İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 276 Hüküm no: 176 Orijinal metin no: [37a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu esnâfından Karabet v. Mıgırdiç’in uncu değirmenindeki hisselerini damadı Ağya v. Hazer’e satması Danabaş değirmeni mübâya‘ası 15000 guruş Kezâlik teba‘a-i Devlet-i aliyye’nin Ermeni milletinden ve uncu esnâfından Karabet v. Mıgırdıç meclis-i şer‘-i şerîf-i hatîrde güveyisi teba‘a-i Devlet-i aliyye’nin Ermeni milletinden olduğu bâ-ilmühaber mütehakkık olan esnâf-ı mezkûreden bâ‘isü’r-rakīm Ağya v. Hazer muvâcehesinde ekmekçi ve uncu esnâfının kethüdâsı İbrahim Ağa b. Ahmed ile mazbûtü’l-esâmî nizâm ustaları taraflarından mürsel vekîlleri yiğitbaşısı es-Seyyid İsmail Efendi b. es-Seyyid Mehmed Emin hâzır olduğu hâlde ikrâr-ı tam ve takrîr-i kelâm edip mahmiye-i İstanbul hısnı ebvâbından Edirne kapısı dâhilinde Çukurbostan nâm mahalde kâin bir tarafdan tarîk-i hâs ve bir tarafdan menzil ve bir tarafdan Kuşakçı Yorgi bahçesi ve taraf-ı râbi‘i tarîk-i âm ile mahdûd şehriye on beş guruş kirâlı Danabaş değirmeni demekle arîf üç horoslu bir bâb uncu değirmeni derûnunda mevcûde beyne’l-esnâf gedik ta‘bîr olunur on iki re’s bârgir ve onlara tâbi‘ sâir âlât-ı lâzime-i ma‘lûmenin iki re’s bârgir ve onlara isâbet eden âlât-ı sâiresi Hazer’in yedinde mülkü olup mâ‘adâ on re’s bârgir ve onlara îcâb eden âlât-ı sâiresi dahi akd-i âti’z-zikrin sudûruna değin bin iki yüz yetmiş iki senesi şehr-i Rebî‘ülahirinin on ikinci günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan Sirozîzâde semâhatlü es-Seyyid Mehmed Tahir Efendi hazretlerinin imzâ ve hatemini hâviye işbu bir kıt‘a hüccet-i şer‘iyye ve kethüdâ-yı mûmâ-ileyhin takdîm eylediği bir kıt‘a ilmühaber nâtıklar olduğu üzere yedimde mülk ve hakkım olmağla ben ber-minvâl-i muharrer mâlik olduğum sâlifü’l-beyân on re’s bârgir ve onlara îcâb eden âlât-ı sâiresini tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şerîk on beş bin guruşa merkūm Ağya’ya bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm on beş bin guruşu tamamen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm sâlifü’l-beyân on re’s bârgir ve onlara îcâb eden âlât-ı sâiresinde benim aslâ ve kat‘â alâka ve medhalim kalmayıp merkūm Ağya’nın mülk-i müşterâsı ve hakk-ı sırfı olmuşdur dedikde gıbbe. Fî 5 Cumâdelûlâ sene 1279 Şuhûdü’l-hâl: Eş-şahidune’s-sabıkūn