İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 262 Hüküm no: 166 Orijinal metin no: [35a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi esnâfından Sâğır Bedros v. Mokos ve ortaklarının uncu değirmeni, ekmekçi ve françalacı fırınındaki hisselerini satmaları ve Zahîre Hazinesi’ne olan borçlarını ödemesi için vekil tayin etmeleri Uncu değirmeni Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen teba‘a-i Devlet-i aliyye’nin Ermeni milletinden ve ekmekçi esnâfından Sâğır Bedros v. Mokos v. Avanismeclis-i şer‘-i şerîf-i hatîrde teba‘a-i Devlet-i aliyye’nin Ermeni milletinden olduğu bâ-ilmühaber mütehakkık olan esnâf-ı merkūmeden bâ‘isü’r-rakīm diğer Bedros v. Haçador muvâcehesinde esnâf-ı merkūme kethüdâsı İbrahim Ağa b. Ahmed ile mazbûtü’l-esâmî nizâm ustaları taraflarından mürsel vekîlleri esnâf-ı merkūme yiğitbaşısı es-Seyyid İsmail Efendi b. es-Seyyid Mehmed Emin hâzır olduğu hâlde her biri ikrâr-ı tâm ve takrîr-i kelâm edip mahrûse-i Galata’ya muzâfe İstinye nâhiyesine tâbi‘ Büyükdere karyesinde vâki‘ bir tarafdan Hançerli Bey selhânesi ve bir tarafdan leb-i deryâ ve bir tarafdan Kasâb Anaştaş v. İstefan’ın kasâb dükkânı ve taraf-ı râbi‘i tarîk-i âm ile mahdûd şehriye otuz guruş kirâlı bir bâb ekmekçi fırını ve yine karye-i merkūmede kâin iki tarafdan Sotri şerbethânesi ve bağı ve bir tarafdan Tavukçuoğlu şerbethânesi ve taraf-ı râbi‘i tarîk-i âm ile mahdûd şehriye otuz guruş kirâlı bir bâb françalacıfırını ve mahrûse-i mezkûreye tâbi‘ Fındıklı kasabasında mekâbir-i müslimîn karşısında kâin bir tarafdan Sultan sâhilsarayı ve mezâristan ve bir tarafdan leb-i deryâ ve iki tarafdan tarîk-i âm ile mahdûd merhûm es-Seyyid Mustafa Ağa Vakfı müsakkafâtından Bedros v. Ohannes ve Agop ve Agise ve Meyrem evlâd Solen ve Ohan ve Mikayil veledey Abranos’un bi’l-icâreteyn taht-ı tasarruflarında olan şehriye elli guruş kirâlı Büyük fırın demekle arîf bir bâb ekmekçi fırını ve onlara merbût derûnunda kâin şehriye elli guruş kirâlı dokuz horosu ekmekçi ve bir horosu uncu ki cem‘an on horoslu bir bâb değirmen derûnlarında mevcûde beyne’l-esnâf gedik ta‘bîr olunur otuz altı re’s bârgir ekmekçi ve dört re’s bârgir uncu ki cem‘an kırk re’s bârgir ve onlara tâbi‘ sâir âlât-ı lâzime-i ma‘lûmenin yirmi sekiz re’s bârgir ekmekçi ve dört re’s bârgir uncu ki cem‘an otuz iki [35b] re’s bârgir onlara isâbet eden âlât-ı sâiresi âharların yedlerinde mülkleri olup mâ‘adâ sekiz re’s bârgir ve onlara îcâb eden âlât-ı sâiresi bin iki yüz altmış senesi Cumâdelâhiresi’nin yirmi üçüncü günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan Süleyman Beyzâde Mehmed Kamil Beyefendi merhûmun imzâ ve hatemini hâviye işbu bir kıt‘a hüccet-i şer‘iyye ve işbu şehr-i hâlin onuncu günü târihiyle müverraha İstanbul mahkemesinden verilen işbu diğer bir kıt‘a hüccet-i şer‘iyye ve kethüdâ-yı merkūmun takdîm eylediği bir kıt‘a ilmühaber mantûklarınca akd-i âti’z-zikrin sudûruna değin yedimizde seviyyen mülkümüz olmağla biz âlât-ı gedik-i mezkûrdan ber-minvâl-i muharrer mâlik olduğumuz salifü’l-beyân sekiz re’s bârgir ve onlara isâbet eden âlât-ı sâiresinin altı re’s bârgir onlara îcâb eden âlât-ı sâiresini yedimizde bi’l-ibkā mâ‘adâ iki re’s bârgir ve onlara iktizâ eden âlât-ı sâiresini tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ yirmi bin guruşa merkūm Bedros’a bey‘ ve temlîk ve vech-i lâyıkıyla teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra bizim Zahîre Hazinesi’ne zimmetimizde dört bin guruş deynimiz olmağla semen-i merkūm yirmi bin guruşun dört bin guruşunu deyn-i mezkûrumuza mahsûben hazine-i mezkûrede kabza memûruna edâ etmek üzere merkūm diğer Bedros’a emr ve tarafımızdan bi’l-vekâle tevkîl eylediğimizde ol dahi kabûl ve ber-vech-i meşrûh edâ-i deyne ta‘ahhüd edip semen-i mezkûrun bâkīsi olan on altı bin guruşu tamâmen bize def‘ u teslîm biz dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrun sâlifü’l-beyân iki re’s bârgir ve onlara iktizâ eden âlât-ı sâiresinde bizim aslâ ve kat‘â alâka ve medhalimiz kalmayıp merkūm diğer Bedros’un mülk-i müşterâsı ve hakk-ı sırfı olmuşdur dediklerinde gıbbe. Fî 17 Cumâdelûlâ sene 1279 Şuhûdü’l-hâl: Muhzır Feyzullah Ağa b. ( ), MuhzırŞekerci Şakir Ağa b. ( ), Muhzır Süleyman Ağa b. ( ), Muhzır el-Hâc Yusuf Ağa b. ( ), ve gayruhum