İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 277 Hüküm no: 177 Orijinal metin no: [37b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarrâf Yanko v. Togofilos’in varilci dükkânını tüccârdan Mihal v. İstavri’ye satması Balık pazarında varilci gediği Kezâlik medîne-i Üsküdar’a muzâfe Çengel karyesinde sâkin teba‘a-i Devlet-i aliyye’nin Rum milletinden Sarrâf Yanko v. Togofilos meclis-i şer‘-i hatîrde karye-i mezkûrede sâkin teba‘a-i Devlet-i aliyye’nin Rum milletinden olduğu bâ-ilmühaber mütehakkık olan tüccârdan bâ‘isü’r-rakīm Gelaviroğlu Mihal v. İstavri muvâcehesinde her biri teba‘a-i Devlet-i aliyye’den varilci esnâfı kethüdâsı diğer Mihal v. Şahin ve yiğitbaşısı Memiko v. Angeli ve esnâfından Kosti v. İlya ve Anderya v. Kalodi ve Vangeli v. Yasef ve Hacı Vasil v. Aspero ve Kara Yani v. Yako ve Haci Tanaş v. Vasil hâzır oldukları hâlde ikrâr-ı tâm ve takrîr-i kelâm edip mahrûse-i Galata Balık pazarı hâricinde vâki‘ bir tarafdan esnâf-ı merkūmeden Yasef’in varilci dükkânı ve bir tarafdan esnâf-ı merkūme lonca odası ve bir tarafdan Bakkal Dimitri dükkânı ve taraf-ı râbi‘i tarîk-i âm ile mahdûd Eshâm Muhâsebesi kaleminde Yasef v. Mihal ismine mukayyed Ayasofya-i Kebîr Câmi‘-i şerîfi Vakfı müsakkafâtından benimle gāibe ani’l-meclis Arasti bt. Todori’nin bi’l-icâreteyn ale’l-iştirâk taht-ı tasarrufumuzda olan şehriye altı guruş kirâlı bir bâb varilci dükkânı ve ona merbût ittisâlinde vâki‘ bir bâb mağaza derûnlarında mevcûde beyne’l-esnâf gedik ta‘bîr olunur âlât-ı lâzime-i ma‘lûme yüz yirmi sehm i‘tibârıyla doksan iki buçuk sehm hisse-i şâyi‘ası bin iki yüz yetmiş beş senesi Zilka‘deti’ş-şerîfesinin üçüncü günü târihiyle müverraha ve ol târihde kasaba-i Kasımpaşa nâibi olan mevâlî-i izâmdan Şehrî es-Seyyid Süleyman Efendi merhûmun imzâ ve hatemini hâviye işbu bir kıt‘a mübâya‘a hücceti ve yirmi yedi buçuk hisse-i şâyi‘ası dahi bin iki yüz yetmiş altı senesi Muharremü’l-haramının onuncu günü târihiyle müverraha ve ol târihde mahrûse-i mezkûre kādısı olan fazîletlü el-Hâc Ahmed Hilmi Efendi’nin imzâ ve hatemini hâviye işbu diğer bir kıt‘a mübâya‘a hücceti ve kethüdâ-yı merkūmun takdîm eylediği bir kıt‘a ilmühaber mantûklarınca akd-i âti’z-zikrin sudûruna değin yedimde müstakillen mülk ve hakkım olmağla ben ber-minvâl mâlik olduğum âlât-ı gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile yirmi beş bin guruşa merkūm Mihal’e bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm yirmi beş bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-minvâl-i muharrer âharın ibrâsını kabûl eyledik, ba‘de’l-yevm âlât-ı gedik-i mezkûrde benim aslâ ve kat‘â alâka ve medhalim kalmayıp merkūm Mihal’in mülk-i müşterâsı ve hakk-ı sırfı olmuşdur dedikde gıbbe. Fî 23 Cumâdelâhire sene 1279 Şuhûdü’l-hâl: Muhzır Feyzullah Ağa b. ( ), Muhzır el-Hâc Salih Ağa b. ( ), Muhzır Ahmed Ağa b. ( ), Muhzır Süleyman Ağa b. ( ), ve gayruhum