İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 300 Hüküm no: 197 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Moronoğlu Yorgi v. Kostandi’den miras kalan şerbethâne hisselerini mirasçılarının Kalioğlu Mihal’e satmaları Beyoğlu’nda şerbethâne Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen mahrûse-i Galata’ya muzâfe İstinye nâhiyesine tâbi‘ Boyacı karyesinde sâkin iken bundan mukaddem fevt olan teba‘a-i Devlet-i aliyye’nin Rum milletinden ve tüccâr kalfalarından Moronoğlu Yorgi v. Kostandi ve Yani’nin verâseti her biri teba‘a-i Devlet-i aliyye’den zevce-i metrûkesi Kadınko bt. Panayot ile li-ebeveyn er karındaşı Tüccâr Pretamos ve li-ebeveyn kız karındaşı Anaştaşya’ya münhasıra olduğu lede’ş-şer‘i’l-enver zâhir ve mütehakkık oldukdan sonra şahsı ta‘rîf-i şer‘î ile mu‘arrefe olan zevce-i merkūme Kadınko ve merkūm Pretamos ve kezâlik şahsı ta‘rîf-i şer‘î ile mu‘arrefe olan merkūme Anaştaşya meclis-i şer‘-i şerîf-i hatîrde teba‘a-i Devlet-i aliyye’nin Rum milletinden olduğu bâ-ilmühaber mütehakkık olan şerbethâneci esnâfından bâ‘isü’r-rakīm Kalioğlu Mihal v. Yorgi muvacehesinde şerbethâneci esnâfının çavuşu teba‘a-i Devlet-i aliyye’den Bodos v. Kostandi hâzır olduğu hâlde her biri ikrâr-ı tâm ve takrîr-i kelâm edip mahrûse-i mezkûre hâricinde Beyoğlu civârında Şeyhü’l-harem Hüseyin Ağa mahallesinde Ağa Câmi‘i üst tarafında Caddeyol’da vâki‘ma‘lûmu’l-hudûd senevî seksen beş guruş kirâlı Portakal koltuğu demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yüz yirmi sehm i‘tibârıyla kırk sehm hisse-i şâyi‘ası âharın yedinde mülkü olup mâ‘adâ seksen sehm hisse-i şâyi‘ası dahi bin iki yüz yetmiş senesi Muharremü’l-harâmının on birinci günü târihiyle müverrah bir kıt‘a zecriye sûreti ve hâlâ Zecriye Nâzırı izzetlü Hüseyin Efendi’nin bir kıt‘a ilmühaberi mantûklarınca mûrisimiz müteveffâ-yı merkūm Yorgi’nin hayâtında ile’l-fevt yedinde mülkü ve ba‘de fevtihî bize mevrûs olmağla biz âlât-ı gedik-i mezkûrdan ber-minvâl-i muharrer mâlik olduğumuz seksen sehm hisse-i şâyi‘a-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şerîk dört bin iki yüz guruşa merkūm Mihal’e bey‘ ve temlîk ve vech-i lâyıkıyla teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm dört bin iki yüz guruşu tamâmen bize def‘ u teslîm biz dahi yedinden bi’t-tamâm ve’l-kemâl ahz u kabz ve bi-kadri’l-hısas beynimizde iktisâm edip mebî‘-i mezkûrun seksen sehm hisse-i şâyi‘a-i merkūmesinde bizim aslâ ve kat‘â alâka ve medhalimiz kalmayıp merkūm Mihal’in mülk-i müşterâsı ve hakk-ı sırfı olmuşdur dediklerinde gıbbe. Fî 9 Receb sene 1279 Şuhûdü’l-hâl: Muhzır Süleyman Ağa b. ( ), Muhzır Şakir Ağa b. ( ), Muhzır Feyzullah Ağa b. ( ), Muhzır Mustafa Ağa b. ( ), ve gayruhum