İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 284 Hüküm no: 183 Orijinal metin no: [38b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi esnâfından Marat’ın uncu değirmenindeki hisselerinin tümünü, kız kardeşi Manoş’un ise hisselerinin bir kısmını Serkiz v. Norses’e satması ve Serkiz’in hisselerini Ayşe Hanım bt. Abdullah’a satması Beşiktaş’da Köprübaşı’nda değirmen mübâya‘ası Kezâlik vilâyet-i Anadolu’da Eğin kazasına tâbi‘ İliç karyesinde sâkinler teba‘a-i Devlet-i aliyye’nin Ermeni milletinden ve ekmekçi esnâfından Marat v. Mardiros v. Melkon ve li-ebeveyn kız karındaşı Manoş taraflarından husûs-ı âti’l-beyânda bâ-hüccet-i şer‘iyye vekîllleri olduğu her biri teba‘a-i Devlet-i aliyye’nin Ermeni milletinden ve karye-i mezkûre ahâlisinden mahrûse-i Galata’da Babü’l-cisr dâhilinde vâki‘ ekmekçi fırını ustası Mıgırdıç v. Nikogos ve Havâss-ı Refî‘a kazasına muzâfe kasaba-i Hasköy’de Aynalıkavak nâm mahalde vâki‘ uncu değirmeni ustası Nişan v. Agop şehâdetleriyle ber-nehc -i şer‘î sâbit olan teba‘a-i Devlet-i aliyye’den ve uncu esnâfından Isador v. Kigork meclis-i şer‘-i hatîrde teba‘a-i Devlet-i aliyye’den ve esnâf-ı merkūmeden Serkiz v. Norses muvâcehesinde esnâf-ı merkūme kethüdâsı İbrahim Ağa b. Ahmed ile sâir mazbûtü’l-esâmî nizâm ustaları taraflarından mürsel vekîlleri Yiğitbaşı es-Seyyid İsmail Efendi b. es-Seyyid Mehmed Emin hâzır olduğu hâlde bi’l-vekâle ikrâr-ı tâm ve takrîr-i kelâm edip mahmiye-i merkūmeye muzâfe kasaba-i Beşiktaş’da Sinan Paşa mahallesinde Köprübaşı nâm mahalde hamam karşısında kâin bir tarafdan dere ve bir tarafdan bostan ve bir tarafdan el-Hâc Reşid Ağa’nın berber dükkânı ve taraf-ı râbi‘i tarîk-i âm ile mahdûd Emin-i ganem Mustafa Çavuş Vakfı müsakkafâtından müvekkillerim merkūmân Murat ve Manoş ve li-ebeveyn kız karındaşları gāibe ani’l-beled Vartohi’nin bâ-temessük-i mütevelli bi’l-icâreteyn taht-ı tasarruflarında olan şehriye on guruş kirâlı iki horoslu bir bâb kadîm uncu değirmeni derûnunda mevcûde beyne’l-esnâf gedik ta‘bîr olunur sekiz re’s bârgir ve onlara tâbi‘ sâir âlât-ı lâzime-i ma‘lûmenin iki re’s bârgir ve onlara isâbet eden âlât-ı sâiresi Beşiktaş sâhilsaray-ı hümâyûnu ekmekçi başısı rif‘atlü Mehmed Ağa’nın zevcesi Âişe Hanım bt. Abdullah’ın ve bir re’s bârgir ve ona îcâb eden âlât-ı sâiresi gāibe ani’l-meclis Margarit bt. Avanis’in ve bir re’s bârgir on sekiz mıh ve ona iktizâ eden âlât-ı sâiresi gāibe-i merkūme Vartohi’nin bâ-hücec-i şer‘iyye yedlerinde mülkleri ve bir re’s bârgir, oniki mıh ve ona isabet eden âlât-ı sâiresi müvekkilim merkūm Murat’ın ve diğer bir re’s bârgir on sekiz mıh ve ona îcâb eden âlât-ı sâiresi dahi diğer müvekkilem merkūme Manoş’un sene-i sâbıka yani bin iki yüz yetmiş sekiz senesi Cumâdelevvelinin üçüncü günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan semâhatlü Mehmed Arif Hilmi Efendi hazretlerinin imzâ ve hatemini hâviye işbu bir kıt‘a hüccet-i şer‘iyye ve kethüdâ-yı mûmâ-ileyhin takdîm eylediği bir kıt‘a ilmühaber nâtıklar olduğu üzere akd-i âti’z-zikrin sudûruna değin yedlerinde mülk ve hakları olmağla ben âlât-ı gedik-i mezkûrdan müvekkilim merkūm Marat’ın ber-minvâl-i muharrer mâlik olduğu sâlifü’l-beyân bir re’s bârgir on iki mıh ve ona isâbet eden âlât-ı sâiresini bi-safkatin vâhidetin yirmi yedi bin üç yüz yetmiş beş