İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 288 Hüküm no: 186 Orijinal metin no: [39a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihri Hanım’ın boşandığı eşi Defterhâne-i âmire ketebesinden İbrahim Edhem Ratib Efendi’ye beş yaşındaki kızları için aylık 100 kuruş nafaka bağlattırması Nafaka-i sagīr 100 guruş Mahmiye-i İstanbul hısnı ebvâbından Ahırkapı kurbünde Akbıyık mahallesinde sâkine zâtı ta‘rîf-i şer‘î ile mu‘arrefe olan bâ‘isetü’l-kitâb Mihri Hanım bt. Mehmed Said meclis-i şer‘-i şerîf-i enverde zevc-i mutallıkı mahalle-i merkūmede sâkin Defterhâne-i âmire ketebesinden İbrahim Edhem Ratib Efendi b. Halil mahzarında takrîr-i kelâm ve ta‘bîr ani’l-merâm edip mûmâ-ileyh İbrahim Edhem Ratib Efendi ile mukaddemâ zevciyet beynimizde kāime iken mûmâ-ileyhin firâşından hâsıla ve benden mütevellide bi-hakkı’l-hıdâne hâlâ hacr ve terbiyemde olan sulbiye kızı tahmînen beş yaşında Emine Rasime nâm sagīrenin aslâ mâlı olmayıp nafaka ve kisveye eşedd-i ihtiyâc ile muhtâce olmağla sagīre-i mezbûrenin nafaka ve kisve ve sâir levâzım-ı zarûriyesi için pederi mûmâ-ileyh İbrahim Edhem Ratib Efendi üzerine kıbel-i şer‘den kadr-ı ma‘rûf nafaka farz ve takdîr buyurulmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i hâsim-i vâlâ-cenâbi’l-muvakki‘ ismuhû fî sadri’l-kitâb tûbâ lehû ve hüsnü me’âb efendi hazretleri dahi sagīre-i mezbûrenin nafaka ve kisve-bahâsı için pederi mûmâ-ileyh İbrahim Edhem Ratib Efendi üzerine işbu târih-i kitâbdan i‘tibâren bi’t-terâzi beher şehr yüz guruş farz ve takdîr buyurup meblağ-ı mefrûz-ı mezkûr beher şehr yüz guruşu sagīre-i mezbûrenin nafaka ve kisve ve sâir levâzım-ı zarûriyesine harc u sarfa ve lede’l-iktizâ istidâneye ve inde’z-zafer pederi mûmâ-ileyh İbrahim Edhem Ratib Efendi üzerine rucû‘a vâlidesi ve hâdinesi mezbûre Mihri Hanım’a izin vermeğin mâ-vaka‘a bi’t-taleb ketb olundu. FÎ 9 Receb sene 1279 Şuhûdü’l-hâl: Muhzır Ahmed Ağa b. ( ), Muhzır Osman Ağa b. ( ), Muhzır Feyzullah Ağa b. ( ), Muhzır el-Hâc Salih Ağa b.( ), Mübâşiri Sultan Ahmedli İbrahim Çavuş b. ( ), ve gayruhum