İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 299 Hüküm no: 196 Orijinal metin no: [40b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife Hatun bt. Abdullah’ın vasiyeti ve vasiyetine Seyyid Hafız Ahmed Efendi’yi vasi tayin etmesi Husûs ile vasiyyet Husûs-ı âti’l-beyânın mahallinde ketb ü tahrîri için savb-ı şer‘-i enverden bi’l-iltimâs me’zûnen irsâl olunan Kâtib es-Seyyid el-Hâc Ahmed Aziz Efendi mahmiye-i İstanbul hısnı ebvâbından Kumkapı dâhilinde Tavâşî Süleyman Ağa mahallesinde vâki‘ Maden emini-i esbak müteveffâ Osman Ağa’nın zevce-i menkûha-i metrûke-i mu‘takası olan Hanife Hatun bt. Abdullah b. Abdurrahman’ın sâkine olduğu menziline varıp zeyl-i vesîkada muharrerü’l-esâmî müslimîn huzûrlarında akd-i meclis-i şer‘-i âlî etdikde zâtı müslimûn-ı merkūmûn ta‘rîfleriyle mu‘arrefe olan mezbûre Hanife Hanım meclis-i ma‘kūd-ı mezkûrde zikri âtî vesâyâ-i mu‘ayyene ve gayr-i mu‘ayyenesini tenfîze vasiyy-i muhtâr nasb ve ihtiyâr eylediği Ebniye hulefâsından bâ‘isü’l-kitâb es-Seyyid Hafız Ahmed Efendi b. el-Hâc Ali mahzarında ikrâr-ı tâm ve takrîr-i kelâm edip ben bi-emri’llâhi te‘âlâ irtihâl-i dâr-ı bekā eylediğimde zât-ı zevc ve vâris ve vârisem olmadığından benim için vasiyyet bimâ zâde ale’s-sülüs câize olduğundan ancak mâlım olan bir çift elmaslı ve zümrüdlü altın küpemi semen-i misliyle lede’l-müzâyede âhara bey‘ olunup semeninden beş yüz guruş techîz ve tekfîn ve levâzım-ı defnim görüle ve altı yüz guruş iskāt-ı salâvat-ı fâ’item ve kefâret-i savm ve yemin ve nuzûratım ve üzerime vâcibe olup kalmış olan zekâtım için ber-nehc -i şer‘î devr olunup fukarâ-i müslimîne tasadduk oluna ve lâ ale’l-yakīn bir gece on nefer huffâz-ı kirâm da‘vet olunarak bir hatm-i şerîf tilâvet etdirilip semen-i mezkûrdan üç yüz guruş huffâz-ı mûmâ-ileyhime bi-tarîki’s-sıla verile ve yine semen-i mezkûrdan yüz guruş harc u sarfla tabh-ı helvâ ve it‘âm-ı fukarâ oluna ve yine semen-i mezkûrdan iki yüz guruş vefâtım günü defnimde bulunan fukarâ-i müslimîne tasadduk oluna ve yine semen-i mezkûrdan üç yüz guruş harc u sarfla ta‘mîr-i kabrim görüle ve semen-i mezkûrdan fazla kalır ise fazla-i merkūme fukarâ-i müslimîne tasadduk oluna deyu vasiyyet ve tenfîzine mûmâ-ileyh es-Seyyid Hafız Ahmed Efendi’yi vasiyy-i muhtâr nasb ve ihtiyâr eylediğimde ol dahi vesâyet-i mezkûreyi kabûl ve merâsimini vaktinde kemâ-yenbagī edâya ta‘ahhüd ve iltizâm eyledi dedikde gıbbe’t-tasdîki’ş-şer‘î vâki‘ hâli kâtib-i mûmâ-ileyh mahallinde ketb ü tahrîr ve ma‘an meb‘ûs ümenâ-i şer‘le meclis-i şer‘e gelip alâ vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 15 Recebsene 1279 Şuhûdü’l-hâl: Eş-şahidune’s-sabıkūn