İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 257 Hüküm no: 162 Orijinal metin no: [34b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Filibos v. Pretamos’un mirasçılarından sagīr oğlu Nikola’ya kalan şerbethâne hisselerine dair hüccet talebi Çorabcı hânında şerbethâne ihbârı Kezâlik vilâyet-i Anadolu’da Bereketli nâm-ı diğer Çamardı kazâsına tâbi‘ Fertek karyesinde sâkin iken bundan mukaddem fevt olan teba‘a-i Devlet-i aliyye’nin Rum milletinden ve şerbethâneci esnâfından Filibos v. Pretamos v. Dimyat’ın verâseti her biri teba‘a-i Devlet-i aliyye’den karye-i mezkûrede sâkinler zevce-i metrûkesi Angeliko bt. Anaştaş ile sulbî sagīr oğlu Nikola ve sulbiye kebîre kızları Anaştaşya ve Marya ve Sara ve Eftimye’ye münhasıra ve tashîh-i mesele-i mirâsları kırk sekiz sehimden olup sihâm-ı mezkûreden altı sehmi zevce-i merkūme Angeliko’ya ve on dört sehmi sagīr-i merkūm Nikola’ya ve yedişer sehimden yirmi sekiz sehmi dahi merkūmât Anaştaşya ve Marya ve Sara ve Eftimye’ye isâbeti lede’ş-şer‘i’l-enver zâhir ve mütehakkık oldukdan sonra bâ‘isü’r-rakīm sagīr-i merkūm Nikola’nın anası ve tesviye-i umûruna kıbel-i şer‘den vasiyy-i mansûbesi merkūme Angeliko tarafından husûs-ı âti’l-beyânda vekîl-i şer‘îsi teba‘a-i Devlet-i aliyye’nin Rum milletinden ve şerbethâneci esnâfından Avraham v. Pretamos meclis-i şer‘-i şerîf-i hatîrde her biri teba‘a-i Devlet-i aliyye’den esnâf-ı merkūmenin Beyoğlu kolu ustabaşısı Dülbendcioğlu Andon v. Ohannes ve esnâfından Sa‘lebçi Hanı şerbethânesi ustası Yovakim v. İstefan ve Bakla Hanı şerbethânesi ustası Avraham v. Kiryako ve çavuşu Bodos v. Kostandi hâzır oldukları hâlde bi’l-vekâle takrîr-i kelâm ve ta‘bîr ani’l-merâm edip mahmiye-i İstanbul’da Sultan hamamı kurbünde Kazgancılar civârında vâki‘ Kapudan-ı esbak merhûm Piyale Paşa Vakfı müsakkafâtından Çorabçı Hanı demekle arîf bir bâb hân derûnunda süflâ-i zemînde kâin merhûm-ı müşârün-ileyh Piyale Paşa Vakfı müsakkafâtından gāib ani’l-beled Kurdoğlu Bünyad v. Pretamos’un bi’l-icâreteyn taht-ı tasarrufunda olan şehriye on guruş kirâlı peykeyi hâvî bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla beş sehm hisse-i şâyi‘ası müteveffâ-yı merkūm Filibos’un hayâtında ile’l-fevt bin iki yüz elli iki senesi Şevvali’l-mükerreminin on dokuzuncu günü târihiyle müverrah ve ol târihde rüsûm-i zecriye muhassılı es-Seyyid İbrahim Edhem Efendi’nin mührüyle memhûr işbu bir kıt‘a sûret ve hâlâ Zecriye Nâzırı izzetlü Hüseyin Efendi’nin bir kıt‘a ilmühaberi mantûklarınca yedinde mülkü ve ba‘de fevtihî müvekkilem vasiyy-i merkūme Angeliko ve sagīr-i merkūm Nikola ve merkūmât Anaştaşya ve Marya ve Sara ve Eftimye’ye ber tashîh-i mezkûr mevrûs olup lakin âlât-ı gedik-i mezkûrun beş sehm hisse-i şâyi‘a-i mezkûresinin ber tashîh-i merkūm on dört sehm hisse-i şâyi‘ası ber-minvâl-i muharrer sagīr-i merkūmun mülkü olduğunu nâtık sened-i şer‘î olmamağla hakīkat-i hâl husûs-ı mezkûre vukūf-ı tâmları olan kimesnelerden istihbâr ve suâl olunup haberleri tahrîr ve imlâ ile beş sehm hisse-i şâyi‘a-i âlât-ı gedik-i mezkûrun ber tashîh-i merkūm on dört sehm hisse-i şâyi‘a-i merkūmesi ber-vech-i meşrûh sagīr-i merkūmun mülkü olduğunu nâtıka kıbel-i şer‘den bir kıt‘a hüccet-i şer‘iyye i‘tâ buyurulmak müvekkilem vasiyy-i merkūme Angeliko’nun bi’l-vesâye matlûbudur deyu bi’l-vekâle istid‘â etdikde hâl vekîl-i merkūm Abraham’ın bâlâda bast ve beyân eylediği minvâl üzere olduğunu husûs-ı mezkûre vukūf-ı tâmları olan esnâf-ı hâzırûn-ı merkūmûndan her biri alâ tarîki’ş-şehâde haber vermeleriyle vâki‘-i hâl hıfzan li’l-makāl işbu vesîka-i enîka ketb ü imlâ olundu. Fî 24 Zilhicce sene 1278 Şuhûdü’l-hâl: Muhzır el-Hâc Yusuf Ağa b. ( ), Muhzır el-Hâc SalihAğa b. ( ), Muhzır Şakir Ağa b. ( ), Muhzır Mustafa Ağa b. ( ), ve gayruhum