İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 287 Hüküm no: 185 Orijinal metin no: [39a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Papasoğlu Hoca Melkest v. Ağyazar’ın sıvacı esnâfından Ahmed Ağa b. İbrahim Edhem’e olan borcunu ödemesi İbrâ Mahmiye-i İstanbul’da Aksaray kurbünde Murad Paşa mahallesinde berber dükkânında sâkin sıvacı esnâfından Âsitâneli Ahmed Ağa b. İbrahim Edhem meclis-i şer‘-i şerîf-i lâzımü’t-teşrîfde kuyumcu nizâm ustalarından işbu hâmilü’r-rakīm Papasoğlu Hoca Melkest v. Ağyazar muvâcehesinde kuyumcu esnâfı kethüdâsı Abdullah Ağa b. Ali ve ustabaşılarından Muhammen Kornik v. Bogos ve Yiğitbaşı Haci Seropa v. Adam ve usta Ağya v. Mıgırdıç hâzır oldukları hâlde ikrâr-ı tâm ve takrîr-i kelâm edip merkūm Melkest zimmetinde bundan mukaddem mâlımdan ve yedimden iktirâz ve kabz ve umûruna sarfla istihlâk eylediği iki bin guruş alacak hakkım olduğundan meblağ-ı merkūm iki bin guruşu merkūm Melkest işbu târih-i kitâbdan üç ay mukaddem bana def‘ ve teslim ben dahi yedinden bi’t-tamâm ve ve’l-kemâl ahz u kabz etmemle husûs-ı mezkûre ve işbu târih-i vesikâya gelince sâir cemi‘-i hukūk-ı şer‘iyyeye müte‘allika âmme-i de‘âvîden tarafeynden her birimiz âharın zimmetini ibrâ-ı âmm-ı sahîh-i şer‘î ile ibrâ vü ıskāt ve her birimiz ber-vech-i muharrer âharın ibrâsını kabûl eyledik, dedikde gıbbe. Fî 2 Receb sene 1279 Şuhûdü’l-hâl: Muhzır Ahmed Ağa b. ( ), Muhzır Mustafa Ağa b.( ), Muhzır Yusuf Ağa b.( ), Muhzır el-Hâc Salih Ağa b. ( ), Esnâf-ı merkūme yiğitbaşısı Hacı Mıgırdiç, Yine yiğitbaşı Bedros, Ve yazıcı Serope, ve gayruhum