İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 305 Hüküm no: 201 Orijinal metin no: [41b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan Yani’nin ekmekçi fırını hisselerinin bir kısmını babası Hıristo ve amcası Vasil’e satması ve devlete olan borçlarının ödenmesi Ekmekçi fırını mübâya‘ası Kezâlik mahrûse-i Galata’ya muzâfe Ortaköy’de sâkin teba‘a-i Devlet-i aliyye’nin Rum milletinden ve bahçıvan esnâfından Yani meclis-i şer‘-i hatîrde her biri teba‘a-i Devlet-i aliyye’nin Rum milletinden olduğu bâ-ilmühaber mütehakkık olan esnâf-ı merkūmeden bâ‘isü’r-rakīm merkūm Yani’nin babası Hıristo ve li-ebeveyn ammi Vasil v. Lamper muvâcehelerinde ekmekçi ve uncu esnâfının kethüdâsı İbrahim Ağa b. Ahmed ile sâir mazbûtü’l-esâmî nizâm ustaları taraflarından mürsel Yiğitbaşı es-Seyyid İsmail Efendi b. Mehmed Emin hâzır olduğu hâlde ikrâr-ı tâm ve takrîr-i kelâm edip zikr olunan Ortaköy’de vâki‘ bir tarafdan benimle babam merkūm Hıristo’nun mutasarrıf olduğumuz şerbethâne ve bir tarafdan mukaddemâ Yako ve el-yevm Avram Yahudhânesi ve tarafeyni tarîk-i âm ile mahdûd ser-çavuşân-ı esbak merhûm Süleyman Ağa Vakfı müsakkafâtından kezâlik benimle babam merkūm Hıristo’nun bâ-temessük-i mütevelli bi’l-icâreteyn münâsefeten taht-ı tasarrufumuzda olan şehriye otuz guruş kirâlı terbî‘an yetmiş zirâ‘ on bir parmak arsa üzerinde mebni bir bâb ekmekçi fırını derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yedimde olup işbu sene-i mübâreke Cumâdelâhiresi’nin yirmi üçüncü günü târihiyle müverrah bir kıt‘a sûret ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca akd-i âti’z-zikrin sudûruna değin yedimde müstakillen mülk ve hakkım olmağla ben ber-minvâl-i muharrer mâlik olduğum âlât-ı gedik-i mezkûrun yüz yirmi sehm i‘tibârıyla kırk sehm hisse-i şâyi‘asını yedimde bi’l-ibkā mâ‘adâ seksen sehm hisse-i şâyi‘asını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile on dokuz bin yetmiş bir guruşa merkūmân Hıristo ve Vasil’e ale’l-iştirâki’s-seviy bey‘ ve temlîk ve vech-i lâyıkıyla teslîm eylediğimde onlar dahi ber-vech-i muharrer seviyyen iştirâ ve temellük ve tesellüm ve kabz u kabûl eylediklerinden sonra benim cânib-i mîrîye zimmetimde yirmi sekiz bin altı yüz altı buçuk guruş deynim olmağla ben semen-i merkūm on dokuz bin yetmiş bir guruşu deyn-i mezkûrumun ol mikdârına mahsûben kabza memûruna edâ ve teslîm etmek üzere merkūmân Hıristo ve Vasil’e emr ve tarafımdan tevkîl eylediğimde onlar dahi kabûl ve ber-vech-i muharrer edâ-i deyne ta‘ahhüd etmeleriyle fîmâ-ba’d âlât-ı gedik-i mezkûrun seksen sehm hisse-i şâyi‘a-i merkūmesinde benim aslâ ve kat‘â alâka ve medhalim kalmayıp merkūmân Hıristove Vasil’in ale’l-iştirâki’s-seviy mülk-i müşterâları ve hakk-ı sırfları olmuşdur dedikde gıbbe’t-tasadiki’ş-şer‘î. Fî 9 Receb sene 1279 Şuhûdü’l-hâl: Muhzır Feyzullah Ağa b. ( ), Muhzır Süleyman Ağa b. ( ), Muhzır Ahmed Ağa b. ( ), Muhzır Şakir Ağa b. ( ), ve gayruhum