İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 306 Hüküm no: 202 Orijinal metin no: [42a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Kamil Beyefendi’nin uncu değirmenini Babe bt. Kadriko’ya satması Uncu değirmeni mübâya‘ası Kezâlik sâbıka Beyoğlu Altıncı Dâire meclisi reisi ve hâlâ teşrifâtî-i Nezâret-i Celîle-i hâriciye sa‘âdetlü Mehmed Kamil Beyefendi hazretleri b. Ahmed Efendi b. Abdullah tarafından husûs-ı âti’l-beyânda ikrâra vekîl olduğu meclis-i mezkûr çavuşlarından Âsitâneli İbrahim Ağa b. Hüseyin ve Zenci el-Hâc Ferhad Ağa b. Abdullah şehâdetleriyle ber-nehc -i şer‘î sâbit olan kapu çukadârı Ahmed Efendi b. Abdullah meclis-i şer‘-i şerîf-i enverde mahrûse-i Galata hâricinde Beyoğlu civârında Dörtyolağzı nâm mahalde sâkine teba‘a-i Devlet-i aliyye’nin Latin tâifesi nisvânından olduğu bâ-ilmühaber mütehakkık olan bâ‘isetü’r-rakīm Babe bt. Kadriko tarafından husûs-ı câi’z-zikrde tasdîka vekîl-i şer‘îsi teba‘a-i Devlet-i aliyye’den Simsâr Oseb v. Abraham muvâcehesinde ekmekçi esnâfının kethüdâsı İbrahim Ağa b. Ahmed ile mazbûtü’l-esâmî nizâm ustaları taraflarından mürsel vekîlleri Yiğitbaşı es-Seyyid İsmail Efendi b. es-Seyyid Mehmed Emin hâzır olduğu hâlde bi’l-vekâle ikrâr-ı tâm ve takrîr-i kelâm edip müvekkilim mûmâ-ileyh Mehmed Kamil Beyefendi hazretleri ben mahrûse-i mezkûrede Kapıiçi nâm mahalde kâin bir tarafdan FâtımaHanım bt. Camcı Nazif Efendi’nin dükkânları ve ba‘zen Kapıiçi hamamı duvarı ve bir tarafdan hamam-ı mezkûr ve bir tarafdan françalacı fırını ve bir tarafdan tarîk-i âm ve ba‘zen müvekkile-i merkūme Babe’nin dükkân arsası ile mahdûd merhûm Buhûrî Osman Ağa ve Şeyhülislâm-ı esbak merhûm Zenbilli Ali Efendi zevcesi merhûme Âişe Hatun vakıfları müsakkafâtından müvekkile-i merkūme Babe’nin iki kıt‘a mütevelli temessükü mantûklarınca bi’l-icâreteyn taht-ı tasarrufunda olan şehriye yirmi beş guruş kirâlı bir horosu uncu ve dört horosu ekmekçi ki cem‘an beş horoslu bir bâb değirmen derûnunda mevcûde beyne’l-esnâf gedik ta‘bîr olunur dört re’s bârgir uncu ve on altı re’s bârgir ekmekçi ki cem‘an yirmi re’s bârgir ve onlara tâbi‘ sâir âlât-ı lâzime-i ma‘lûmeyi mâlikleri olan Artin ve Mıgırdıç ve Mikail Râhib evlâd-ı Serkiz ve Kigork ve Ohannes ve Turfanda ve Elmas evlâdi’l-müteveffâ Magdisi Haçador ve Nişan ve diğer Elmas ve Herzik ve Serpohi ve İrise evlâd-ı Zohrab ve İskohi bt. Sahak’dan bin iki yüz yetmiş altı senesi Cumâdelulâsının on beşinci günü târihiyle vekāyi‘ kâtibi mazbatası kaydı mûcebince yüz bin guruş semen-i medfu‘ ve makbûza iştirâ etmemle ol vechile âlât-ı gedik-i mezkûr akd-i âti’z-zikrin sudûruna değin yedimde mülk ve hakkım olmağla ben ber-minvâl-i muharrer mâlik olduğum âlât-ı gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-ilmühaber ve bâ-buyuruldu-i âlî beş yüz elli aded tam yüzlük mecîdiye altınına müvekkile-i merkūme Babe’ye bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan beş yüz elli aded tam yüzlük mecîdiye altınına tamâmen bana def‘ u teslîm eylediğinde ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrde benim aslâ ve kat‘â alâka ve medhalim kalmayıp müvekkile-i merkūme Babe’nin mülk-i müşterâsı ve hakk-ı sırfı olmuşdur dedikde gıbbe. Fî 25 Receb sene 1279 Şuhûdü’l-hâl: Muhzır Ahmed Ağa b. ( ), Muhzır Şakir Ağa b. ( ), Muhzır Mustafa Ağa b. ( ), Muhzır Süleyman Ağa b. ( ), ve gayruhum