Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 532 Hüküm no: 642 Orijinal metin no: [112a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Drako v. Kurt’un Mirza Reis v. Simon’da alacağı olduğu Mahmiye-i İstanbul’da Balatkapısı kurbunda Abdi Subaşı mahallesinde mütemekkin bâ‘isü hâze’s-sifr Drako v. Kurt nâm zimmî meclis-i şer‘-i şerîfde mahrûse-i Galata’ya tâbi‘ Yeniköy nâm karye sükkânından Mirza Reis v. Simon nâm zimmî muvâcehesinde üzerine da‘vâ ve takrîr-i kelâm edip mezbûr Mirza zimmetinde cihet-i karz-ı şer‘îden üç yüz yirmi esedî guruş hakkım olmağla mezbûr Mirza Reis’e suâl olunup meblağ-ı mezbûr üç yüz yirmi guruşun alıverilmesi matlûbumdur dedikde gıbbe’s-suâl mezbûr Mirza Reis cevâbında kaziyye minvâl-i muharrer üzre olup cihet-i mezkûreden meblağ-ı mezbûr üç yüz yirmi guruş zimmetinde müdde‘î-i merkūma Drako’ya vâcibü’l-edâ ve lâzımü’l-kazâ deyni olduğunu ikrâr etmeğin alâ mûcebi i‘tirâfihî meblağ-ı mezbûr üç yüz yirmi guruşu müdde‘î-i merkūma edâ ve teslîme mezbûr Mirza Reis’e tenbîh olunup mâ vaka‘a bi’t-taleb ketb olundu. Fi’l-yevmi’s-sâ[nî] aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: İbrahim Çelebi b. Mehmed, Mehmed b. İdris, Mehmed b. Mehmed, Mehmed b. Abdullah.