İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 294 Hüküm no: 192 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü esnâfından Mehmed Arif Ağa b. Hacı Ali’nin tütüncü dükkânını Yufkacı Ahmed Ağa b. Durmuş’a satması Aksaray’da tütüncü Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gedikleriyle gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen tütüncü esnâfından Mehmed Arif Ağa b. el-Hâc Ali meclis-i şer‘-i şerîf-i enverde bâ‘isü’l-kitâb Yufkacı Ahmed Ağa b. Durmuş mahzarında tütüncü esnâfının kethüdâsı es-Seyyid el-Hâc Mehmed Abdüllatif Efendi ile duhân tüccârından mazbûtü’l-esâmî on nefer müslim ve beş nefer hıristiyan lonca ihtiyârları taraflarından mürsel Kethüdâ Vekîli Ahmed Efendi b. Osman hâzır olduğu hâlde ikrâr-ı tâm ve takrîr-i kelâm edip mahmiye-i İstanbul’da Aksaray kurbünde Gureba Hüseyin Ağa mahallesinde vâki‘ bir tarafdan Papasoğlu Kosti dükkânı ve bir tarafdan Tütüncü Dimitri dükkânı ve bir tarafdan benim tasarrufumda olan hân ve tarâf-ı râbi‘i tarîk-i âm ile mahdûd merhûm Arakiyeci Üveys Vakfı müsakkafâtından benim taht-ı tasarrufumda olan şehriye üç guruş kirâlı bir bodrumu müştemil bir bâb tütüncü dükkânı derûnunda mevcûde beyne’l-esnâf gedik ta‘bîr olunur bâ-defter-i müfredât âlât-ı lâzime-i ma‘lûme bin iki yüz yetmiş beş senesi Saferi’l-hayrının yirmi beşinci günü târihiyle müverrah semâhatlü Mustafa Asım Efendi hazretlerinin İstanbul kādılığı zamanında olan mazbata kaydı ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedimde müstakillen mülk ve hakkım olmağla ben ber-vech-i muharrer mâlik olduğum âlât-ı gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr Ahmed Ağa’ya on üç bin guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm on üç bin guruşu tamâmen bana def‘ u teslîm eylediğinde ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrde benim aslâ ve kat‘â alâka ve medhalim kalmayıp mezbûr Ahmed Ağa’nın mülk-i müşterası ve hakk-ı sırfı olmuşdur dedikde gıbbe. Fî 27 Muharrem sene 1279 Şuhûdü’l-hâl: Muhzır Süleyman Ağa b. ( ), Muhzır Feyzullah Ağa b. ( ), Muhzır Şakir Ağa b. ( ), Muhzır Ahmed Ağa b. ( ), ve gayruhum