İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 274 Hüküm no: 175 Orijinal metin no: [37a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi esnâfından Artin ve Mikail Râhib kardeşler ile diğer ortakların ekmek fırını ve değirmenindeki hisseleri için hüccet talebi Uncu değirmeni ihbârı Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen her biri teba‘a-i Devlet-i aliyye’den olup nefsinden asîl ve li-ebeveyn er karındaşları ekmekçi esnâfından Artin ve Mikail Râhib veledey. Serkiz taraflarından husûs-ı âti’l-beyânda vekîl-i şer‘îleri esnâf-ı mezkûreden Mıgırdıç her biri teba‘a-i Devlet-i aliyye’den olup nefsinden asîl ve li-ebeveyn er ve kız karındaşları esnâf-ı mezkûreden Kigork ve Elmas ve Turfanda evlâdi’l-müteveffâ Magdisi Haçador v. Kirhor taraflarından husûs-ı câî‘z-zikrde tasdîka vekîl-i şer‘îleri esnâf-ı mezkûreden Ohannes ve yine her biri teba‘a-i Devlet-i aliyye’den Oskohi bt. Sahak ve esnâf-ı mezkûreden Nişan ve Abris ve diğer Elmas ve Herzik ve Serpohi evlâdi’l-müteveffâ Zohrab taraflarından kezâlik husûs-ı câî’z-zikrde vekîl-i şer‘îleri esnâf-ı mezkûreden Mardiros v. Kalos hâzır oldukları hâlde meclis-i şer‘-i şerîf-i hatîrde esnâf-ı merkūme kethüdâsı İbrahim Ağa b. Ahmed ile mazbûtü’l-esâmî nizâm ustaları taraflarından mürsel vekîlleri esnâf-ı merkūme yiğitbaşısı es-Seyyid İsmail Efendi b. es-Seyyid Mehmed Emin hâzır olduğu hâlde bi’l-asâle ve bi’l-vekâle takrîr-i kelâm ve ta‘bîr ani’l-merâm edip mahrûse-i Galata’da Kapıiçi nâm mahalde Sultan Bayezid mahallesinde kâin bir tarafdan hallâc dükkânı ve bir tarafdan Hazinedâr es-Seyyid Mustafa Ağa menzili ve tarafeyni tarîk-i âm ile mahdûd merhûm Mehmed Çelebi Vakfı musakkafâtından Kapıiçi fırını demekle arîf şehriye on altı guruş kirâlı bir bâb habbâz fırını derûnunda mevcûde beyne’l-esnâf gedik ta‘bîr olunur bâ-defter-i müfredât âlât-ı lâzime-i ma‘lûmenin yüz yirmi sehm i‘tibârıyla on iki sehm hisse-i şâyi‘ası müvekkilim Artin’in ve on buçuk sehm hisse-i şâyi‘ası diğer müvekkilim merkūm Mikail Râhib’in ve on üç buçuk sehm hisse-i şâyi‘ası benim ve otuz altı sehm hisse-i şâyi‘ası hâzır-ı asîl ve müvekkilûn-ı merkūmûn Ohannes ve Kigork ve Elmas ve Turfanda’nın babaları müteveffâ-yı merkūm Magdisi Haçador ile anaları müteveffât diğer Oskohi bt. Bahadur’dan irsen ve sekiz sehm hisse-i şâyi‘ası yine hâzır-ı asîl ve müvekkilûn-ı merkūmûn Ohannes ve Kigork ve Elmas ve Turfanda’nın min kıbeli’l-eb ceddeleri müteveffât âhar Elmas bt. Kirhor’dan bi-tarîki’l-münasaha irsen ve kırk sehm hisse-i şâyi‘ası dahi müvekkilûn-ı merkūmûn Oskohi ve Nişan ve Abris ve diğer Elmas ve Herzik ve Serpohi’nin müteveffâ-yı merkūm Zohrab’dan kezâlik irsen el-yevm yedimizde mülkümüz ve fırın-ı mezkûre merbût fırın-ı mezkûr karşısında camcı dükkânı ittisâlinde kâin şehriye yirmi beş guruş kirâlı ma‘lûmu’l-hudûd dört horosu habbâz ve bir horosu uncu ki cem‘an beş horoslu bir bâb değirmen derûnunda mevcûde beyne’l-esnâf gedik ta‘bîr olunur on altı re’s bârgir ekmekçi ve dört re’s bârgir uncu ki cem‘an yirmi