İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 280 Hüküm no: 179 Orijinal metin no: [37b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Dimitri’nin bakkal dükkânındaki hisselerini Yanko v. Varsamoğlu Kostandi’ye satması Rumelihisârı’nda bakkal gediği Kezâlik teba‘a-i Devlet-i aliyye’nin Rum milletinden ve bahçıvan esnâfından Nikola v. Dimitri meclis-i şer‘-i şerîf-i hatîrde teba‘a-i Devlet-i aliyye’nin Rum milletinden olduğu bâ-ilmühaber mütehakkık olan tütüncü esnâfından Yanko v. Varsamoğlu Kostandi muvâcehesinde bakkal esnâfının kethüdâsı Ahmed Efendi tarafından mürsel vekîli teba‘a-i Devlet-i aliyye’den esnâf-ı merkūme çavuşu Dimitri v. Yuvan hâzır olduğu hâlde ikrâr-ı tâm ve takrîr-i kelâm edip mahrûse-i Galata’ya muzâfe İstinye nâhiyesine tâbi‘ Rumelihisârı karyesinde kalaycı dükkânı ittisâlinde vâki‘ Şeyh Mahmud Efendi’nin bâ-temessük-i mütevelli bi’l-icâreteyn taht-ı tasarrufunda olan şehriye yedi buçuk guruş kirâlı Ayvaz Efendi dükkânı demekle arîf bir bâb bakkal dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin nısf hisse-i şâyi‘ası âharın ve diğer nısf hisse-i şâyi‘ası dahi beş sehm i‘tibârıyla üç sehm hisse-i şâyi‘ası kezâlik âharların yedlerinde mülkleri olup mâ‘adâ iki sehm hisse-i şâyi‘ası dahi akd-i âti’z-zikrin sudûruna değin sene-i sâbıka ya‘ni bin iki yüz yetmiş sekiz senesi Şa‘bânü’l-mu‘azzamının on beşinci günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan semâhatlü Mehmed Arif Hilmi Efendi hazretlerinin imzâsıyla mümzât ve hatmlarıyla mahtûme işbu bir kıt‘a mübâya‘a hücceti ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedimde mülk ve hakkım olmağla ben âlât-ı gedik-i mezkûrun nısf hisse-i şâyi‘a-i merkūmesinden ber-minvâl-i muharrer mâlik olduğum iki sehm hisse-i şâyi‘a-i merkūmesini tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ iki bin beş yüz guruşa merkūm Yanko’ya bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm iki bin beş yüz guruşu tamamen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrun nısf hisse-i şâyi‘a-i merkūmesinin iki sehm hisse-i şâyi‘a-i merkūmesinde benim aslâ ve kat‘â alâka ve medhalim kalmayıp merkūm Yanko’nun mülk-i müşterâsı ve hakk-ı sırfı olmuşdur dedikde gıbbe. Fî 21 Cumâdelâhire sene 1279 Şuhûdü’l-hâl: Muhzır Ahmed Ağa b. ( ), Muhzır Mustafa Ağa b. ( ), Muhzır Şakir Ağa b. ( ), Muhzır Süleyman Ağa b. ( ), ve gayruhum