinde sâkinler es-Seyyid el-Hâc Hasan Ağa ve zâtı ta‘rîf-i şer‘î ile mu‘arrefe olan Şerife Hadice Refi‘a Hanım bt. el-müteveffâ es-Seyyid el-Hâc Hüseyin Ağa meclis-i şer‘-i şerîf-i enverde demirci esnâfından bâ‘isü’l-kitâb Hasan Ağa b. Ahmed mahzarında mahrûse-i mezkûre ve tevâbi‘inde vâki‘ berber esnâfının kethüdâsı es-Seyyid Ahmed Zemcî Ağa b. el-Hâc Mustafa tarafından mürsel esnâf-ı mezkûre çavuşu Mehmed Hurşid Ağa b. Abdullah hâzır olduğu hâlde her biri ikrâr-ı tâm ve takrîr-i kelâm edip mahrûse-i mezkûre hâricinde Yelkencileriçi nâm mahalde kâin bir taraftan halatcı dükkânı ve bir tarafdan kale cidârı ve bir tarafdan mukaddemâ arsa ve hâlâ Aleksi’nin demirci dükkânı ve taraf-ı râbi‘i tarîk-i âm ile mahdûd Ayasofya-i Kebîr evkāf[ı] müsakkafâtından pederimiz müteveffâ-yı mezbûr el-Hâc es-Seyyid Hüseyin Ağa’dan müntakil bizimle karındaşımız hâzır bi’l-meclis es-Seyyid el-Hâc Ahmed Ağa’nın bi’l-icâreteyn taht-ı tasarrufumuzda olan şehriye beş guruş kirâlı bir bâb berber dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme kırk sehm i‘tibârıyla akd-i âti’z-zikrin sudûruna değin yedimizde olup işbu şehr-i hâlin gurresi târihiyle müverraha İstanbul Mahkemesi’nden verilen bir kıt‘a hüccet-i şer‘iyye ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca münâsefeten temlîk ve hakkımız olmağla ber-minvâl-i muharrer mâlik olduğumuz âlât-ı gedik-i mezkûrun nısf hisse-i şâyi‘asını yedimizde bi’l-ibkā mâ‘adâ nısf hisse-i şâyi‘asını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr Hüseyin Ağa’ya on bir bin altı yüz altmış altı guruşa bey‘ ve temlîk ve vech-i lâyıkı ile teslîm eylediğimizde ol dahi iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm on bir bin altı yüz altmış altı guruşu tamamen bize def‘ u teslîm biz dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-minvâl-i muharrer âharın ibrâsını kabûl eyledik, ba‘de’l-yevm âlât-ı gedik-i mezkûrun âhar nısf hisse-i şâyi‘asında bizim aslâ ve kat‘â alâka ve medhalimiz kalmayıp mezbûr Hasan Ağa’nın mülk-i müşterâsı ve hakk-ı sırfı olmuşdur dediklerinde gıbbe. Fî 2 Ra sene 1279 Şuhûdü’l-hâl: Esnâf-ı mezkûreden Hasan Ragıb Ağa b. Mustafa, Muhzır el-Hâc Yusuf Ağa b. ( ), Muhzır Feyzullah Ağa b. ( ), Tahtacı el-Hâc Salih Ağa, ve gayruhum