İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 301 Hüküm no: 198 Orijinal metin no: [41a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Beyefendi’nin kayınpederi olan Mehmed Tahir Beyefendi’den alacakları konusunda anlaştıkları Husûs Husûs-ı âti’l-beyânın mahallinde ketb ü tahrîri için savb-ı şer‘-i enverden bi’l-iltimâs me’zûnen irsâl olunan Kâtib el-Hâc Hasan Hüsnü Efendi Bâbıâlî’de Hazine-i Evrâk Dâiresi’nde hâlâ Hazine-i Evrâk müdürü sa‘âdetlü Tahir Beyefendi’nin odasında varıp zeyl-i vesîkada mektûbu’l-esâmî zevât-ı kirâm hâzır oldukları hâlde akd-i meclis-i şer‘-i âlî etdikde eyâlet-i Musul vâlisi esbak İnce Alemdarzâde Mehmed Paşa merhûmun kebîr mahdûmları rif‘âtlü İsmail Beyefendi meclis-i ma‘kūd-ı mezkûrde vüzerâ-i izâm kapu kethüdâlarından izzetlü es-Seyyid Mehmed Halid Efendi b. es-Seyyid İbrahim hâzır olduğu hâlde mûmâ-ileyh İsmail Bey’in mukaddemâ kayınpederi olan işbu râfi‘u’l-kitâbü’l-müstetâb mûmâ-ileyh Mehmed Tahir Beyefendi b. el-Hâc Hüseyin Efendi mahzarında ikrâr-ı tâm ve takrîr-i kelâm edip mûmâ-ileyh Mehmed Tahir Beyefendi mukaddemâ kayınpederim iken mâlımdan ve yedimden iktirâz ve kabz ve umûruna sarfla istihlâk eylediği elli iki bin guruş alacak hakkım olup mîr-i mûmâ-ileyhin kerime-i muhteremeleri olup zevce-i mutallakam olan gāibe ani’l-meclis Âişe Hanım’a mehr-i müeccel ve nafaka-i iddet olarak cem‘an zimmetimde bâ-i‘lâm-ı şer‘î mahkûmun-bih on beş bin guruş deynim olduğundan ben dâyinem gāibe-i mûmâ-ileyhâ Âişe Hanım deyn-i mezkûruyla medyûnum mûmâ-ileyh Mehmed Tahir Beyefendi üzerine alacağım olan meblağ-ı mezkûr elli iki bin guruşun ol mikdârından edâ ve ifâ etmek üzere üçümüz bir meclisde hâzır olduğumuz hâlde havâle-i mukayyede-i sahîha-i şer‘iyye ile havâle ve her birimiz havâle-i mezkûreyi ba‘de’l-kabûl meblağ-ı mezkûr elli iki bin guruşun gayr-i ez havâle bâkīsi olan otuz yedi bin guruş dahi bana zimmetinde sahîha deyni olduğunu mûmâ-ileyh Mehmed Tahir Beyefendi sene-i sâbıka Muharremü’l-harâmının altıncı günü mahzar-ı şuhûdda tâ‘yian ikrâr ve târih-i mezkûr ile müverrah karz unvânıyla mu‘anvenişbu bir kıt‘a deyn tahvîlini dahi yedime i‘tâ etmekle ol vechile benim mûmâ-ileyh Mehmed Tahir Beyefendi zimmetinde meblağ-ı bâkī-i mezkûr otuz yedi bin guruş alacak hakkım kalmış olup ve hâzır-ı mûmâ-ileyh es-Seyyid Mehmed Halid Efendi’ye dahi zimmetimde cihet-i karzdan on dört bin altı yüz guruş deynim olduğuna binâen dâyinim hâzır-ı mûmâ-ileyh es-Seyyid Mehmed Halid Efendi’yi meblağ-ı bâkī-i mezkû[r] otuz yedi bin guruşun ol mikdârından edâ ve ifâ etmek üzere sene-i sâbıka-i mezkûre Zilka‘deti’ş-şerîfesinin on altıncı günü medyûnum mûmâ-ileyh Mehmed Tahir Beyefendi üzerine kezâlik havâle-i mukayyede-i sahîha-i şer‘iyye ile bi’l-müvâcehe havâle edip ve her birimiz havâle-i mezkûreyi ba‘de’l-kabûl mûmâ-ileyh Mehmed Tahir Beyefendi meblağ-ı muhâlün-bih-i mezkûr on dört bin altı yüz elli guruş zimmetinde hâzır-ı mûmâ-ileyh es-Seyyid Mehmed Halid Efendi’ye bi-hükmi’l-havâle sahîhan deyni olduğunu tâyi‘an ikrâr ve târih-i mezkûr ile müverrah karz unvânıyla mu‘anven işbu bir kıt‘a deyn tahvîlini yedine i‘tâ ve ba‘dehû meblağ-ı muhâlün- bih-i mezkûr on dört bin altı yüz elli guruşu nizâmi vechile hâzır-ı mûmâ-ileyh es-Seyyid Mehmed Halid Efendi’ye bi-hükmi’l-havâle tamâmen edâ ve ifâ etdikden sonra meblağ-ı mezkûr otuz yedi bin guruşdan gayr-i ez havâle bâkī kalan yirmi iki bin üç yüz elli guruşun on üç bin altı yüz elli guruşunu dahi mûmâ-ileyh Mehmed Tahir Beyefendi sulbî sagīr mahdûmum Mahmud Bey’in nafaka-i mefrûza-i müstedânesinden bâ-hüccet-i şer‘iyye vâlidesi ve hâdınesi gāibe-i mûmâ-ileyhâ Âişe Hanım’a deynim olan şehriye altı yüz elli guruşu yirmi bir ay müddetde Hanım-ı gāibe-i mûmâ-ileyhâya emr ve tevkîlimle bi’l-vekâle mâh be-mâh edâ ve ifâ ve bâkī kalan sekiz bin yedi yüz guruşun sekiz bin doksan üç guruşunu nizâm-ı mukarreri vechile işbu meclis-i ma‘kūd-ı mezkûrda bana tamâmen ve kâmilen def‘ u teslîm edip ben dahi bi’t-tamâm ve’l-kemâl ahz u kabz ve mâ’adâsı olan altı yüz yedi guruş alacak hakkımdan dahi rızâmla meccânen fâriğ olmamla mutâlebesine ve bi’l-cümle husûs-ı mezkûre işbu târih-i kitâba gelince sâir beynimizde cereyân eden cemî‘ hukūk-ı şer‘iyye müte‘allika âmme-i de‘âvîden ben mûmâ-ileyh Mehmed Tahir Beyefendi ile gāibetân ani’l-meclis zevce-i muhteremeleri Emine Hanım ve kerime-i muhteremeleri Âişe Hanım’ın zimmetlerini ibrâ-ı âmm-ı sahîh-i şer‘î ile kabûllerini hâvî ibrâ vü ıskāt eyledim dedikde gıbbe’t-tasdîki’ş-şer‘î vâki‘ hâli kâtib-i mûmâ-ileyh mahallinde ketb ü tahrîr ve ma‘an meb‘ûs ümenâ-i şer‘le meclis-i şer‘-i şerîfe gelip alâ vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fî 6 Şa‘bân sene 1279 Şuhûdü’l-hâl: Hazine-i evrâk mu‘âvinlerinden Ahmed Nesib Efendi b. İbrahim Nesim ve Ömer Meyli Efendi b. Halil, ve Ahmed Ruhi Efendi b. Ömer, Çukadâr Ahmed Ağa b. ( ), Muhzır Mustafa Ağa b. ( ),