İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 289 Hüküm no: 188 Orijinal metin no: [39a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Şükrü Ağa b. Ahmed’in kızı Şerife Nefise Hanım’a eşya satması Husûs Husûs-ı âti’l-beyânın mahallinde ketb ü tahrîri için cânib-i şerî‘at-ı garrâdan bi’l-iltimâs me’zûnen irsâl olunan Kâtib es-Seyyid Hafız Osman Nuri Efendi mahmiye-i İstanbul’da Sarıgez kurbünde İskender Paşa mahallesinde vâki‘ Zahîre Gümrüğü hademesinden es-Seyyid Mehmed Şükrü Ağa b. Ahmed’in sâkin olduğu menzile varıp zeyl-i vesîkada muharrerü’l-esâmî müslimîn huzûrlarında akd-i meclis-i şer‘-i nebevî etdikde mezbûr es-Seyyid Mehmed Şükrü Ağa meclis-i ma‘kūd-ı mezkûrde sulbiye kerîmesi olup zâtı müslimûn-ı mezbūrûn ta‘rîfleriyle mu‘arrefe olan işbu bâ‘isetü’l-kitâb Şerife Nefise Hanım mahzarında ikrâr-ı tâm ve takrîr-i kelâm edip akd-i âti’z-zikrin sudûruna [değin] yedimde emvâlim olan mecmû‘u müsta‘mel yün memlû bir Moskov bezi döşek ve penbe memlû bir basma şilte ve üç basma yorgan mâ‘a çârşeb ve penbe memlû bir basma yüz yasdığı ve iki nuhâs tencere ve beş nuhâs sahan ma‘a kapak ve bir nuhâs mangal ve bir nuhâs leğen ma‘a ibrik ve iki keçemi tarafeynden bi’l-emr ve’l-kabûl bâtten ve sahîhan bi-safkatin vâhidetin mezbûre Şerife Nefise Hanım’a yedi yüz elli guruşa bey‘ ve temlîk ve teslîm eylediğimde ol dahi iştirâ ve temellük ve tesellüm ve kabz u kabûl edip semeni olan meblağ-ı mezkûr yedi yüz elli guruşu bana tamâmen def‘ u teslîm eylediğinde ben dahi yedinden tamâmen ve kâmilen ahz u kabz edip mebî‘-i mezkûrde tağrîr ve gabn vukū‘una müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-minvâl-i muharrer âharın ibrâsını kabûl eyledik, ba‘de’l-yevm eşyâ ve evânî-i nuhâsiye-i muharrere-i mezkûrede benim aslâ ve kat‘â alâka ve medhalim kalmayıp kerimem mezbûrenin mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î vâki‘ hâli kâtib-i mûmâ-iley mahallinde ketb ü tahrîr ve ma‘an meb‘ûs ümenâ-i şer‘le meclis-i şer‘e gelip alâ vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fî 12 Receb sene 1279 Şuhûdü’l-hâl: Muhzır el-Hâc Salih Ağa b. ( ), Çukadar Ahmed Ağa b. ( ), Mahmudpaşa mahkemesi ketebesinden Sadık Efendi b. Ahmed Şükrü, mahalle-i merkūme ahâlisinden Kaşıkçı es-Seyyid el-Hâc Mustafa Efendi b. es-Seyyid Mehmed, mahalle-i merkūme muhtâr-ı sânîsi Ahmed Şükrü Ağa b. el-Hâc Mehmed, Mezbûre Şerife Nefise Hanım’ın zevci Musîka-i Şâhâne yüzbaşılarından Mehmed Şevket Efendi b. Hasan, ve gayruhum