guruşa ve müvekkilem merkūme Manoş’un kezâlik ber-minvâl-i muharrer mâlike olduğu zikr olunan diğer bir re’s bârgir on sekiz mıh ve ona îcâb eden âlât-ı sâiresinin bir re’s bârgir altı mıh ve ona îcâb eden ala’t-ı sâiresini yedinde bi’l-ibkā mâ‘adâ on mıh ve ona îcâb eden ala’t-ı sâiresini kezâlik bi-safkatin vâhide dokuz bin yüz yirmi beş guruşa tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile bâ-izn-i şürekâ merkūm Serkiz’e bi’l-vekâle bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semenleri olan cem‘an otuz altı bin beş yüz guruşu tamâmen bana def‘ u teslîm ben dahi yedinden bi’l-vekâle tamâmen ahz u kabz edip mebî‘-i mezkûrların tağrîr ve gabnlarına müte‘allika da‘vâdan merkūm Serkiz’in zimmetini ibrâ-yı sahîh-i şer‘î ile müvekkillerim merkūmân Marat ve Manoş’a izâfetle bi’l-vekâle ibrâ vü ıskāt eylediğimde ol dahi kezâlik mebî‘-i mezkûrların tağrîr ve gabnlarına müte‘allika da‘vâdan müvekkillerim merkūmân Murat ve Manoş’un zimmetlerini ibrâ-yı sahîh-i şer‘î ile bi’l-asâle ibrâ vü ıskāt ve tarafeynden her birimiz ber-minvâl-i muharrer âharın ibrâsını asâleten ve vekâleten kabûl eyledik, ba‘de’l-yevm âlât-ı gedik-i mezkûrun cem‘an iki re’s bârgir ve onlara îcâb eden âlât-ı sâiresinde müvekkillerim merkūmân Marat ve Manoş’un aslâ ve kat‘â alâka ve medhalleri kalmayıp merkūm Serkiz’in mülk-i müşterâsı ve hakk-ı sırfı olmuşdur dedikde gıbbe’t-tasdîk merkūm Serkiz meclis-i şer‘-i hatîrde bâ‘isetü’l-kitâb mûmâ-ileyhâ Âişe Hanım tarafından husûs-ı âti’l-beyânda vekîl-i müsbit-i şer‘îsi es-Seyyid Hüseyin Hüsnü Bey b. es-Seyyid Süleyman Ağa mahzarında ikrâr-ı tâm ve takrîr-i kelâm edip ben dahi âlât-ı gedik-i mezkûrdan ânifen ber-minvâl-i muharrer mâlik olduğum iki re’s bârgir ve onlara îcâb eden âlât-ı sâiresini tarafeynden bi’l-îcâb ve’l-kabûl bâtten ve sahîhan bi-safkatin vâhidetin ve bâ-izn-i şürekâ otuz altı bin beş yüz guruş semen-i medfû‘ ve makbûza müvekkile-i mûmâ-ileyhâ Âişe Hanım için vekîl-i mûmâ-ileyh es-Seyyid Hüseyin Hüsnü Bey’e bey‘ ve temlîk ve vech-i lâyıkıyla teslîm eylediğimde ol dahi müvekkilesi mûmâ-ileyhâ Âişe Hanım için ber-vech-i muharrer bi’l-vekâle iştirâ ve temellük ve tesellüm ve kabz u kabûl edip mebî‘-i mezkûrun tağrîr ve gabnine müte‘allika da‘vâdan müvekkile-i mûmâ-ileyhâ Âişe Hanım’ın zimmetini ibrâ-yı sahîh-i şer‘î ile bi’l-asâle ibrâ vü ıskāt eylediğimde vekîl-i mûmâ-ileyh es-Seyyid Hüseyin Hüsnü Bey dahi kezâlik mebî‘-i mezkûrun tağrîr ve gabnine müte‘allika da‘vâdan benim zimmetimi ibrâ-yı sahîh-i şer‘î ile müvekkilesi mûmâ-ileyhâ Âişe Hanım’a izâfetle bi’l-vekâle ibrâ vü ıskāt ve tarafeynden her birimiz ber-minvâl-i muharrer âharın ibrâsını asâleten ve vekâleten kabûl eyledik, ba‘de’l-yevm sâlifü’l-beyân iki re’s bârgir ve onlara îcâb eden âlât-ı sâiresinde benim aslâ ve kat‘â alâka ve medhalim kalmayıp âlât-ı gedik-i mezkûrun iki re’s bârgir ve onlara isâbet eden âlât-ı sâiresi mukaddemâ ve diğer iki re’s bârgir ve onlara îcâb eden âlât-ı sâiresi dahi bu def‘a şirâen ki cem‘an dört re’s bârgir ve onlara isâbet eden âlât-ı sâiresi müvekkile-i mûmâ-ileyhâ Âişe Hanım’ın mülk-i mahz ve hakk-ı sırfı olmuşdur dedikde gıbbe. Fî 3 Receb sene 1279 Şuhûdü’l-hâl: Muhzır Ahmed Ağa b. ( ), Muhzır Feyzullah Ağa b. ( ), Muhzır Şakir Ağa b. ( ),, Muhzır Mustafa Ağa b. ( ), ve gayruhum