İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 290 Hüküm no: 189 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi esnâfından Margos v. Babacan’ın kayıkçı esnâfından Zafiri v. Andon’dan aldığı borç karşılığında ekmek fırını ve değirmenlerindeki hisselerini rehin vermesi İdâne 16000 guruş Teba‘a-i Devlet-i aliyye’nin Ermeni milletinden ve ekmekçi esnâfından Margos v. Babacan meclis-i şer‘-i şerîf-i hatîrde teba‘a-i Devlet-i aliyye’nin Rum milletinden ve kayıkçı esnâfından bâ‘isü’r-rakīm Kanlıcak karyeli Zafiri v. Andon muvâcehesinde ekmekçi ve uncu esnâfı kethüdâsı İbrahim Ağa b. Ahmed ile mazbûtü’l-esâmî nizâm ustaları taraflarından mürsel vekîlleri Yiğitbaşı es-Seyyid İsmail Efendi b. es-Seyyid Mehmed Emin hâzır olduğu hâlde ikrâr-ı tâm ve takrîr-i kelâm edip medîne-i Üsküdar’a muzâfe Beykoz kasabasında vâki‘ ma‘lûmu’l-hudûd bir bâb ekmekçi fırını ve ona merbût kasaba-i merkūmede kâin kezâlik ma‘lûmu’l-hudûd üç horoslu bir bâb ekmekçi değirmeni ve Kanlıcak karyesinde kâin kezâlik ma‘lûm bir bâb ekmekçi fırını ve ona merbût Körfez nâm mahalde vâki‘ kezâlik ma‘lûmu’l-hudûd beş horoslu bir bâb değirmen ve Paşabahçesi nâm mahalde vâki‘ kezâlik ma‘lûmu’l-hudûd iki horoslu bir bâb değirmen derûnlarında mevcûde beyne’l-esnâf gedik ta‘bîr olunur kırk re’s bârgir ve onlara tâbi‘ sâir âlât-ı lâzime-i ma‘lûmenin otuz yedi re’s bârgir altı mıh ve onlara isâbet eden âlât-ı sâiresi âharların yedlerinde mülkleri olup mâ‘adâ iki re’s bârgir on sekiz mıh ve onlara îcâb eden âlât-ı sâiresi bin iki yüz elli yedi senesi Muharremü’l-haramının dokuzuncu günü târihiyle müverraha ve ol târihde Dârü’l-hilâfeti’l-aliyye kādısı olan Reşid Beyzâde Mehmed Beyefendi merhûmun imzâ ve hateminihâviye işbu bir kıt‘a hüccet-i şer‘iyye ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca müstakilleten yedimde mülk ve hakkım olmağla ben merkūm Zafiri’nin zikr-i âtî mâlından ve yedinden istidâne ve kabz edeceğim mukābelesinde ber-minvâl-i muharrer mâlik olduğum iki re’s bârgir on sekiz mıh ve onlara îcâb eden âlât-ı sâireyi bâ-izn-i şürekâ rehn vaz‘ ve merkūm Zafiri’ye vech-i lâyıkıyla teslîm eylediğimde ol dahi ber-vech-i muharrer irtihân ve tesellüm ve kabz u kabûl eyledikden sonra merkūm Zafiri bana mâlından on altı bin guruş idâne ve teslîm eylediğinde ben dahi yedinden istidâne ve kabz ve umûruma sarfla istihlâk edip meblağ-ı merkūm on altı bin guruş zimmetimde merkūm Zafiri’ye cihet-i mezkûreden el-yevm sahîhan deynim olmağla eğer ben meblağ-ı merkūm on altı bin guruşu işbu târih-i rakīmden üç sene tamâmında merkūm Zafiri’ye edâ ile sâlifü’l-beyân iki re’s bârgir on sekiz mıh ve onlara îcâb eden âlât-ı sâireyi rehniyetden fek ve tahlîs edemez isem zikr olunan iki re’s bârgir on sekiz mıh ve onlara îcâb eden âlât-ı sâireyi semen-i misilleriyle âhara bey‘a ve kabz-ı semene ve makbûzundan deyn-i merkūm on altı bin guruşu istifâya ve fazla kalır ise fazlasını bana teslîme ve husûs-ı mezkûr mütevakkıf olduğu umûrun küllisine tarafımdan merkūm Zafiri’yi küllemâ azeltüke fe-ente vekîlî mefhûmu üzere azl ve in‘izâlden masûne ve akd-i rehnde meşrûta vekâlet-i devriye-i sahîha-i şer‘iyye ile vekîl ve nâib-i menâb nasb ve ta‘yîn eylediğimde ol dahi ber-vech-i muharrer vekâlet-i mezkûreyi kabûl ve merâsimini kemâ-yenbagī vaktinde edâya ta‘ahhüd ve iltizâm eyledi dedikde gıbbe. Fî 17 Muharrem sene 1279 Şuhûdü’l-hâl: Salıcı Topal İbrahim Edhem Ağa b. Mustafa, Salıcı Ahmed Ağa b. Mehmed, Salıcı el-Hâc Mehmed Ağa b. Ali, Muhzır Şakir Ağa b. ( ), Muhzır Süleyman Ağa b. ( ), ve gayruhum