İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 308 Hüküm no: 204 Orijinal metin no: [42a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hurdacı Hayim ve babası Zaharya v. İlya’nın ölümü ve miraslarının paylaşılması İbrâ Mahmiye-i İstanbul hısnı ebvâbından Balat kapısı dâhilinde el-Hâc İsa mahallesinde sâkin iken bundan mukaddem fevt olan teba‘a-i Devlet-i aliyye’nin Yahudi milletinden Hurdacı Hayim’in verâseti ancak babası teba‘a-i Devlet-i aliyye’nin Yahudi milletinden Zaharya v. İlya’ya münhasıra ve ba‘dehû merkūm Zaharya dahi fevt olup verâseti her biri teba‘a-i Devlet-i aliyye’nin Yahudi milletinden sulbî kebîr oğlu Hurdacı Yako ve sulbiye kebîre kızı mahrûse-i Galata’ya muzâfe Ortaköy’de sâkine Cera’ya münhasıra ve tashîh-i mesele-i mirâsları üç sehimden olup sihâm-ı mezkûreden iki sehmi merkūm Yako’ya ve bir sehmi dahi merkūme Cera’ya isâbeti lede’ş-şer‘i’l-enver zâhir ve mütehakkık oldukdan sonra şahsı ta‘rîf-i şer‘î ile mu‘arrefe olan merkūme Cera meclis-i şer‘-i şerîf-i hatîrde işbu bâ‘isü’r-rakīm merkūm Yako muvâcehesinde ikrâr-ı tâm ve takrîr-i kelâm edip ben karındaşım merkūm Yako ile mûrislerimiz müteveffiyân-ı merkūmân Hayim ve Zaharya’nın bize tashîh-i mezkûr üzere mevrûs olan nukūd ve urûz bâ-defter-i müfredât bi’l-cümle terekelerini bi’t-terâzi beynimizde tevzî‘ ve taksîm ve her birimiz hisse-i musîbemizi tamâmen ahz u kabz ve istifâ-yı hakk etmemizle mûrislerimiz müteveffiyân-ı merkūmân Hayim ve Zaharya’nın kalîl ve kesîr celîl ve hakīr ma‘lûm ve mechûl ism-i mâl ıtlâk olunur bi’l-cümle terekelerine ve hukūk-ı mirâsa ve işbu târih-i rakīme gelince sâir cemî‘ hukūk-ı şer‘iyyeye müte‘allika âmme-i de‘âvîden tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-vech-i muharrer âharın ibrâsını kabûl eyledik, dedikde gıbbe. Fî 8 Ramazan sene 1279 Şuhûdü’l-hâl: Tuhafçı Menahim v. Yasef, merkūme Cera’nın zevci Hizmetci Hayim v. İsak, Dellâl İsak v. Kalef, merkūme Cera’nın sadrî kebîr oğlu Sinici İsakve gayruhum.