İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 297 Hüküm no: 195 Orijinal metin no: [40b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife Hatun bt. Abdullah’ın Ebniye hulefâsından Seyyid Hafız Ahmed Efendi b. Hacı Ali’ye eşya hibe etmesi Husûs ile hibe Husûs-ı âti’lbeyânın mahallinde ketb ü tahrîri için savb-ı şer‘-i enverden bi’l-iltimâs me’zûnen irsâl olunan Kâtib es-Seyyid el-Hâc Ahmed Aziz Efendi mahmiye-i İstanbul hısnı ebvâbından Kumkapı dâhilinde Tavâşî Süleyman Ağa mahallesinde vâki‘ Maden Emini esbak müteveffâ Osman Ağa’nın zevce-i menkûha-i metrûke ve mu‘takası olan Hanife Hatun bt. Abdullah bin Abdurrahman’ın sâkine olduğu menzile varıp zeyl-i vesîkada muharrerü’l-esâmî müslimîn huzûrlarında akd-i meclis-i şer‘-i âlî etdikde zâtı müslimûn-ı merkūmûn ta‘rîfleriyle mu‘arrefe olan mezbûre Hanife Hatun meclis-i ma‘kūd-ı mezkûrde Ebniye hulefâsından bâ‘isü’l-kitâb es-Seyyid Hafız Ahmed Efendi b. el-Hâc Ali mahzarında ikrâr-ı tâm ve takrîr-i kelâm edip hibe-i atîyetü’z-zikrin sudûruna değin yedimde mâlım olup işbu meclis-i ma‘kūd-ı mezkûrde mu‘âyene olunan bir sîm gülâbdan ve bir sîm buhûrdan ve sîmden masnû‘ roza elmâs taşlı bir çift gül iğne ve bir sîm pul koyun sâ‘atimi hibe-i sahîha-i şer‘iyye ile mûmâ-ileyh es-Seyyid Hafız Ahmed Efendi’ye hibe ve temlîk ve teslîm eylediğimde ol dahi ber-vech-i muharrer meclis-i hibede bilâ mâni‘ ittihâb ve temellük ve tesellüm ve kabz u kabûl etdikden sonra yine bey‘-i âti’z-zikrin sudûruna değin yedimde mâlım olan yün memlû dört minder ve kıtık memlû ikisi çatma ve dördü beledî cem‘an altı duvar yasdığı ve biri kavuniçi kazmir çukaya kaplu servi ve üçü şalâkîye kaplu samur ve elma ve feyûm dört Çerkesî kürk ve biri çuka ve biri kazmir iki ferace ve biri slimye ve biri Halep ve biri Şam kumaşı ve biri basma cem‘an dört entari ve biri Halep ve biri basma ve biri altı parmak üç şalvar ve yün memlû üçü Moskov ve biri Amerika bezi dört döşek ve yün memlû üç basma baş yasdığı ve ikisi basma ve dördü kumaş ve ikisi çiçekli ve biri kutnî dokuz yorgan ve bir atlas hırka ve altı döğme sahan ma‘a kapak ve bir nuhâs lenger mâ‘a kapak ve bir göbekli nuhâs mangal ma‘a kapak ve ma‘a tenekeli tablası ve bir nuhâs kazgan ve beş nuhâs tencere ma‘a kapak ve bir nuhâs câmeşûy leğeni ve bir sagīr nuhâs el leğeni ve iki nuhâs şorba tası ma‘a kapak ve bir nuhâs kadaif tepsisi ve bir nuhâs karavana ve sagīr, kebîr iki nuhâs tâbe ve sagīr ve kebîr iki nuhâs ta‘âm sinisi ve biri musluklu ve biri musluksuz iki nuhâs gügüm ve üç musta‘mel kehribâ çubuk imâmesini tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile üç bin guruşa mûmâ-ileyh es-Seyyid Hâfız Ahmed Efendi’ye bey‘ ve temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm üç bin guruşun mutâlebesine müte‘allika da‘vâdan mûmâ-ileyh es-Seyyid Hafız Ahmed Efendi’nin zimmetini ibrâ-yı sahîh-i şer‘î ile kabûlünü hâvî ibrâ vü ıskāt eyledim ba‘de’l-yevm sâlifü’l-beyân bir sîm gülâbdan ve bir sîm buhûrdan ve bir çift elmâs iğne ve bir sîm koyun sâ‘ati ile eşyâ ve evânî-i nuhâsiye ve gayr-i nuhâsiye-i muharrere-i mezkûrede benim aslâ ve kat‘â alâka ve medhalim kalmayıp mûmâ-ileyh es-Seyyid Hafız Ahmed Efendi’nin emvâl-i mevhûbe ve müşterâsı olmuşdur dedikde gıbbe’t-tasdîki’ş-şer‘î vâki‘ hâli kâtib-i mûmâ-ileyh mahallinde. ila âhirih. Fî 15 Recebsene 1279 Şuhûdü’l-hâl: Mahalle-i mezbûre imâmı es-Seyyid Mahmud Aziz Efendi b. Hasan, Muhtâr-ı evveli es-Seyyid Mehmed Memiş Ağa b. Mehmed Emin Ve ahâlisinden kapu çukadârı Ali Efendi b. Osman, Es-Seyyid Hâfız Halil Efendi b. Mustafa, Muhzır Edirneli Ahmed Ağa b.( ), Çukadâr İbrahim Ağa b. ( ), ve gayruhum