re’s bârgir ve onlara tâbi‘ sâir âlât-ı lâzime-i ma‘lûmenin iki re’s bârgir ve onlara iktizâ eden âlât-ı sâiresi müvekkillerim merkūmândan merkūm Artin’in ve bir re’s bârgir on sekiz mıh ve ona îcâb eden âlât-ı sâiresi merkūm Mikail Râhib’in ve iki re’s bârgir altı mıh ve onlara îcâb eden âlât-ı sâiresi benim ve altı re’s bârgir ve onlara isâbet eden âlât-ı sâiresi hâzır asîl ve müvekkilûn-ı merkūmûn Ohannes ve Kigork ve Elmas ve Turfanda’nın babaları müteveffâ-yı merkūm Magdisi Haçador ile anaları müteveffât-ı merkūme diğer Oskohi’den irsen ve bir re’s bârgir sekiz mıh ve ona îcâb eden âlât-ı sâiresi yine hâzır-ı asîl ve müvekkilûn-ı merkūmûn Ohannes ve Kigork ve Elmas ve Turfanda’nın min kıbeli’l-eb ceddeleri müteveffât-ı merkūme âhar Elmas’dan bi-tarîki’l-münasaha irsen ve diğer altı re’s bârgir on altı mıh ve onlara iktizâ eden âlât-ı sâiresi dahi müvekkilûn-ı merkūmûndan Oskohi ve Nişan ve İris ve diğer Elmas ve Herzik ve Serpohi’nin müteveffâ-yı merkūm Zohrab’dan kezâlik irsen bâ-hücec-i şer‘iyye ve bâ-ilmühaber-i esnâf-ı merkūme yedimizde mülkümüz iken ben müvekkillerim merkūmân Artin ve Mikail Râhib ve hâzır-ı asîl ve müvekkilûn-ı merkūmûn Ohannes ve Kigork ve Elmas ve Turfanda ve Oskohi ve Nişan ve İris ve diğer Elmas ve Herzik ve Serpohi ber münvâl-i muharrer mâlik olduğumuz ancak fırın-ı mezkûr derûnunda mevcûde beyne’l-esnâf gedik ta‘bîr olunur yüz yirmi sehm i‘tibâr olunan âlât-ı lâzime-i ma‘lûmeyi yedimizde bi’l-ibkā mâ‘adâ değirmen-i mezkûr derûnunda mevcûde beyne’l-esnâf gedik ta‘bîr olunur yirmi re’s bârgir ve onlara tâbi‘ sâir âlât-ı lâzime-i ma‘lûme-i mezkûreyi bundan mukaddem Altıncı Dâire-i Belediye Riyâsetine semen-i ma‘lûm ve makbûza bey‘ ve teslîm etmemizle mâ‘adâ mârrü’z-zikr fırın gediği alâtı ber-minvâl-i muharrer benimle müvekkillerim merkūmân Artin ve Mikail Râhib ve hâzır-ı asîl ve vekîl ve müvekkilûn-ı merkūmûn Ohannes ve Kigork ve Elmas ve Turfanda ve Oskohi ve Nişan ve İris ve diğer Elmas ve Herzik ve Serpohi’nin mülkümüz olduğunu nâtık yedimizde müstakillen sened-i şer‘î olmamağla hakīkat-ı hâl husûs-ı mezkûre vukūf-ı tâmları olan kimesnelerden istihbâr ve suâl olunup haberleri tahrîr ve imlâ ile mârrü’z-zikr fırın gediği âlâtı ber-vech-i meşrûh benimle hâzır-ı asîl ve vekîl ve müvekkilûn-ı merkūmûnun mülkümüz olduğunu nâtıka kıbel-i şer‘den yedimize müstakillen birer kıt‘a hüccet-i şer‘iyye i‘tâ buyurulmak murâdımızdır deyu hâzırân-ı asîl ve vekîlân-ı merkūmân Ohannes ve Mardiros ile ma‘an bi’l-asâle ve bi’l-vekâle istid‘â etdiklerinde hâl asîl ve vukelâ-i merkūmûn Mıgırdıç ve Ohannes ve Mardiros’un bâlâda bast ve beyân eyledikleri minvâl üzere olduğunu husûs-ı mezkûre vukūf-ı tâmları olan esnâf-ı merkūmdan cerîdede mazbûtü’l-esâmî kimesnelerden her biri alâ tarîki’ş-şehâde haber vermeleriyle vâki‘-i hâl hıfzan li’l-makāl işbu vesîka-i enîka ketb ü imlâ olundu. Fî 20 Cumâdelûlâ sene 1279 Şuhûdü’l-hâl: Muhzır Ahmed Ağa b. ( ), Muhzır Mustafa Ağa b. ( ), Muhzır Şakir Ağa b. ( ), Muhzır Süleyman Ağa b. ( ), ve gayruhum