İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 281 Hüküm no: 180 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu esnâfından Kuyumcuoğlu Hoca Badvagan v. Kokas’ın şerbethânesini Papasoğlu Melkest v. Ağyazar’a satması Beyoğlu’nda şerbethâne gediği Kezâlik mahmiye-i İstanbul’da Langa’da Kâtib Kasım mahallesinde sâkin teba‘a-i Devlet-i aliyye’nin Ermeni milletinden ve kuyumcu esnâfından Kuyumcuoğlu Hoca Badvagan v. Kokas meclis-i şer‘-i hatîr-i lâzımü’t-tevkīrde mahalle-i merkūmede sâkin teba‘a-i Devlet-i aliyye’den ve millet-i merkūmeden olduğu bâ-ilmühaber mütehakkık olan esnâf-ı merkūmeden işbu hâmilü’r-rakīm Papasoğlu Melkest v. Ağyazar muvâcehesinde her biri teba‘a-i Devlet-i aliyye’den ve esnâf-ı merkūme ustabaşılarından Nikola v. Apostol ve esnâf-ı merkūme çavuşu Artin v. Agop hâzır oldukları hâlde ikrâr-ı tâm ve takrîr-i kelâm edip mahrûse-i Galata hâricinde Beyoğlu’nda Hüseyin Ağa mahallesinde Sakızağacı nâm mahalde Subaşı kapısında vâki‘ bir tarafdan merhûm Tahir Paşa kethüdâsı Mustafa Efendi menzili ve bir tarafdan Cermanos bahçesi ve ba‘zen Ağya menzili ve ba‘zen Drohi menzili ve bir tarafdan Takohi bahçesi ve ba‘zen Sandalcı Oseb arsası ve taraf-ı [râbi‘i] tarîk-i âm ile mahdûd Sultan Bayezid-i Velî Hân hazretleri Vakfı müsakkafâtından merkūm Melkest’in bâ-temessük-i mütevelli bi’l-icâreteyn taht-ı tasarrufunda olan şehriye elli guruş kirâlı Haci Ananik şerbethânesi demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur yedimde olup bin iki yüz yetmiş üç senesi Saferi’l-hayrının onucu günü târihiyle müverrah ve ol târihde Zecriye Nâzırı olan sa‘âdetlü Rüstem Paşa’nın mührüyle memhûr bir kıt‘a sûret ve hâlâ Zecriye Nâzırı izzetlü Hüseyin Efendi’nin bir kıt‘a ilmühaberi mantûklarınca akd-i âti’z-zikrin sudûruna değin müstakillen yedimde mülk ve hakkım olan âlât-ı lâzime-i ma‘lûme-ima‘lûmeyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile Melkest’e on beş bin guruşa bey‘ ve temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı mezkûr on beş bin guruşu bana tamâmen ve kâmilen def‘ u teslîm eylediğinde ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-minvâl-i muharrer âharın ibrâsını kabûl eyledik, ba‘de’l-yevm âlât-ı gedik-i mezkûrde benim aslâ ve kat‘â alâka ve medhalim kalmayıp merkūm Melkest’in mülk-i müşterâsı ve hakk-ı sırfı olmuşdur dedikde gıbbe. Fî 7 Cumâdelâhire sene 1279 Şuhûdü’l-hâl: Muhzır Şakir Ağa b. ( ), Muhzır Mustafa Ağa b. ( ), Muhzır Süleyman Ağa b. ( ), Muhzır Feyzullah Ağa b. ( ), ve gayruhum