İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 282 Hüküm no: 181 Orijinal metin no: [38a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Zihnifelek Kadın bt. Abdullah’ın çeşitli eşyalarını Behiye Hanım bt. Silahdar Ali Paşa’ya hibe etmesi Husûs ilehibeve eşyâ mübâya‘ası Husûs-ı âti’l-beyânın mahallinde ketb ü tahrîri için cânib-i şerî‘at-ı garrâdan bi’l-iltimâs me’zûnen irsâl olunan Kâtib es-Seyyid Hafız Osman Nuri Efendi mahmiye-i İstanbul’da Ebü’l-feth Sultan Mehmed Hân-ı Gâzî aleyhi-rahmetü Rabbühü’l-bârî hazretleri Câmi‘-i şerîfi kurbünde Pirinççi Sinan mahallesinde vâki‘ sarrâc esnâfından es-Seyyid Mehmed Efendi’nin menziline varıp zeyl-i kitâbda muharrerü’l-esâmî müslimîn huzûrlarında akd-i meclis-i şer‘-i nebevî etdikde menzil-i mezkûrde misâfireten sâkine olup zâtı müslimûn-ı merkūmûn ta‘rîfleriyle mu‘arrefe olan Âişe Zihnifelek Kadın bt. Abdullah meclis-i ma‘kūd-ı mezkûrde merkūmenin mevlâ-yı atâkası sâbıkā Beğlikçi-i Divân-ı hümâyûn atûfetlü Afif Beyefendi hazretlerinin halîle-i muhteremeleri bâ‘isetü’l-kitâbi’l-müstetâb Behiye Hanım neclü’l-merhûmu’l-mebrûr Silahdâr Ali Paşa tarafından husûs-ı âti’l-beyânda tasdîka vekîl-i şer‘îleri mîr-i mûmâ-ileyhin vekilharcı Hâfız Mehmed Emin Ağa b. Hâfız Mehmed mahzarında ikrâr-ı tâm ve takrîr-i kelâm edip hibe-i atîyetü’z-zikrin sudûruna değin yedimde mâlım olup meclis-i şer‘de mu‘âyene olunan minekârî bir aded basma altın koyun sâ‘atimi hibe-i sahîha-i şer‘iyye ile müvekkile-i mûmâ-ileyhâ Behiye Hanım’a hibe ve temlîk ve meclis-i hibede teslîm eylediğimde ol dahi ber-vech-i muharrer ittihâb ve temellük ve tesellüm ve kabz u kabûl ve yine bey‘-i âti’z-zikrin sudûruna değin yedimde emvâlim olan yün memlû bir dokuma döşek ve bir penbe memlû basma şilte ve üç penbe memlû basma yorgan mâ‘a çârşeb ve penbe memlû iki yüz yasdığı ve beş kat elvân basma entari mâ‘a şalvar ve hırka ve bir laciverd ve dibet? kaplı musta‘mel nafe kürk ve bir çuka ferâce ve yarım zira‘ anber-i serşâl ve iki pirinç orta şam’danı ve beş ma‘den zarf mâ‘a fincan ve bir polat tepsi ve bir iskemle ve dört elvân yazma yemeni ve iki sagīr sepet sandığımı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkile-i mûmâ-ileyhâ Behiye Hanım’a iki bin guruş semen tesmiyesiyle bey‘ ve temlîk ve teslîm eylediğimde müvekkile-i mûmâ-ileyhâ dahi ber-minvâl-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı mezkûr iki bin guruşun mutâlebesine müte‘allika da‘vâdan müvekkile-i mûmâ-ileyhânın zimmetini ibrâ-yı sahîh-i şer‘î ile kabûlünü hâvî ibrâ vü ıskāt eyledim ba‘de’l-yevm zikr olunan sâ‘at ile eşyâ-i muharrere-i mezkûrede benim aslâ ve kat‘â alâka ve medhalim kalmayıp müvekkile-i mûmâ-ileyhânın emvâl-i mevhûbe ve müşterâtı ve hakk-ı sırfı olduğunda mâ‘adâ benim el-yevm üzerime lâbise olduğum bir kat köhne libâsımdan gayrı menzil-i mezkûr derûnunda ism-i mâl ıtlâk olunur kat‘an nesnem yokdur dedikde gıbbe’t-tasdîki’ş-şer‘î vâki‘ hâli kâtib-i mûmâ-ileyh mahallinde ketb ü tahrîr ilh. Fi 19 Cumâdelâhire sene 1279 Şuhûdü’l-hâl: Mahalle-i mezbûre imâmı es-Seyyid Halil Efendi b. Mehmed, Divriğili Sakâ Mustafa Ağa b. Hüseyin, Eğinli Sakâ İbrahim Ağa b. Mehmed, Kahveci Mustafa Ağa b. Mehmed, Çukadâr İbrahim Ağa b. ( ), Muhzır Mustafa Ağa b. ( )ve gayruhum