İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 303 Hüküm no: 199 Orijinal metin no: [41b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saltane bt. Abacı Andon’un şerbethânesini Terzioğlu Berber Hamparsum v. Manas ve kızına satması Kadı karyesinde şerbethâne Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen medîne-i Üsküdar’a muzâfe Kadı karyesinde el-Hâc Cafer mahallesinde sâkine teba‘a-i devlet Devlet-i aliyye’nin Rum milleti nisvânından Meygedeci Nikola zevcesi demekle arîfe şahsı ta‘rîf-i şer‘î ile mu‘arrefe olan Saltane bt. Abacı Andon meclis-i şer‘-i hatîr-i lâzımü’t-tevkīrde teba‘a-i Devlet-i aliyye’nin Ermeni milletinden olduğu bâ-ilmühaber mütehakkık olan bâ‘isü’r-rakīm nefsinden asîl ve sadriye kebîre kızı Lusye tarafından husûs-ı âti’l-beyânda tasdîka vekîl-i şer‘îsi Terzioğlu Berber Hamparsum v. Manas muvâcehesinde teba‘a-i Devlet-i aliyye’den ve esnâf-ı merkūmenin Samatya kolu ustabaşısı Haci Delon v. Yakof hâzır olduğu hâlde ikrâr-ı tâm ve takrîr-i kelâm edip karye-i merkūmede vâki‘ bir tarafdan Keresteci Riyaloğlu Nikolaki menzili ve bir tarafdan Fıçıcı Mestani menzil arsası ve bir tarafdan Kahvecibaşı menzili arsası ve bir tarafdan tarîk-i âm ile mahdûd merhûm Abdurrahman Ağa Vakfı müsakkafâtından asîl ve vekîl ve müvekkile-i merkūmân Hamparsum ve Lusye’nin bâ-temessük-i mütevelli bi’l-münâsafa taht-ı tasarruflarında olan şehriye otuz guruş kirâlı Nikola şerbethânesi demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yedimde olan işbu üç kıt‘a zecriye sûreti ve bir kıt‘a zecriye ilmühaberi mantûklarınca akd-i âti’z-zikrin sudûruna değin müstakilleten yedimde mülk ve hakkım olmağla ben âlât-ı lâzime-i ma‘lûmeyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile asîl ve vekîl ve müvekkile-i merkūmân Hamparsum ve Lusye’ye otuz bin guruşa ale’l-iştirâki’s-seviy bey‘ ve temlîk ve teslîm eylediğimde onlar dahi ber-vech-i muharrer iştirâ ve temellük ve tesellüm ve kabz u kabûl eylediklerinden sonra semeni olan meblağ-ı mezkûr otuz bin guruşu bana def‘ u teslîm eylediklerinde ben dahi yedlerinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrda benim aslâ ve kat‘â alâka ve medhalim kalmayıp asîl ve vekîl ve müvekkile-i merkūmân Hamparsum ve Lusye’ninale’l-iştirâki’s-seviy mülk-i müşterâları ve hakk-ı sırfları olmuşdur dedikde gıbbe. Fî 17 Rebî‘ülevvel sene 1279 Şuhûdü’l-hâl: Muhzır Ahmed Ağa b. ( ), Muhzır Şakir Ağa b. ( ), Muhzır Süleyman Ağa b. ( ), Muhzır Feyzullah Ağa b. ( ), ve gayruhum