İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 291 Hüküm no: 190 Orijinal metin no: [39b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agina bt. Karabet ile erkek kardeşinin oğlu Karabet v. Artin’in uncu değirmenindeki hisselerini Avrupa tüccârından Tekfurdağlı Ohannes v. Agop’a satmaları Ahmediye’de değirmen Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen mahmiye-i İstanbul hısnı ebvâbından Topkapı dâhilinde Bayezid Ağa mahallesinde sâkine teba‘a-i Devlet-i aliyye’nin Ermeni milleti nisvânından şahsı ta‘rîf-i şer‘î ile mu‘arrefe olan Agina bt. Karabet li-ebeveyn er karındaşı oğlu teba‘a-i Devlet-i aliyye’nin Ermeni milletinden Karabet v. Artin hâzır olduğu hâlde meclis-i şer‘-i şerîf-i hatîrde teba‘a-i Devlet-i aliyye’nin Ermeni milletinden ve Avrupa tüccârından olduğu bâ-ilmühaber mütehakkık olan bâ‘isü’r-rakīm Tekfurdağlı Ohannes v. Agop muvâcehesinde ekmekçi ve uncu esnâfının kethüdâsı İbrahim Ağa b. Ahmed ile mazbûtü’l-esâmî nizâm ustaları taraflarından mürsel vekilleri Yiğitbaşı es-Seyyid İsmail Efendi b. es-Seyyid Mehmed Emin hâzır olduğu hâlde ikrâr-ı tâm ve takrîr-i kelâm edip mahmiye-i mezkûrede Ahmediye ismiyle müsemmâ olan mahallin üçüncü tarafında kâin bir tarafdan câmi‘-i şerîf arsası ve bir tarafdan Örücü Abdülhamid Ağa bahçesi ve tarafeyni tarîk-i âm ile mahdûd cennet-mekân merhûm ve mağfiret-nişân Sultan Ahmed Hân-ı Evvel aleyhi’r-rahmetirabbihi’l-ecel hazretlerinin evkāf-ı celîleleri musakkafâtından Mustafa Nuri Efendi b. Hüseyin Hüsnü Efendi’nin taht-ı tasarrufunda olan şehriye otuz guruş kirâlıterbî‘an iki bin zirâ‘ arsalı dört horoslu bir bâb uncu değirmeni derûnunda mevcûde beyne’l-esnâf gedik ta‘bîr olunur on altı re’s bârgir ve onlara tâbi‘ sâir âlât-ı lâzime-i ma‘lûmenin altı re’s bârgir altı mıh ve onlara isâbet eden âlât-ı sâiresi gāibe ani’l-meclis Yesdos bt. Karabet’in yedinde mülkü olup mâ‘adâ bir re’s bârgir on sekiz mıh ve ona îcâb eden âlât-ı sâiresi benim ve sekiz re’s bârgir ve onlara iktizâ eden âlât-ı sâiresi dahi hâzır-ı merkūm Karabet’in akd-i âti’z-zikrin sudûruna değin bin iki yüz altmış üç senesi Muharremü’l-harâmının on dokuzuncu günü tarihiyle müverraha ve ol târihde Dârü’l-hilâfeti’l-aliyye kādısı olan Kahvecibaşızâde Mehmed Nurullah Efendi merhûmun imzâ ve hatemini hâviye işbu bir kıt‘a hüccet-i şer‘iyye nâtıka olduğu üzere yedimizde mülkümüz olmağla ben âlât-ı gedik-i mezkûrdan ber-minvâl-i muharrer mâlike olduğum sâlifü’l-beyân bir re’s bârgir on sekiz mıh ve ona îcâb eden âlât-ı sâiresini bi-safkatin vâhidetin dört bin beş yüz guruşa ve hâzır-ı merkūm Karabet dahi kezâlik ber-minvâl-i muharrer mâlik olduğu mârrü’l-beyân sekiz re’s bârgir ve onlara iktizâ eden âlât-ı sâiresini bi-safkatin vâhidetin yirmi bin beş yüz guruşa bâ-ilmühaber tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile bâ-izn-i şerîke-i merkūme merkūm Ohannes’e bey‘ ve temlîk ve vech-i lâyıkı üzere teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semenleri olan cem‘an yirmi beş bin guruşu tamâmen bize def‘ u teslîm biz dahi yedinden bi’t-tamâm ve’l-kemâl ahz u kabz edip mebî‘-i mezkûrların tağrîr ve gabnlarına müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik fîmâ-ba’d âlât-ı gedik-i mezkûrun cem‘an dokuz re’s bârgir on sekiz mıh ve onlara iktizâ eden âlât-ı sâiresinde benimle merkūm Karabet’in aslâ ve kat‘â alâka ve medhalimiz kalmayıp merkūm Ohannes’in mâlik-i [mülk] müşterâsı ve hakk-ı sırfı olmuşdur dedikde gıbbe’t-tasadûki’ş-şer‘î mâ-vaka‘a bi’t-taleb ketb olundu. Fî 27 Safer sene 1279 Şuhûdü’l-hâl: Muhzır Ahmed Ağa b. ( ), Muhzır el-Hâc Salih Ağa b. ( ), Muhzır Mustafa Ağa b. ( ), Muhzır Süleyman Ağa b. ( ), ve gayruhum