İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 259 Hüküm no: 163 Orijinal metin no: [34b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panco v. Dimitri’den eşine ve oğluna miras kalan şerbethâne hisselerinin Zoyice bt. Yani’ye satılması Şerbethâne Yeniköy’de 4000 guruş Kezâlik mahrûse-i Galata’ya muzâfe İstinye nâhiyesine tâbi‘ Yeniköy’de Panaiya mahallesinde sâkin iken bundan mukaddem fevt olan teba‘a-i Devlet-i aliyye’nin Rum milletinden Kayıkçı Turbcuoğlu Panco v. Dimitri v. Adam’ın verâseti her biri teba‘a-i Devlet-i aliyye’den zevce-i metrûkesi Kadınko bt. Aleksi ile sulbî kebîr oğlu Berikli’ye münhasıra olduğu lede’ş-şer‘i’l-enver zâhir ve mütehakkık oldukdan sonra şahsı ta‘rîf-i şer‘î ile mu‘arrefe olan merkūme Kadınko ve merkūm Berikli meclis-i şer‘-i şerîf-i hatîrde mahalle-i mezkûrede sâkine Kuyumcu Moskovoğlu Yorgaki v. Manol’un zevcesi olup devlet-i aliyye teba‘asının Rum milletinden olduğu bâ-ilmühaber mütehakkık olan bâ‘isetü’r-rakīm Zoyice bt. Yani tarafından husûs-ı âti’l-beyânda tasdîka vekîl-i şer‘îsi teba‘a-i Devlet-i aliyye’nin Rum milletinden mahalle-i mezkûre muhbiri Manol v. Moskov muvâcehesinde teba‘a-i Devlet-i aliyye’nin Rum milletinden ve şerbethâneci esnâfı çavuşu İspiro v. Kiryako hâzır olduğu hâlde her biri ikrâr-ı tâm ve takrîr-i kelâm edip zikr olunan Panaiya mahallesinde Köprübaşı nâm mahalde vâki‘ bir tarafdan Tütüncü Yani’nin yemenici dükkânı ve bir tarafdan müvekkile-i merkūme Zoyice’nin bakkal dükkânı ve bir tarafdan Sava arsası ve taraf-ı râbi‘i tarîk-i âm ile mahdûd şehriye otuz guruş kirâlı Kilipolirroğlu şerbethânesi demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yüz yirmi sehm i‘tibârıyla altmış sehm hisse-i şâyi‘ası âharın yedinde mülkü olup mâ‘adâ altmış sehm hisse-i şâyi‘ası bin iki yüz elli yedi senesi Şevvali’l-mükerreminin on beşinci günü târihiyle müverrah ve ol târihde rüsûm-i zecriye muhassılı olan Mehmed Nuri Beyefendi’nin mührüyle memhûr işbu bir kıt‘a sûret ve hâlâ Zecriye Nâzırı izzetlü Hüseyin Efendi’nin bir kıt‘ailmühaberi mantûklarınca mûrisimiz müteveffâ-yı merkūm Panco’nun hayâtında ile’l-fevt yedinde mülkü ve ba‘de fevtihî bize mevrûs olmağla biz âlât-ı gedik-i mezkûrdan akd-i âti’z-zikrin sudûruna değin ber-minvâl-i muharrer mâlik olduğumuz altmış sehm hisse-i şâyi‘a-i mezkûresini tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şerîk dört bin guruşa müvekkile-i merkūme Zoyice’ye bey‘ ve temlîk ve vech-i lâyıkıyla teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm dört bin guruşu tamâmen bize def‘ u teslîm biz dahi yedinden bi’t-tamâm ve’l-kemâl ahz u kabz eyledik ba‘de’l-yevm âlât-ı gedik-i mezkûrun altmış sehm hisse-i şâyi‘a-i mezkûresinde bizim aslâ ve kat‘â alâka ve medhalimiz kalmayıp müvekkile-i merkūme Zoyice’nin mülk-i müşterâsı ve hakk-ı sırfı olmağla mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-minvâl-i muharrer âharın ibrâsını kabûl eyledik, dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi 19 Cumâdelûlâ sene 1279 Şuhûdü’l-hâl: Muhzır Şakir Ağa b. ( ), Muhzır el-Hâc Salih Ağa b. ( ), Muhzır Feyzullah Ağa b. ( ), Muhzır Ahmed Ağa b. ( ), ve gayruhum