İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 307 Hüküm no: 203 Orijinal metin no: [42a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Penbe Hanım’ın boşandığı eşi Seyyid Ahmed Muhtar Efendi’ye iki buçuk aylık oğulları için aylık 60 kuruş nafaka bağlattırması Nafaka-i sagīr 60 guruş Mahmiye-i İstanbul’da Bâbıâlî civârında Lala Hayreddin mahallesinde sâkine bâ‘isetü’l-kitâb Şerife Penbe Hanım bt. Mehmed Zuhurî Efendi b. Abdullah’ın li-ebeveyn er karındaşı ve tarafından husûs-ı âti’l-beyânda vekîl olduğu zât-ı mûmâ-ileyhâyı bi’l-ma‘rifeti’ş-şer‘iyye ârifân Kısmet-i Askerîye mahkemesi muhzırânından Mehmed Raşid Efendi b. İsmail ve talebeden Hüseyin Efendi b. Ahmed şehâdetleriyle ber-nehc -i şer‘î sâbit olan Bâbıâlî’de nişân-ı hümâyûn kalemi hulefâsından Ahmed Vehic Efendi b. el-mûmâ-ileyh Mehmed Zuhurî Efendi meclis-i şer‘-i şerîf-i lâzımü’t-teşrîfde müvekkile-i mûmâ-ileyhânın zevc-i sâbıkı Hazine-i Celîle-i Evkāf-ı hümâyûnda mahlûlat odası ketebesinden es-Seyyid Ahmed Muhtar Efendi b. el-müteveffâ Mehmed Arif Efendi mahzarında bi’l-vekâlet ikrâr-ı kelâm ve ta‘bîr ani’l-merâm edip kız karındaşım müvekkilem mûmâ-ileyhânın mûmâ-ileyh es-Seyyid Ahmed Muhtar Efendi ile mukaddemâ zevciyet beynlerinde kāime iken mûmâ-ileyhânın firâşından hâsıl ve müvekkilem mûmâ-ileyhâdan mütevellid bi-hakkı’l-hıdâne hâlâ hacr ve terbiyesinde olan sulbî oğlu tahmînen iki buçuk aylık Mehmed Cemaleddin nâm sagīrin aslâ mâlı olmayıp nafaka ve kisveye eşedd-i ihtiyâc ile muhtâc olmağla sagīr-i mezbûrun nafaka ve kisve ve sâir levâzım-ı zarûriyesi için pederi mûmâ-ileyh Ahmed Muhtar Efendi üzerine kıbel-i şer‘den kadr-ı ma‘rûf meblağ farz ve takdîr buyurulmak müvekkilem mûmâ-ileyhânın bi-hakkı’l-hıdâne matlûbudur dedikde gıbbe’t-tasdîki’ş-şer‘î hâkim-i hâsim-i vâlâ-cenâbi’l-muvakki‘ ismuhu fî sadri’l-kitâb tûbâ lehû ve hüsnü me’âb efendi hazretleri dahi sagīr-i mezbûrun nafaka ve kisve-bahâsı için pederi mûmâ-ileyh es-Seyyid Ahmed Muhtar Efendi üzerine işbu târih-i kitâbdan i‘tibâren bi’t-terâzi beher şehr altmış guruş farz ve takdîr buyurup meblağ-ı mefrûz-ı mezkûr beher şehr altmış guruşu sagīr-i mezbûrun nafaka ve kisve ve sâir levâzım-ı zarûriyesine harc u sarfa ve lede’l-iktizâ istidâneye ve inde’z-zafer pederi mûmâ-ileyh es-Seyyid Ahmed Muhtar Efendi üzerine rucû‘a vâlidesi ve hâdinesi müvekkile-i mûmâ-ileyhâya izâfetle vekîl-i mûmâ-ileyh Ahmed Vehic Efendi’ye izin vermeğin mâ-vaka‘a bi’t-taleb ketb olundu. Fî 6 Receb sene 1279 Şuhûdü’l-hâl: MuhzırAhmed Ağa b. ( ), Muhzır Mustafa Ağa b. ( ), Muhzır Feyzullah Ağa b. ( ), Muhzır Salih Ağa b. ( ), ve gayruhum