Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 531 Hüküm no: 641 Orijinal metin no: [112a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yeniçeri Receb Çavuş’un kölesi İvaz’ı azat etmesi Orta Çavuş Receb Ağa’nın abd-i memlûk[ü] İvaz ıtknâmesidir. Mahmiye-i İstanbul’da Hoşkadem mahallesi sâkinlerinden olup hâlâ yeniçeri ocağında orta çavuş olan fahrü’l-emâsil ve’l-akrân Receb Çavuş b. ( ) tarafından husûs-ı âti’l-beyâna vekîli olduğu el-Hâc Şaban b. Halil ve Eyyûb Beşe b. Mehmed nâm kimesneler şehâdetleriyle şer‘an sâbit olan vekîli el-Hâc Süleyman b. Hasan nâm kimesne meclis-i şer‘-i şerîfde bi’l-vekâle ikrâr ve takrîr-i kelâm edip müvekkil-i mezbûr Receb Çavuş kendiye rıkkını mu‘terif olan işbu uzun boylu sarı açık kaşlı koyun ala gözlü Hırvatiyyü’l-asl bâ‘isü hâze’l-kitâb İvaz b. Abdullah nâm abd-i memlûkünü, hasbeten lillâhi’l-meliki’l-Hallâk ve taleben li merzâti’r-rabbi’r-Rezzâk malından tahrîr ve i‘tâk ve zümre-i ahrâr-ı asliyyîne idrâc ve ilhâk eyledi ba‘de’l-yevm mevsûf-ı mezbûr İvaz sâir ahrâr-ı asliyyîn gibi hür olup üzerinde müvekkil-i mezbûr Receb Çavuş’un velâ-i şer‘îden [gayrı] hakkı bâkī kalmadı dedikde mâ vaka‘a bi’t-taleb ketb olundu. Fi’l-yevmi’s-sâlis aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Mehmed Ağa b. İbrahim Ağa, el-Hâc Şaban b. Mehmed, Eyyûb b. Mehmed, İbrahim b. Mehmed, Halil b. Mehmed.