İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 261 Hüküm no: 165 Orijinal metin no: [35a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Necibe Hanım’ın boşandığı eşi İbrahim Efendi b. Mustafa’ya iki yaşındaki oğulları için aylık 80 kuruş nafaka bağlattırması Nafaka-i sagīr 80 guruş Mahmiye-i İstanbul’da Hoca Paşa mahallesinde sâkine zâtı ta‘rîf-i şer‘î ile mu‘arrefe olan bâ‘isetü’l-kitâb Şerife Necibe Hanım bt. Mehmed Tahir meclis-i şer‘-i münîrde zevc-i sâbıkı müderrisîn-i kirâmdan ve dersi‘âmdan Kankırılı mekremetlü İbrahim Efendi b. Mustafa mahzarında takrîr-i kelâm ve ta‘bîr ani’l-merâm edip mûmâ-ileyh İbrahim Efendi ile mukaddemâ zevciyet beynimizde kāime iken mûmâ-ileyhin firâşından hâsıl ve benden mütevellid ve bi-hakkı’l-hıdâne hacr ve terbiyemde olan sulbî oğlu tahmînen iki yaşında es-Seyyid Mustafa Reşid nâm sagīrin aslâ mâlı olmayıp nafaka ve kisveye eşedd-i ihtiyâc ile muhtâc olmağla sagīr-i mezbûrun nafaka ve kisve-bahâsı için pederi mûmâ-ileyh İbrahim Efendi üzerine kıbel-i şer‘den kadr-ı ma‘rûf meblağ farz ve takdîr buyurulmak bi-hakkı’l-hıdâne matlûbumdur dedikde gıbbe’t-tasdîk hâkim-i hâsim-i vâlâ-cenâbi’l-muvakki‘ ismuhu fî sadri’l-kitâb tûbâ lehû ve hüsnü me’âb efendi hazretleri dahi sagīr-i mezbûrun nafaka ve kisve ve sâir levâzım-ı zarûriyesi için pederi mûmâ-ileyh İbrahim Efendi üzerine işbu târih-i kitâbdan i‘tibâren bi’t-terâzi beher şehr seksener guruş farz ve takdîr buyurup meblağ-ı mefrûz-ı mezkûr beher şehr seksener guruşu sagīr-i mezbûrun nafaka ve kisve ve sâir levâzım-ı zarûriyesine harc u sarfa ve lede’l-iktizâ istidâneye ve inde’z-zafer pederi mûmâ-ileyh İbrahim Efendi üzerine rucû‘a vâlidesi ve hâdinesi mezbûre Şerife Necibe Hanım’a izin vermeğin mâ-vaka‘a bi’t-taleb ketb olundu. Fî 22 Cumâdelûlâ sene 1279 Şuhûdü’l-hâl: Muhzır Mustafa Ağa b. ( ), Şekerci Ahmed Ağa b. ( ), Muhzır el-Hâc Yusuf Ağa b. ( ), Muhzır Süleyman Ağa b. ( ), ve gayruhum