İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 297 Hüküm no: 194 Orijinal metin no: [40a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Protestan milletinden Şazik bt. Haçador’un kocası Ermeni milletinden ve tüccârdan Haçador v. Matyus’a üç buçuk yaşındaki oğulları için aylık 200 kuruş nafaka bağlattırması Nafaka 200 guruş Teba‘a-i Devlet-i aliyye’nin Protestan milleti nisvânından olup şahsı ta‘rîf-i şer‘î ile mu‘arrefe olan hâmiletü’r-rakīm Şazik bt. Haçador meclis-i şer‘î hatîr-i lâzımü’t-tevkīrde hâlâ zevci teba‘a-i Devlet-i aliyye’nin Ermeni milletinden ve tüccârdan Haçador v. Matyus mahzarında takrîr-i kelâm ve ta‘bîr ani’l-merâm edip el-yevm zevcim olan merkūm Haçador’un firâşından hâsıl ve benden mütevellid hâlâ bi-hakkı’l-hıdâne hacr ve terbiyemde olan sulbî oğlu tahmînen üç buçuk yaşında Maykıl nâm sagīrin aslâ mâlı olmayıp nafaka ve kisveye eşedd-i ihtiyâc ile muhtâc olmağla sagīr-i mezbûrun nafaka ve kisve ve sâir levâzım-ı zarûriyesi için babası merkūm Haçador üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde gıbbe’t-tasdîk hâkim-i hâsim-i vâlâ-cenâbi’l-muvakki‘ ismuhû fî sadri’l-kitâb tûbâ lehû ve hüsnü me’âb efendi hazretleri dahi sagīr-i merkūmun nafaka ve kisve ve sâir levâzım-ı zarûriyesi için babası merkūm Haçador üzerine işbu târih-i kitâbdan i‘tibâren bi’t-terâzi beher şehr ikişer yüz guruş farz ve takdîr buyurup meblağ-ı mefrûz-ı mezkûr beher şehr ikişer yüz guruşu sagīr-i mezbûrun nafaka ve kisve ve sâir levâzım-ı zarûriyesine harc u sarfa ve lede’l-iktizâ istidâneye ve inde’z-zafer babası merkūm Haçador üzerine rucû‘a anası Şazik’e izin vermeğin mâ-vaka‘a bi’t-taleb ketb olundu. Fî 20 Receb sene 1279 Şuhûdü’l-hâl: Muhzır Mustafa Ağa b. ( ), Muhzır Yusuf Ağa b. ( ), Tahtacı el-Hâc Salih Ağa b. ( ), ve gayruhum