İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 279 Hüküm no: 178 Orijinal metin no: [37b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccârdan Gavril v. müteveffâ Dimitri’nin mumhâne hisselerini Yolasığmazoğlu Anasti v. Kostandi’ye satması Ortaköy’de mumhâne gediği mübâya‘ası Kezâlik mahrûse-i Galata’ya muzâfe Ortaköy’de sâkin teba‘a-i Devlet-i aliyye’nin Rum milletinden ve tüccârdan Gavril v. el-müteveffâ Mayaoğlu Dimitri meclis-i şer‘-i şerîf-i hatîrde teba‘a-i Devlet-i aliyye’nin Rum milletinden olduğu bâ-ilmühaber mütehakkık olan bâ‘isü’r-rakīm mübâya‘a sarrâfı Yolasığmazoğlu Anasti v. Kostandi muvâcehesinde mumcu esnâfının kethüdâsı Ömer Ağa b. Süleyman hâzır olduğu hâlde ikrâr-ı tâm ve takrîr-i kelâm edip sâlifü’z-zikr Ortaköy’de vâki‘ bir tarafdan mîrî selhânesi ve bir tarafdan Yani’nin kasâb dükkânı ve bir tarafdan leb-i deryâ ve taraf-ı râbi‘i tarîk-i âm ile mahdûd İbrahim Paşa kethüdâsı merhûm Mehmed Kethüdâ Vakfı müsakkafâtından altı sehm i‘tibârıyla bir sehm hisse-i şâyi‘ası benim ve beş sehm hisse-i şâyi‘ası li-ebeveyn kız karındaşım gāibe ani’l-meclis Loksandire’nin bâ-temessükât-ı mütevelli bi’l-icâreteyn taht-ı tasarrufumuzda olan şehriye on guruş kirâ-yı kadîmelübir bâb mumhâne derûnunda müstakır ve mevcûd beyne’l-esnâf gedik ta‘bîr olunur âlât-ı lâzime-i ma‘lûme iki yüz on sehm i‘tibârıyla yüz otuz sehm hisse-i şâyi‘ası benim ve altmış beş sehm hisse-i şâyi‘ası gāibe-i merkūme Loksandire’nin ve on beş sehm hisse-i şâyi‘ası dahi gāib ani’l-meclis Mayora bt. Tohari’nin işbu şehr-i Rebî‘ülevveli’nin beşinci günü târihiyle müverraha İstanbul Mahkemesi’nden verilen bir kıt‘a hüccet-i şer‘iyye ve kethüdâ-yı hâzır-ı mûmâ-ileyhin takdîm eylediği bir kıt‘a ilmühaber mantûklarınca yedimizde irsen mülkümüz olmağla ben âlât-ı gedik-i mezkûrdan akd-i âti’z-zikrin sudûruna değin ber-minvâl-i muharrer mâlik olduğum yüz otuz sehm hisse-i şâyi‘a-i mezkûresini tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şerîketân-ı merkūmetân altı bin guruşa merkūm Anasti’ye bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm altı bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-minvâl-i muharrer âharın ibrâsını kabûl eyledik, ba‘de’l-yevm âlât-ı gedik-i mezkûrun ber i‘tibâr-ı merkūm yüz otuz sehm hisse-i şâyi‘a-i merkūmesinde benim aslâ ve kat‘â alâka ve medhalim kalmayıp merkūm Arasti’nin mülk-i müşterâsı ve hakk-ı sırfı olmuşdur dedikde gıbbe. Fî 24 Rebî‘ülevvel sene 1279 Şuhûdü’l-hâl: Muhzır el-Hâc Salih Ağa b. ( ), Muhzır Süleyman Ağa b. ( ), Muhzır Feyzullah Ağa b. ( ), Muhzır Şakir Ağa b. ( ), ve gayruhum