İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 286 Hüküm no: 184 Orijinal metin no: [38b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Huriye Hanım’ın boşandığı eşi tahrîrat odası ketebesinden Abdullah Akif Efendi’ye on aylık kızları için aylık 80 kuruş nafaka bağlattırması Nafaka-i sagīr 80 guruş Mahmiye-i İstanbul’da Tavuk Pazarı civârında Hüseyin Ağa mahallesinde sâkine zâtı ta‘rîf-i şer‘î ile mu‘arrefe olan bâ‘isetü’l-kitâb Emine Huriye Hanım bt. el-hâzır Ahmed meclis-i şer‘-i şerîf-i lâzımü’t-teşrîfde zevc-i sâbıkı Evkāf-ı hümâyûn hazine-i celîlesinde tahrîrat odası ketebesinden Abdullah Akif Efendi b. el-hâzır el-Hâc Mehmed Ağa mahzarında takrîr-i kelâm ve ta‘bîr ani’l-merâm edip mûmâ-ileyh Abdullah Akif Efendi ile mukaddemâ zevciyet beynimizde kāime iken mûmâ-ileyhin firâşından hâsıla ve benden mütevellide bi-hakkı’l-hıdâne hâlâ hacr ve terbiyemde olan sulbiye kızı tahmînen on aylık Âişe Sıdıka nâm sagīrenin aslâ mâlı olmayıp nafaka ve kisveye eşedd-i ihtiyâc ile muhtâce olmağla sagīre-i mezbûrenin nafaka ve kisve-bahâsı için pederi mûmâ-ileyh Abdullah Akif Efendi üzerine kıbel-i şer‘den kadr-ı ma‘rûf meblağ farz ve takdîr buyurulmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i hâsim-i vâlâ-cenâbi’l-muvakki‘ ismuhu fî sadri’l-kitâb tûbâ lehû ve hüsnü me’âb efendi hazretleri dahi sagīre-i mezbûrenin nafaka ve kisve-bahâsı için pederi mûmâ-ileyh Abdullah Akif Efendi üzerine işbu târih-i kitâbdan bi’t-terâzi beher şehr seksen guruş farz ve takdîr buyurup meblağ-ı mefrûz-ı mezkûr beher şehr seksen guruşu sagīre-i mezbûrenin nafaka ve kisve ve sâir levâzım-ı zarûriyesine harc u sarfa ve lede’l-iktizâ istidâneye ve inde’z-zafer pederi mûmâ-ileyh Abdullah Akif Efendi üzerine rucû‘a vâlidesi ve hâdinesi mezbûre Emine Huriye Hanım’a izin vermeğin mâ-vaka‘a bi’t-taleb ketb olundu. 8 Şa‘bân sene 1279 Şuhûdü’l-hâl: Muhzır Ahmed Ağa b. ( ), Muhzır Feyzullah Ağa b. ( ), Muhzır Şakir Ağa b. ( ), Muhzır Mustafa Ağa b. ( ), ve gayruhum