İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 289 Hüküm no: 187 Orijinal metin no: [39a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mirasçılarının Kuds-i Şerîf’de vefât eden kürkçü esnâfından Yuda v. Yako’nun mirasını paylaşmaları İbrâ Mahrûse-i Galata’da Karaköy kapısı dâhilinde Senavî sokağı ahâlisinden olup Kuds-i Şerîf’de sâkin iken bundan mukaddem fevt olan teba‘a-i Devlet-i aliyye’nin Yahud milletinden ve kürkçü esnâfından Yuda v. Yako v. Adam’ın verâseti her biri teba‘a-i Devlet-i aliyye’den sulbî kebîr oğlu sokak-ı mezkûrda sâkin Balıkçı Mişon ve mahmiye-i İstanbul hısnı ebvâbından Balat kapısı dâhilinde Hacı İsa mahallesinde sâkine sadriye kebîre kızı Polisa Ester’e münhasıra olduğu lede’ş-şer‘î’l-enver zâhir ve mütehakkık oldukdan sonra şahsı mahalle-i mezkûre ahâlisinden ve teba‘a-i Devlet-i aliyye’nin Yahud milletinden Tuhafçı Menahim v. Yasef ve şerbethâneci Yuda v. diğer Yasef ta‘rîfleriyle mu‘arrefe olan merkūme Polisa Ester meclis-i şer‘-i şerîf-i hatîrde bâisü’r-rakīm merkūm Mişon muvâcehesinde ikrâr-ı tâm ve takrîr-i kelâm edip ben karındaşım merkūm Mişon ile babamız müteveffâ-yı merkūm Yuda’nın bize mevrûs olan bi’l-cümle terekesini mesele-i mirâsımız vechile beynimizde iktisâm ve her birimiz hises-i musîbemizi tamâmen ahz u kabz ve istifâ-yı hakk etmemizle müteveffâ-yı merkūmun kalîl ü kesîr celîl ü hakîr ma‘lûm ve mechûl ism-i mâl ıtlâk bi’l-cümle terekesine ve hukūk-ı mirâsa müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-minvâl-i muharrer âharın ibrâsını kabûl eyledik, dedikde gıbbe. 16 Receb sene 1279 Şuhûdü’l-hâl: Muhzır el-Hâc Yusuf Ağa b. ( ), Muhzır Süleyman Ağa b. ( ), Muhzır Ahmed Ağa b. ( ), Muhzır Şakir Ağa b. ( ), ve gayruhum