İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 260 Hüküm no: 164 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Mâliye Hazinesi kavaslarından Yusuf Ağa’nın mirasçılarına kalan tütüncü dükkânının müzâyede yoluyla satılması Tütüncü mübâya‘ası 9000 guruş Kezâlik mahmiye-i İstanbul’da Simkeşhâne kurbünde Soğan Ağa mahallesinde sâkin iken bundan mukaddem vefât eden Mâliye Hazine-i Celîlesi kavvâslarından Yusuf Ağa b. Halil b. Abdullah’ın verâseti zevce-i menkûha-i metrûkesi Hürmüz Hanım bt. Mustafa ile mezbûreden mütevellidler sulbî sagīr oğulları Mehmed Agah ve İbrahim Salim’e münhasıra olduğu lede’ş-şer‘i’l-enver zâhir ve mütehakkık oldukdan sonra sagīrân-ı mezbûrânın vâlideleri ve tesviye-i umûrlarına kıbel-i şer‘den mansûbe vasîleri zâtı ta‘rîf-i şer‘î ile mu‘arrefe olan mezbûre Hürmüz Hanım meclis-i şer‘-i şerîf-i enverde Kısmet-i Askerîye mahkemesi muhzırânından Mehmed Raşid Ağa b. İsmail mahzarında tütüncü esnâfının kethüdâsı es-Seyyid el-Hâc Mehmed Latif Efendi b. es-Seyyid İsmail ile duhân tüccârından mazbûtü’l-esâmî on nefer müslim ve beş nefer hıristiyan lonca ihtiyârları taraflarından mürsel kethüdâ vekîli Ahmed Efendi b. Osman hâzır olduğu hâlde bi’l-asâle ve bi’l-vekâle ikrâr-ı tâm ve takrîr-i kelâm edip mahmiye-i mezkûrede Laleli Câmi‘-i şerîfi nezdinde medrese karşısında vâki‘ bir tarafdan merhûme Ferahşad Sultan Vakfı müsakkafâtından zevcim müteveffâ-yı mezbûr Yusuf Ağa’dan müntakil sagīrân-ı mezbûrânın tasarruflarında olan berber dükkânı ve bir tarafdan Sâ‘atçi el-Hâc Emin Ağa’nın sâ‘atçi dükkânı ve bir tarafdan Kızıltaş Câmi‘i helâları ve taraf-ı râbi‘i tarîk-i âm ile mahdûd Eshâm Muhâsebesi kaleminde Mehmed Ağa ismine mukayyed şehriye üç guruş kirâ-yı kâdimeli bir bâb tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme zevcim müteveffâ-yı mezbûr Yusuf Ağa’nın hayâtında ile’l-vefât bin iki yüz elli beş senesi Saferi’l-hayrının on üçüncü günü tarihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan Reîsü’l-küttâb Arif Efendizâde Mehmed Raif Beyefendi merhûmun imzâ ve hateminihâviye işbu bir kıt‘a mübâya‘a hücceti nâtıka olduğu üzere yedinde müstakillen mülkü ve ba‘de vefâtihî benimle vasîleri olduğum sagīrân-ı mezbûrâna mevrûs olmağla ben âlât-ı gedik-i mezkûru bi’l-asâle ve bi’l-vesâye hâlâ askerî kassâmı olan İstanbul pâyelülerinden Çarşambavîzâde fazîletlü es-Seyyid Mehmed Said Efendi hazretleri ile kethüdâ-yı mûmâ-ileyhin mühürleriyle memhûr işbu bir kıt‘a ilmühaber mantûkunca münâdî yediyle sûk-ı sultânî ve mecma‘-ı nâs olan mahallerde lede’l-müzâyede ve gıbbe inkıtâ‘ı’r-rağbe el-yevm semen-i misli idüğü cerîdede mazbûtü’l-esâmî bî-garaz sikât-ı müslimînin alâ tarîki’ş-şehâde ihbârlarıyla zâhir ve mütehakkık olan dokuz bin guruşa tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr Mehmed Raşid Ağa’ya bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm dokuz bin guruşu tamâmen bana def‘ u teslîm ben dahi yedinden bi’l-asâle ve bi’l-vesâye tamâmen ahz u kabz ve müteveffâ-yı mezbûrun defter-i kassâmına idhâl eyledim ba‘de’l-yevm âlât-ı gedik-i mezkûrda benimle sagīrân-ı merkūmânın aslâ ve kat‘â alâka ve medhalimiz kalmayıp mezbûr Mehmed Raşid Ağa’nın mülk-i müşterâsı ve hakk-ı sırfı olmuşdur dedikde gıbbe’t-tasdîk mezbûr Mehmed Raşid Ağa meclis-i şer‘-i hatîrde bâ‘isetü’l-kitâb mezbûre Hürmüz Hanım mahzarında ikrâr-ı tâm ve takrîr-i kelâm edip ben dahi ber-minvâl-i muharrer ânifen şirâen mâlik olduğum âlât-ı gedik-i mezkûru tarafeynden bi’l-îcâb ve’l-kabûl bâtten ve sahîhan bi-safkatin vâhidetin mezbûre Hürmüz Hanım’a kezâlik dokuz bin guruş semen-i makbûza bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl edip fîmâ-ba’d âlât-ı gedik-i mezkûr mezbûre Hürmüz Hanım’ın mülk-i müşterâsı ve hakk-ı sırfı olup benim aslâ ve kat‘â alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi 27 Cumâdelûlâ sene 1279 Şuhûdü’l-hâl: Şekerci Feyzullah Ağa b. ( ), Muhzır Şakir Ağa b. ( ), Muhzır el-Hâc Salih Ağa b. ( ), Muhzır Mustafa Ağa b. ( ), Muhzır Süleyman Ağa b. ( ), ve gayruhum