İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 304 Hüküm no: 200 Orijinal metin no: [41b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zekiye Hanım’ın ketenci mağazasını Kaznikoğlu Mehmed Ali Cemal’e satması ve Mehmed Ali Cemal’in zimmetini ibrâ etmesi Kettâncı gediği Kezâlik mahmiye-i İstanbul’da Şehzadebaşı civârında Kalenderhâne mahallesinde sâkine zâtı ta‘rîf-i şer‘î ile mu‘arrefe olan Hâcce Zekiye Hanım bt. el-Hâc İbrahim meclis-i şer‘-i şerîf-i enverde bâ‘isü’l-kitâb Kıznikoğlu sagīr Mehmed Ali Cemal’in pederi ve velîsi umûr-ı ticâret üçüncü meclisi a‘zâsından rif‘âtlü Yusuf Efendi b. Abdullah tarafından husûs-ı âti’l-beyânda tasdîka vekîl-i şer‘îsi teba‘adan Halil Ağa b. Hüseyin mahzarında kettâncı esnâfının kethüdâsı Mustafa Efendi b. Hasan tarafından mürsel vekîli Yiğitbaşı es-Seyyid Ahmed Ağa b. İsmail hâzır olduğu hâlde ikrâr-ı tâm ve takrîr-i kelâm edip mahmiye-i mezkûrede Kettâncılar çarşısında cânib-i yeminde vâki‘ ma‘lûmü’l-hudûd dokuzuncu bir bâb kettâncı mağazası derûnunda mevcûd beyne’l-esnâf gedik ta‘bîr olunur âlât-ı lâzime-i ma‘lûme akd-i âti’z-zikrin sudûruna değin yedimde olup bin iki yüz elli iki senesi Cumâdelâhiresi’nin on beşinci günü târihiyle müverrah işbu bir kıt‘a sûret ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedimde müstakillen mülk ve hakkım olmağla ben ber-minvâl-i muharrer mâlik olduğum âlât-ı gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile semen-i misli idüğü bi’l-ihbâr mütehakkık olan on beş bin guruşa sagīr-i mezbûr Mehmed Ali Cemal için pederi müvekkil-i mûmâ-ileyh Yusuf Efendi’ye bey‘ ve temlîk ve teslîm eylediğimde ol dahi ber-vech-i muharrer sagīr-i mezbûr için bi’l-velâye iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm on beş bin guruşun mutâlebesine müte‘allika da‘vâdan sagīr-i mezbûr Mehmed Ali Cemal’in zimmetini ibrâ-yı sahîh-i şer‘î ile ibrâ vü ıskāt eylediğimde müvekkil-i mûmâ-ileyh Yusuf Efendi dahi bi’l-velâye ibrâ-ı mezkûrumu kabûl edip fîmâ-ba’d âlât-ı gedik-i mezkûrde benim aslâ ve kat‘â alâka ve medhalim kalmayıp sagīr-i mezbûr Mehmed Ali Cemal’in mülk-i müşterâsı ve hakk-ı sırfı olmuşdur dedikde gıbbe. Fî 22 Receb sene 1279 Şuhûdü’l-hâl: Muhzır Süleyman Ağa b. ( ), Muhzır Mustafa Ağa b. ( ), Muhzır Şakir Ağa b. ( ), Muhzır Feyzullah Ağa b. ( ), ve gayruhum